Deu 14 | TyvTUV | STEP | «Силер – Дээрги-Чаяакчы Бурганыңарның ажы-төлү силер ; өлү берген улус дээш кажыыдаарда, мага-бодуңарны чара кеспеңер, хавааңар үстүнде бажыңар дүгүн дөңгүрертир чүлүвеңер ,

‏ Deuteronomy 14

Кажыыдалдың хоруглуг ёзу-чаңчылы

1 «Силер – Дээрги-Чаяакчы Бурганыңарның ажы-төлү силер ^a; өлү берген улус дээш кажыыдаарда, мага-бодуңарны чара кеспеңер, хавааңар үстүнде бажыңар дүгүн дөңгүрертир чүлүвеңер ^b, 2 чүге дээрге Дээрги-Чаяакчы Бурганыңга хамааржыр ыдыктыг чон-дур сен, чер-делегейде бар бүгү чоннарның аразындан Ол сени Бодунуң улуг үнелиг өнчү-хөреңгизи болзун дээш шилип алган болгай ^c».

Израиль чоннуң чип болбас дириг амытаннары

(Лев. 11:1-47)

3 «Бужар чүү-даа чүве чиве. 4 Силерге чиирин чөпшээрээн дириг амытаннар бо-дур ^{▼▼ Дириг амытаннар, куштар – оларның аттарының чамдыызын шын очулдурган деп бүзүрелдиг чугаалаары берге, оларның элээн хөйү чүгле Чоокку Чөөн чүкте чурттап турар, ынчангаш бо даңзыны чижеглеп алган даңзы деп билзе чогуур.}: инек, хой, өшкү мал, 5 иви, чээрен, элик-хүлбүс, аргар, те-чуңма, сайгак 6 база кандыг-даа адыр дуюглуг, кегженир дириг амытан. 7 Адыр дуюглуг азы кегженир дириг амытаннардан чүгле дараазында дириг амытаннарны чип болбас силер: тевени, койгунну болгаш сарлык-дегени ^{▼▼ Сарлык-деге – еврей дылда «шафан» дээр, хая-даштыг черге чурттаар үүрмек хээкчи.}, чүге дээрге олар кегженир-даа болза, адыр дуюу чок дириг амытаннар-дыр, ынчангаш силерге арыг эвес боор-дур; 8 хаванны база чивес ужурлуг силер, чүге дээрге ол адыр дуюглуг-даа болза, кегженмес-тир, ынчангаш силерге арыг эвес боор-дур. Ындыг янзылыг дириг амытаннарның эъдин чивеңер, сегинге дегбеңер!

9 Сугга чурттаар бүгү дириг амытаннардан чакпалыг база казырыктыг амытаннарны чип болур силер. 10 А чакпазы азы казырыы чок шупту суг амытаннарын чип болбас силер, олар силерге арыг эвес болур.

11 Кандыг-даа арыг кушту чип болур силер; 12 а дараазында куштарны ^{▼▼ 14:4-те немелде тайылбырны көр.} чивес ужурлуг силер: эзирни, дасты, кара-дасты, 13 дээлдигенни, бичежек эзирлерниң бүгү хевирлерин, 14 кускуннуң бүгү хевирлерин, 15 страусту, үгүнү, ак-кускунну, хартыганың бүгү хевирлерин, 16 кызыл-үгүнү, тулаа кужу ибисти, ак-үгүнү, 17 пеликанны, тогдукту, балыкчы-үгүнү, 18 шиленни, аистиң бүгү хевирлерин, итпикти болгаш часкыны. 19 Ужар чалгынныг кандыг-даа курт-кымыскаяк силерге арыг эвес болур, оларны чивеңер. 20 А кандыг-даа ужар чалгынныг арыг амытанны чип болур силер.

21 Бодунуң өлүмү-биле өлген дириг амытан чиве ^g. Ооң сегин хоорайыңда чурттап турар даштыкы кижиге беривит, ол кижи ону чизин азы өске чер чурттуг кижиге садывыт; а сен дээрге Дээрги-Чаяакчы Бурганыңга хамааржыр, ыдыктыг чон болгай сен ^h.

Анайны ооң авазының сүдүнге хайындырба ⁱ».

Дүжүттүң Бурганга хамааржыр оннуң бир кезииниң дугайында

22 «Чылдың-на шөлүңден ажаап ап турар бүгү дүжүдүңнүң оннуң бир кезиин аңгылааш ^j, 23 Дээрги-Чаяакчы Бурганыңның Бодунуң ат-алдары аңаа турумчузун дээш шилип алыр черинге, Ооң мурнунга чиир сен; далган-тарааңның, виноградың арагазының болгаш оливаң үзүнүң оннуң бир кезиин база бода-даа, шээр-даа малыңның дун төлдерин ынаар эккеп, чиир сен. Ооң ачызында Дээрги-Чаяакчы Бурганыңдан бүгү назыныңда коргарынга өөренип алыр сен. 24 А бир эвес ол черже чедер орук узун болза, Дээрги-Чаяакчы Бурганыңның Бодунуң ат-алдарын аңаа көргүзер дээш шилип алыр чери ырак болгаш, ол бүгү дүжүттү ынаар чедирип шыдавас болзуңза, Дээрги-Чаяакчы Бурганың сеңээ элбек дүжүттү хайырлаан соонда, 25 ол дүжүдүңнү акша-мөңгүнге орнапкаш, акша-мөңгүнүңнү холуңдан салбайн, Дээрги-Чаяакчы Бурганыңның шилип алыр черинче чорувут. 26 Ол акша-мөңгүн-биле күзээн бүгү чүвеңни: бода-даа, шээр-даа малды, виноград арагазын, өске эзиртир суксунну – алыксаан бүгү чүвеңни садып ал; Дээрги-Чаяакчы Бурганыңның мурнунга ол бүгүнү өг-бүлең-биле кады чип, өөрүп-хөглээр сен. 27 Сээң хоорайыңда чурттап турар левит кижини база уттуп кагба ^k, чүге дээрге ооң сээң-биле кады ээлеп алган үлүү – хувааглыг чери чок болгай ^l.

28 Үш чыл эрткен санында-ла, үшкү чылда ажаап алган дүжүдүңнүң оннуң бир кезиин бүрүнү-биле аңгылай чыггаш, хоорайыңга курлавырлап шыгжап ал ^m. 29 Ээлээр хувааглыг черни сээң-биле кады албаан левит кижи, сээң хоорайыңда чурттап турар даштыкы кижи, өскүс кижи болгаш дулгуяк кадай чедип келгеш, тоттур чемнензин, ынчан Дээрги-Чаяакчы Бурганың сээң кылып турар шупту ажыл-херектериңге ачы-буянны хайырлаар».