aИер. 23:25, 32; Зах. 10:2
bМк. 13:22; 2 Фес. 2:9; Ажыд. 13:13; 16:14
cЫ. х. к. 18:20
dУ. ч. 1:10
eХост. 32:27-28; Ы. х. к. 17:7
fЫ. х. к. 17:5
gБашт. 19:22; 20:13; 1 Хаан. 2:12; 10:27; 25:17; 2 Хаан. 16:7; 20:1; 3 Хаан. 21:10, 13
hИис. 8:28
iИис. 7:20-21

‏ Deuteronomy 13

Чонну дүрзү-бурганнарга мөгееринче күткүп турар улусту узуткаары

1«Бир эвес чон аразынга ошчу кижи азы дүш дүжээр кижи a илереп келгеш, силерге бадыткал демдээ азы кайгамчык чүүл көргүзерин аазаарга, 2ооң чугаалап турганы бадыткал демдээ азы кайгамчык чүүл бүде бээр болза b, ол кижи: „Силерниң билбес чорааныңар бурганнарны эдерээли, оларга бараан болуулу“– дээн дижик. 3Ынчан ол ошчунуң азы дүшчүнүң сөстерин дыңнаваңар, чүге дээрге Дээрги-Чаяакчы Бурганыңар ону дамчыштыр силерни шенеп, Аңаа бүгү чүлдү-чүрээңерден, бүгү сеткил-сагыжыңардан ынааңарны билип алырын күзеп турар-дыр. 4Чүгле Дээрги-Чаяакчы Бурганыңарны эдериңер, Оон коргуп чоруңар, Ооң айтыышкыннарын сагыңар, сөзүн дыңнаңар, Аңаа бараан болуңар база Ооң-биле коштунчу бериңер. 5А ол ошчуну азы дүшчүнү өлүрүп каар ужурлуг c. Чүге дээрге ол кижи кулдар болуп чорааныңар египет черден силерни үндүре берген Дээрги-Чаяакчы Бурганыңардан ойталаар кылдыр силерни көгүдүп, Бурганның силерге эдерер кылдыр айтып-чагааны оруктан силерни чайладырын күзеп турар-дыр; чон аразында бужар-бакты ынчаар узуткап калыңар.

6Бир эвес сээң чоок улузуң: азы чаңгыс иеден төрүттүнген ха-дуңмаң, азы оглуң, азы урууң, азы эрге-чассыг кадайың, азы эң чоок эжиң сени бүдүү дуурайлап: „Сээң-даа, ада-өгбеңниң-даа билбес чорааны өске бурганнарны эдерип, оларга бараан болуулу“– деп, 7сени долгандыр турар чоок-даа, ырак-даа черлерде, черниң бир кыдыындан өске кыдыынга чедир чурттап турар чоннарның бурганнарын айтып, чугаалаан дижик. 8Ол кижи-биле чөпшээрешпе, ону дыңнава база кээргеве, аңаа хайыра бербе база болушпа d. 9Харын ол кижини өлүрүп каг; сээң холуң ону өлүрери-биле кымныындан-даа мурнай көдүрүлзүн, а бүгү чоннуң холу ооң соонда көдүрүлзүн e. 10Ону даштар-биле өлүр соп каг f, чүге дээрге ол кижи кул болуп чорааның египет черден сени үндүре берген Дээрги-Чаяакчы Бурганыңдан ойталаар кылдыр көгүдүп турган болгай. 11Бүгү израиль чон ол дугайында дыңнап кааш, корга бээр база силерниң араңарга ооң соонда ындыг бузут үүлгетпестей бээр.

12Бир эвес Дээрги-Чаяакчы Бурганыңның сеңээ чурттазын дээш берип турар хоорайларының кайы-бирээзиниң дугайында багай медээ сеңээ чедип, 13чон аразындан үнген дүржок улус g ында илереп келгеш, хоорайының улузун дуурайлап: „Силерниң билбес чорааныңар өске бурганнарны эдерип, оларга бараан болуулу“– дижип, оларны күткүдүп алганын дыңнап каан дижик сен. 14Ол чугааны истеп, шинчип, таптыг айтырып ап көр; бир эвес ол бүгү шын болуп, ук бужар чорук чон аразынга ылап-ла болган болза, 15демги хоорайның чурттакчыларын хылыш-биле узуткап каг, ону база ында бар бүгү чүвени бүрүнү-биле үрегдеп бузуп, чурттакчыларының мал-маганын безин хылыш-биле өлүрүп каг. 16Ол хоорайдан олчалап алган эт-хөреңгини ооң төп шөлүнге оваалай чыггаш, хоорайны база шупту эт-хөреңгини Дээрги-Чаяакчы Бурганыңга салган бүрүн өрттедир өргүл кылдыр өрттедивит; ол кезээ мөңгеде хорумналган бузундулар бооп артсын h, ону кажан-даа катап тургуспазын. 17Бурганга тураскааткан узуткаар ужурлуг чүү-даа чүве сээң холуңче кирбезин i, ынчан Дээрги-Чаяакчы кыптыккан килеңин чавырылдырар, сеңээ ээ-хайыралыг, өршээлдиг болур база ада-өгбеңге даңгыраглаанын ёзугаар сени өстүрүп-көвүдедир. 18Дээрги-Чаяакчы Бурганыңның сөзүн дыңнап, бөгүн сеңээ айтып-чагып турарым Ооң шупту айтыышкыннарын күүседип, Аңаа таарымчалыг чүүлдү кылып чор».
Copyright information for TyvTUV