Deu 1 | TyvTUV | STEP | Бо сөстер дээрге Моисейниң бүгү израиль чонга Иордан хемниң чөөн талазында Арава шынаага база ээн кургаг ховуга, Суфтуң дужунга, Фаран, Тофел, Лаван, Асирот болгаш Дизагав хоорайларның аразынга чугаалаан сөстери-дир.

‏ Deuteronomy 1

Ханаан черни ээлээр дугайында дужаал

1 Бо сөстер дээрге Моисейниң бүгү израиль чонга Иордан хемниң чөөн талазында Арава шынаага база ээн кургаг ховуга, Суфтуң дужунга, Фаран, Тофел, Лаван, Асирот болгаш Дизагав хоорайларның аразынга чугаалаан сөстери-дир. 2 (Сеир дагларынга чедер орук-биле Хорив дагдан ^a Кадес-Варниге ^b чедир он бир хүн дургузунда чоруур турган.) 3 Египеттен хосталып үнген соонда, дөртенги чылдың он бир айның бирээде ^c Моисей израильчилер-биле чугаалашкаш, оларга хамаарыштыр Дээрги-Чаяакчының айтып-чагаан бүгү чүвезин дамчытканы ол. 4 Эсевон хоорайга чуртун чагырып турган амор хаан Сигонну база Аштерот болгаш Эдрея хоорайларга чуртун чагырып турган Васанның хааны Огту базып каан соонда ^d, 5 Моисей Иорданның чөөн талазынга, моав черге, бо хоойлуну тайылбырлап эгелээн:

6 «Хорив даг эдээнге турувуста, бистиң Бурганывыс Дээрги-Чаяакчы биске: „Бо даг чанынга чежеге дээр турар силер ^e. 7 Барып көжүп үнүңер: амор чоннуң даглыг чуртунче, оларның шупту кожаларының чурттап турар черлеринче ^f: Иордан хемниң шынаазынче, даглыг черже, шатче, Негевче болгаш далай эриинче чоруй барыңар; ханаан черни таварып эрткеш, Ливан дагларынга, улуг Евфрат хемге чеде бериңер. 8 Көрүңер даан, Мен бо черни силерге берип тур мен, ам баргаш, Дээрги-Чаяакчының ада-өгбеңерге – Авраам, Исаак болгаш Иаков оларга база оларның үре-салгалынга бээр бооп даңгыраглааны бо черни ^g өнчү кылдыр хүлээп алыңар“– дээн болгай».

Израильдиң баштыңчыларын томуйлааны

9 «Мен ынчан силерге мынча деп турдум чоп: „Силерни чааскаан ууп чүктеп шыдавас-тыр мен ^h. 10 Дээрги-Чаяакчы Бурганыңар силерни өстүрүп-көвүдедип кагды, ам дээрде сылдыстар дег хөй-дүр силер! ⁱ 11 Ада-өгбеңерниң Бурганы Дээрги-Чаяакчы силерни амгы саныңардан муң катап көвүдетсин ^j, силерге аазап турганы дег, ачы-буянын хайырлазын! 12 Мен канчап-ла чааскаан силерниң аар-бергеңерни ууп, үүрге-чүъгүңерни чүктеп шыдажыр база чаргыңарны чарар мен?! 13 Бодуңарга аймактар аайы-биле угаан-сарыылдыг, шылгаттынган ^{▼▼ Азы: «Дуржулгалыг» азы «ат-сураглыг».} улустан шилип алыңар, мен оларны силерге баштыңчылар кылып бээр мен“.

14 Силер меңээ: „Сээң биске айыткан шиитпириң эки-дир“– деп харыыладыңар. 15 Мен ынчан силерниң аймактарыңардан кол кижилерни: угаан-сарыылдыг, шылгаттынган ^{▼▼ 1:13-те немелде тайылбырны көр.} улусту кыйгырткаш, силерге баштыңчылар кылып каан мен – олар муң, чүс, бежен болгаш он кижиге даргалар база аймак бүрүзүнде удуртукчулар апарган ^m.

16 Мен ынчан силерниң демги баштыңчыларыңарга мынча деп айтып-чагаан мен: „Ха-дуңма чонуңарның чаргы-чаалызын дыңнап, израиль кижи израиль кижи-биле-даа, даштыкы кижи-биле-даа чаргылдажып турар болза, шынныы-биле шиидиңер ⁿ. 17 Шииткел үндүрүп тура, улусту ылгай көрбеңер, аргажок ынай-даа, өндүр улуг-даа кижини деңге дыңнаңар ^o, кандыг-даа кижиден кортпаңар, чүге дээрге силер улусту Бурганның өмүнээзинден шиидип турар силер; а шиитпирлээри эмин эрттир берге херекти меңээ эккелиңер, ону дыңнап көргеш, бодум шиитпирлээр мен ^p“. 18 Оон мен силерниң кылыр ужурлуг шупту ажыл-херектериңерге хамаарыштыр айтыышкыннарны база-ла ынчан берген мен».

Хайгыылдаашкын база чоннуң кортканы

(Сан. 13; 14)

19 «Бис ынчан Хоривтен көжүп үнгеш, Дээрги-Чаяакчы Бурганывыстың дужааганын ёзугаар, амор чоннуң даглыг чуртунга чедер орук-биле чорупкаш, силерниң көргениңер аажок улуг коргунчуг ээн кургаг ховуну таварып эрткеш, Кадес-Варниге чеде берген бис. 20 Мен силерге: „Дээрги-Чаяакчы Бурганывыстың биске берип турары амор чоннуң даглыг чуртунда чедип келдиңер, 21 көрүңер даан, бо черни Дээрги-Чаяакчы Бурганыңар силерге берип турар-дыр, барып, ада-өгбеңерниң Бурганы Дээрги-Чаяакчының силерге чугаалап турганын ёзугаар, ону ээлеп алыңар, кортпаңар-даа, сүрээдевеңер-даа ^q“– дээн мен.

22 А силер ынчан шупту меңээ чедип келгеш: „Бо черни биске шинчип көрүп бээр улустан баштай чорудуптаалы, олар бистиң эртер ужурлуг оруувус база барып чедер хоорайларывыс дугайында медээден эккелзин“– дээн силер.

23 Ол бодалды таарымчалыг деп көргеш, силерниң араңардан он ийи кижини – аймак бүрүзүнден-не бир кижи кылдыр – шилип алган мен. 24 Хайгыылчылар чорупкаш, даглыг черже үнгеш, Эшкол шынаага чеде бергеш, ону шинчип көрген. 25 Оон ол черниң чимистерин тудуп алгаш, биске эккелгеш, Дээрги-Чаяакчы Бурганывыстың биске берип турары чер дугайында медээлеп: „Эки чер-дир“– деп чугаалаан.

26 А силер ынаар үнүксевейн, Дээрги-Чаяакчы Бурганыңарның айтыышкынынга удурланып, 27 чадырларыңарга: „Биске хөңнү чок болгаш база бисти амор чоннуң холунга хүлээдип берип, узуткап каар дээш, Дээрги-Чаяакчы бисти египет черден үндүре берген-дир. 28 Ынаар чедер харыывыс кайда боор. Хайгыылчы ха-дуңмавыс ‘Ол чон бистен күчүлүг, улуг-шыырак-тыр, ооң хоорайлары улуг болгаш дээрге чедип турар быжыглалдарлыг-дыр, Энактың үре-салгалын ^{▼▼ Энактың үре-салгалы дээрге кайгамчык улуг мага-боттуг улусту ойзу адааны ол бооп чадавас (Сан. 13:23; Ы. х. к. 2:10; 9:2; Иис. 11:21-22 көр).} безин аңаа көрдүвүс’ деп чугаалааш, сорук-күжүвүстү кошкадыпты“– деп хыйланып турган силер.

29 А мен силерге: „Ол чондан кортпаңар-даа, сүрээдевеңер-даа. 30 Дээрги-Чаяакчы Бурганыңар мурнуңарда бар чыдар болгай, Ол, Египетке, бодуңар көрүп туруңарда, силерге кылганы дег, силерниң талаңарга чаалажыр ^s. 31 Ээн кургаг ховуга Дээрги-Чаяакчы Бурганыңар силерни бүгү эрткен орууңарга, бо черге чедип келгижеңерге чедир, ада кижиниң оглун чүктеп чорууру дег, чүктеп чораанын көрген-не болгай силер ^t“– дээн болгай мен.

32 Ынчалза-даа ол таварылгада Дээрги-Чаяакчы Бурганыңарга бүзүревейн бардыңар; 33 силерге турлагжып алыр чер көрүп бээр дээш мурнуңарга орук баштап бар чыткан Бурганга, силерге орук айтыр дээш дүне – от аразынга, а хүндүс – булут аразынга бар чыткан Бурганга бүзүревейн бардыңар ^u».

Бурганның чонну кезеткени

(Сан. 14:20-45)

34 «Дээрги-Чаяакчы силерниң чугаа-сөзүңерни дыңнап кааш, килеңнеп: 35 „Бо улустан, бо бузуттуг салгалдан кым-даа ада-өгбеңерге бээр бооп аазааным эки черни көрбес. 36 Чүгле Иефоннийниң оглу Халев ол черни көөр; Дээрги-Чаяакчыга бүрүнү-биле чагыртканы дээш ^v, Мен аңаа болгаш ооң үре-салгалынга таварып эрткен черин бээр мен“– деп даңгыраглаан.

37 Силерниң хайыңар-биле Дээрги-Чаяакчы меңээ безин килеңнеп, мынча дээн: „Сен база ол черже кирбес сен ^w; 38 Нуннуң оглу, сээң дузалакчың Иисус ^x – ынаар кирер кижи ол-дур, сен ону сорук киирип, быжыглап каг, чүге дээрге ол черни ээлээр кылдыр, израиль чонну баштап киире бээр кижи ол-дур. 39 ‘Дайзыннарга олча-тывыш болу бээр улус-тур’ деп турган чаш ажы-төлүңер, амгы үеде эки-бакты ылгап билбес оолдарыңар демги черже кире бээр, оларга ол черни бээримге, ээлеп алыр. 40 А силер дедир эггеш, Кызыл далай чедер орук-биле ээн кургаг ховуже чоруптуңар“.

41 Ынчан силер меңээ: „Дээрги-Чаяакчының мурнунга бачыт үүлгеткен-дир бис, ам барып, Дээрги-Чаяакчы Бурганывыстың биске дужааганын ёзугаар чаалажыылы“– деп харыылаан силер. Ооң соонда кайыңар-даа дайылдажыр чепсээн астып алгаш, даглыг черже үне бээри шуут белен деп бодаан. 42 А Дээрги-Чаяакчы меңээ: „Оларга: ‘Ынаар үнмеңер база дайылдашпаңар, чүге дээрге араңарда Мен чок-тур мен. Оон башка дайзыннарыңарга чылча шаптырар силер’ – деп чугаала“– дээн.

43 Мен силер-биле чугаалашкан мен, ынчалза-даа мени тоовайн, Дээрги-Чаяакчының айтыышкынынга удурланып, тураңар улгадып, даглыг черже үне бердиңер. 44 Ол даглыг черниң чурттакчылары – амор чон силерге удур чаалажып үнгеш, силерни арылар ышкаш сывыртап, Сеирден эгелээш, мырыңай Хормага чедир чылча шаап турган. 45 Силер ынчан ээп келгеш, Дээрги-Чаяакчыдан дуза дилеп, ыглажып турдуңар, а Ол сөстериңерни дыңнавайн эрттирип, силерни тоовайн барган. 46 Ынчангаш силер Кадеске ол хире үр болган силер ^y».