Deu 10 | TyvTUV | STEP | «Дээрги-Чаяакчы ынчан меңээ: „Бодуңга мурнундагы калбак даштар ышкаш ийи калбак даштан чондуруп алгаш, Менче, даг бажынче үнүп кел, ыяш аптарадан база чазап ал .

‏ Deuteronomy 10

Чагыг-керээни чаартканы

(Хост. 34:1-4)

1 «Дээрги-Чаяакчы ынчан меңээ: „Бодуңга мурнундагы калбак даштар ышкаш ийи калбак даштан чондуруп алгаш, Менче, даг бажынче үнүп кел, ыяш аптарадан база чазап ал ^a. 2 Мен ынчан ол калбак даштарга сээң буза шаап каапканың даштарга турган сөстерни оюп бижип каар мен. Сен чаа даштарны ыдыктыг аптараже суп каар сен ^b“– дээн чүве.

3 Мен акация ыяжындан аптара чазап алгаш ^c, биеэги даштар ышкаш ийи калбак даш чондургаш, ол даштарны тудуп алгаш, дагже үне берген мен. 4 Дээрги-Чаяакчы чыглып турган хүнүңерде силерге от иштинден чугаалааны он айтыышкынын ^d ол ийи калбак дашка, ооң мурнунда бижээни ышкаш, бижип каан болгаш ол даштарны меңээ ап берген ^e. 5 Мен эргилгеш, дагдан бада бергеш, Дээрги-Чаяакчының меңээ дужааганын ёзугаар, калбак даштарны чазап алган аптарамче суп каан мен, олар ында шыгжаттынган ^f.

6 (Израиль чон Беерот-Бене-Яакандан көжүп үнгеш, Мосера дээр черге чеде берген ^g; Аарон аңаа мөчээн, ону ол-ла черге орнукшудуп каан ^h. Ооң оглу Элеазар ачазының орнунга бараалгакчы апарган. 7 Чон оортан Гудгодче, Гудгодтан – хемнерлиг Иотвафа дээр чуртче көжүп үнген ⁱ. 8 Ол үеде Дээрги-Чаяакчы Левийниң аймаан Ооң чагыг-керээзин шыгжаан аптараны көдүрүп дажыглаар, Аңаа бараан болуп, Ооң мурнунга турар база Ооң ады-биле чонну йөрээр кылдыр өске аймактардан аңгылап каан ^j – амдыгаа чедир ындыг бооп турар. 9 Ынчангаш Левийниң аймаа өске ха-дуңма аймактар-биле кады хувааглыг чер, үлүг албаан, а Дээрги-Чаяакчы Бурганыңның аңаа чугаалап турганы дег, Ол Боду ооң үлүү болур.) ^k

10 Мен даг бажынга, биеэги үеде дег, дөртен дүн-хүннү эрттирген мен ^l; Дээрги-Чаяакчы ол удаада база мени тооп көрүп, сени узуткавас деп шиитпирлээн. 11 Оон Дээрги-Чаяакчы меңээ: „Баргаш, бо чонну баштап чорувут, оларга бээр бооп ол чоннуң ада-өгбезинге даңгыраглааным черни олар барып эжелеп алзын“– деп чугаалаан ^m».

Ыдыктыг хоойлунуң алыс ужур-утказы

12 «Израиль чон, ам дыңна: Дээрги-Чаяакчы Бурганың сенден чүнү негеп турарыл? ⁿ Ол чүгле Дээрги-Чаяакчы Бурганыңдан коргарыңны, Ооң шупту оруктарын эдерериңни, Аңаа ынак бооруңну, Дээрги-Чаяакчы Бурганыңга бүгү чүлдү-чүрээңден, бүгү сеткил-сагыжыңдан бараан бооруңну ^o база 13 бөгүн сеңээ айтып-чагып турарым Дээрги-Чаяакчының айтыышкыннарын, дүрүмнерин сагыырыңны күзеп турар. Ынчан сеңээ эки-чаагай болур ^p.

14 Дээр, эң бедик дээр, чер, ында бар бүгү чүве Дээрги-Чаяакчы Бурганыңарга хамааржыр ^q, 15 ынчалза-даа Дээрги-Чаяакчы чүгле силерниң ада-өгбеңерни чоок хүлээп көрүп, оларга ынак апарган, оларны салгап арткан үре-салгалы болур силерни өске шупту чоннар аразындан шилип алган ^r – ам ынчалдыр бүткен-даа-дыр.

16 Ынчангаш Дээрги-Чаяакчыга хамааржырыңарны демдектеп, чүректериңер арыглап алыңар ^s, моон соңгаар чөрүү болбаңар ^t. 17 Чүге дээрге Дээрги-Чаяакчы Бурганыңар – бурганнарның Бурганы ^u, дээргилерниң Дээргизи-дир ^v, өндүр улуг, күчү-күштүг, сүртенчиг Бурган-дыр. Ол улусту ылгай көрбес ^w база хээли албас ^x; 18 Ол өскүс кижиге, дулгуяк херээженге болчуп, чөптүг шиитпирни үндүрер ^y; Ол өскээртен келген кижиге ынак, аңаа аъш-чем биле идик-хепти берип турар. 19 Силер база өскээртен келген кижиге ынак болуңар, чүге дээрге бодуңар база египет черге өскээртен келген улус бооп чораан болгай силер ^z.

20 Чүгле Дээрги-Чаяакчы Бурганыңдан коргуп чор, Аңаа бараан бол, Ооң-биле коштунчу бер, Ооң ады-биле даңгырагла ^aa. 21 Ол – сээң макталыңга төлептиг, Ол – сээң Бурганың, Ол сен дээш, ийи карааң-биле көрүп туруңда, өндүр улуг, сүрээденчиг чүүлдерни кылган. 22 Ада-өгбең Египетке чедип кээрде, чеден ^{▼▼ Өске бурунгу сөзүглелде «чеден беш» деп бижээн.} борбак кижи турган ^ac, а ам Дээрги-Чаяакчы Бурганың сени дээрде сылдыстар дег хөй санныг чон кылып каан ^ad».