Deuteronomy 8
Эки амыдырай бергеш, Бурганны уттуп болбазы
1«Бөгүн силерге айтып-чагып турарым шупту айтыышкыннарны күүседирин кызыдыңар, ынчан амы-тынныг артып, өзүп-көвүдээр силер база Дээрги-Чаяакчының ада-өгбеңерге бээрин даңгыраглаан черинге чеде бергеш, ону эжелеп аар силер. 2Дээрги-Чаяакчы Бурганың сени ам дөртен чыл дургузунда a ээн кургаг ховуда эдертип чоруп тур, ол орукту утпа; Ол сени томаартырын күзеп, сени шенеп b, сеткил-сагыжыңда чүнү шыгжап чорууруңну – Ооң айтыышкыннарын сагыыр-сагывазыңны билип алыксаан-дыр. 3Ол сени томаартып, аштаткан соонда, сээң-даа, ада-өгбеңниң-даа билбези манна-биле ашкарып-чемгерип турган c. Кижи амытан чүгле хлеб-биле эвес, а Дээрги-Чаяакчының чугаалаан бүгү чүвезиниң ачызында амыдыраар дээрзин Ооң сеңээ билиндириксээни ол d. 4Ам дөртен чыл дургузунда сээң кеткен хевиң элеп көрбеди, будуң черле ышпады e. 5Ада кижиниң оглун сургаары дег, Дээрги-Чаяакчы Бурганыңның сени сургап турарын медереп билип аар сен f. 6Ынчангаш Дээрги-Чаяакчы Бурганыңның айтыышкыннарын сагы, Ооң оруун эдер, Оон коргуп чор. 7Дээрги-Чаяакчы Бурганың сени эки черже эдертип бар чыдар болгай. Ол дээрге хемнерлиг, кара сугларлыг, шынаалар биле дагларда суг баштары аттыгып үнүп чыдар чер-дир g; 8кызыл-тастыг, арбайлыг, виноград сыптары, фига, гранат болгаш олива ыяштары үнген, ары чигирлиг чер-дир; 9аъш-чемни мага хандыр чиириң, чединмес деп чүве билбес бооруң чер-дир; даштардан демирни, даглардан чести чона шаап ап болур чер-дир. 10Ол черге аъш-чемни тоттур чиир сен, Дээрги-Чаяакчы Бурганыңның сеңээ берген эки чери дээш, Ону алгап-йөрээр сен. 11Кичээн! Мээң бөгүн сеңээ айтып-чагып турарым Дээрги-Чаяакчы Бурганыңның айтыышкыннар, дүрүмнер болгаш хоойлуларын сагывайн баарындан база Ону уттуптарындан кичээн. 12Аъш-чемни тоттур чиир сен, эки бажыңнар тудуп алгаш, оларны ээлеп чурттай бээр сен. 13Бода-даа, шээр-даа малың дыка өзүп-көвүдээр, хөй алдын-мөңгүннүг апаар сен, бүгү эт-хөреңгиң аажок хөй болу бээр! 14Ынчан кул болуп чорааның египет черден сени үндүре берген Дээрги-Чаяакчы Бурганыңны уттуп, улуургай бердиң халак h. 15Ол сени хоранныг курт-чыланнарлыг i, суг чок, кургап калган черлерлиг улуг, коргунчуг ээн кургаг хову таварты эрттире берген болгай j; Ол сеңээ кадыг хаядан сугну үндүр аксып берген болгай k. 16Ол сени ээн кургаг ховуга ада-өгбеңниң билбези манна-биле чемгерип турган болгай l. Сени томаартыр, шенээр дээш база соонда сеңээ ачы-буян көргүзер дээш, Ол ынчаар кылып турган. 17Ишти-хөңнүңде: „Мээң күжүм, быжыг холум бо байлакты меңээ олчалап тып берди“дей бердиң халак m. 18Дээрги-Чаяакчы Бурганыңны утпайн чор, чүге дээрге сээң ада-өгбеңге даңгыраглааны Бодунуң чагыг-керээзин шынзыдарын күзээш, Ол сеңээ байлак олчалап тывар күштү берип турар. Ам ынчалдыр бүткен-даа-дыр. 19А бир эвес Дээрги-Чаяакчы Бурганыңарны уттуп, өске бурганнар эдерип, оларга бараан болуп, мөгеер болзуңарза, бөгүн баш бурунгаар сагындырып тур мен: өлүрүңер чайлаш чок. 20Дээрги-Чаяакчы Бурганыңарның үнүн тооп дыңнавас болзуңарза, Ооң силерниң мурнуңарга узуткап турар чоннары дег, бодуңар база узуткаттырып аар силер! n»
Copyright information for
TyvTUV