Deu 6 | TyvTUV | STEP | «Дээрги-Чаяакчы Бурганыңарның силерге өөредип каарын дужааган айтыышкыннары, дүрүмнери болгаш хоойлулары бо-дур. Ээлеп чурттаар дээш бар чыдарыңар черге ол бүгүнү күүседиңер.

‏ Deuteronomy 6

Дээрги-Чаяакчы – дың чаңгыс Бурганывыс

1 «Дээрги-Чаяакчы Бурганыңарның силерге өөредип каарын дужааган айтыышкыннары, дүрүмнери болгаш хоойлулары бо-дур. Ээлеп чурттаар дээш бар чыдарыңар черге ол бүгүнү күүседиңер. 2 Ынчан Дээрги-Чаяакчы Бурганыңардан коргар силер, айтып-чагып турарым Ооң дүрүмнери биле айтыышкыннарын боттарыңар, ажы-төлүңер болгаш ажы-төлүңерниң ажы-төлү амыдыралыңар дургузунда сагыыр силер ^a; ынчан силерниң назыныңар узаар. 3 Дыңна, израиль чон, сеңээ эки-чаагай болзун дээш база ада-өгбеңниң Бурганы Дээрги-Чаяакчының сеңээ чугаалап турганы дег ^b, сүт биле ары чигири агып чыдар байлак черге эңдере өзүп-көвүдээриң дээш, ол бүгүнү күүседирин кызыт.

4 Дыңна, Израиль ^c, Дээрги-Чаяакчы Бурганывыс – дың чаңгыс Дээрги-Чаяакчы-дыр! ^{▼▼ Азы: «Дээрги-Чаяакчы – Бурганывыс-тыр, чүгле Дээрги-Чаяакчы».} 5 Бодуңнуң Бурганың Дээрги-Чаяакчыга бүгү-ле чүлдү-чүрээңден, бүгү-ле сеткил-сагыжыңдан, шыдаар-ла шааңдан ынак бол ^e. 6 Бөгүн сеңээ айтып-чагып турар сөстеримни сеткил-чүрээңге шыгжап ал. 7 Оларны бодуңнуң ажы-төлүңге шиңгээттирип каг ^f, бодуңнуң бажыңыңга олургаш-даа, орукка чорааш-даа, удуп чыдып аарда-даа, оттуп келгеш-даа, ол сөстер дугайында чугаалап чор ^g. 8 Ол сөстерни, сагындырыглыг демдек дег, холуңга баглап ал, олар сээң карактарыңга көскү кертиг дег болзун ^h. 9 Оларны бажыңыңның эжииниң кастыктарынга база хаалгаңга бижип ал ⁱ».

Дээрги-Чаяакчыны уттуп болбазын сагындырганы

10 «Дээрги-Чаяакчы Бурганың сеңээ бээр бооп, Авраам, Исаак болгаш Иаков ада-өгбеңге даңгыраглааны черже – бодуңнуң тутпааның ^j, чурттаарынга таарымчалыг улуг хоорайларлыг черже сени киире бээр; 11 сээң чыып долдурбааның янзы-бүрү эт-хөреңги долган бажыңнарны, сээң казып кылбааның кудуктарны, сээң тарывааның виноград сыптары биле олива ыяштары үнген шөлдерни сеңээ бээр, аъш-чемни тоттур чиир сен. 12 Ынчан кул болуп чорааның Египеттен сени үндүре берген Дээрги-Чаяакчыны уттуп алдың халак. 13 Чүгле Дээрги-Чаяакчы Бурганыңдан корт, чүгле Аңаа бараан бол ^k, чүгле Ооң ады-биле даңгырагла ^l. 14 Өске бурганнарны – сени долгандыр чурттап турар чоннарның бурганнарын эдербе. 15 Чүге дээрге сээң Бурганың – чон аразында турар Дээрги-Чаяакчы – хүннээчел Бурган болгай ^m; ынчаар болзуңза, Дээрги-Чаяакчы Бурганыңның килеңи сеңээ удур кыптыгып, Ол сени чырык чер кырынга амылыг арттырбас.

16 Дээрги-Чаяакчы Бурганыңарны, Массага шенеп турганыңар дег ⁿ, моон соңгаар шеневеңер ^o. 17 Дээрги-Чаяакчы Бурганыңарның силерге айтып-чагаан айтыышкыннарын, доктаалдарын болгаш дүрүмнерин ыяк сагыңар.

18 Дээрги-Чаяакчының мурнунга чөптүг, эки чүведен кыл, ынчан сеңээ эки-чаагай болур, Дээрги-Чаяакчының ада-өгбеңге бээр бооп даңгыраглап турган черин ээлеп аар сен; 19 ынчан, Дээрги-Чаяакчының чугаалап турганы дег, Ол сээң хамык дайзыннарыңны сээң мурнуңдан үндүр сывырыптар ^p.

20 Келир үеде сээң оглуң: „Дээрги-Чаяакчы Бурганывыстың силерге айтып-чагып каан доктаалдары, дүрүмнери болгаш хоойлулары чүнү көргүзүп турарыл?“– деп айтырар болза ^q, 21 оглуңга мынча деп харыылаар сен: „Египетке фараоннуң кулдары турган бис, а Дээрги-Чаяакчы бисти быжыг холу-биле Египеттен үндүре берген ^r. 22 Дээрги-Чаяакчы фараонга удур, ооң шупту чоок улузунга, бүгү Египетке удур өндүр улуг коргунчуг бадыткал демдектерин база кайгамчык чүүлдерни, бис көрүп турувуста, кылган ^s. 23 Ада-өгбевиске бээр бооп даңгыраглап турганы черже бисти киирип, ону биске ээледир дээш, Ол бисти Египеттен үндүре берген. 24 Дээрги-Чаяакчы Бурганывыстан кортсун дээш база бисти амы-тынныг арттырып каар дээш, Дээрги-Чаяакчы биске шупту бо дүрүмнерни күүседирин айтып-чагаан, ынчалзывысса, назынывыс дургузунда биске эки-чаагай болур. Ам ынчалдыр бүткен-даа-дыр. 25 Дээрги-Чаяакчы Бурганывыстың биске айтып-чагаан шупту айтыышкыннарын Ооң мурнунга күүседирин кызыдар болзувусса, бис ылап-ла чөптүг-шынныг улус боор бис ^t“».