Deuteronomy 16
Үш кол байырлал
(Хост. 12:1-39; 13:3-10; 23:14-17; Лев. 23:4-22, 33-43; Сан. 28:16-31; 29:12-39)
1«Авив айны онзалап, Дээрги-Чаяакчы Бурганыңга бараалгаткан Хосталыышкын байырлалын эрттирип чор, чүге дээрге авив айда Дээрги-Чаяакчы Бурганың сени Египеттен дүне када үндүре берген болгай. 2Дээрги-Чаяакчы Бурганыңга бараалгаткан Хосталыышкын байырлалының өргүлүн – бода азы шээр малыңны Дээрги-Чаяакчының Бодунуң ат-алдары аңаа турумчузун дээш шилип алыр черинге дөгерер сен. 3Ол өргүл-биле кады ажыткылыг аъш-чем чиве, а кады чеди хүн дургузунда ажыткы-биле хөөтпейн хаарган далган-тарааны – түрегделиңни демдеглээн далган-тарааны чиир сен, чүге дээрге египет черден дүвү-далаш үнүп чоруткан болгай сен a; бүгү назыныңда египет черден көжүп үнген хүнүңнү сактып чоруур дээш, ынчалдыр кыл. 4Сээң ээлээн бүгү чериңге чеди хонук дургузунда ажыткы турбас ужурлуг база байырлалдың бирги хүнүнүң кежээзинде дөгерген малыңның эъдин эртенге чедир арттырбас ужурлуг сен b. 5Дээрги-Чаяакчы Бурганыңның сеңээ берип турары ээлел чери бүрүзүнге байырлалда өргүүр малды дөгерип болбас, 6а ону Дээрги-Чаяакчы Бурганыңның Бодунуң ат-алдары аңаа турумчузун дээш шилип алыр черинге, чүгле аңаа, кежээ, хүн ажар өйде, Египеттен үнүп турганың үеде, дөгерер сен. 7Өргүл малын Дээрги-Чаяакчы Бурганыңның шилип алыр черинге быжырып белеткээш, чиир сен, а даартазында эртен ээп чана бээр сен. 8Алды хүн дургузунда ажыткы-биле хөөтпейн хаарган далган чиир сен, чедиги хүнде Дээрги-Чаяакчы Бурганыңга бараалгаткан онзагай чыыш болур, ол хүн ажыл кылбас сен. 9Дүжүттү хол кадыыры-биле ажаап эгелээр хүнден эгелээш, чеди неделяны санап алгаш c, 10Дээрги-Чаяакчы Бурганыңга бараалгаткан Чеди неделя байырлалын демдеглеп эрттир, эки тура-биле өргүлден сал, Дээрги-Чаяакчы Бурганыңның сеңээ хайырлаан ачы-буянының аайы-биле чежени салырын бодуң шиитпирле. 11Сен бодуң, оглу-кызың, эр, херээжен кулдарың, сээң хоорайыңда чурттап турар левит кижи, чон аразында турар даштыкы кижи, өскүс кижи болгаш дулгуяк херээжен кижи – Дээрги-Чаяакчы Бурганыңның мурнунга, Ооң Бодунуң ат-алдары аңаа турумчузун дээш шилип алыр черинге өөрүп-хөглеңер. 12Египетке кул болуп чорааныңны утпа d, бо дүрүмнерни сагып, күүседип чор. 13Тарааңны бастырып, виноградың хандызын сыскырып алгаш, чеди хүн дургузунда Чадырлар байырлалын демдеглеп эрттирер сен e; 14бодуң, оглу-кызың, эр, херээжен кулдарың, сээң хоорайыңда чурттап турар левит кижи, даштыкы кижи, өскүс кижи болгаш дулгуяк херээжен кижи ону байырлап, өөрүп-хөглеңер. 15Дээрги-Чаяакчы Бурганыңның шилип алыр черинге Аңаа бараалгаткан байырлалды демдегле. Дээрги-Чаяакчы Бурганың сеңээ – бүгү дүжүдүңге база кылып турар шупту ажыл-херээңге ачы-буянын хайырлаар-дыр, ынчангаш чүгле өөрүп-хөглээр-дир сен. 16Шак ынчаар шупту эр улузуң чылда үш катап: Хаарган далганнар байырлалынга, Чеди неделя байырлалынга база Чадырлар байырлалынга Дээрги-Чаяакчы Бурганыңның мурнунга, Ооң шилип алыр черинге чедип кээр ужурлуг; ол чедип кээрде, кым-даа болза, Дээрги-Чаяакчының мурнунга хол куруг келбезин. 17Кижи бүрүзү Дээрги-Чаяакчы Бурганыңның хайырлаан ачы-буянының аайы-биле өргүл белээн тудуп алгаш, чедип келзин».Шииткекчилер биле удуртукчулар
18«Дээрги-Чаяакчы Бурганыңның сеңээ берип турары хоорай бүрүзүнге аймактар аайы-биле шииткекчилер биле удуртукчуларны томуйлап каг f, олар чонну чөптүү-биле шиитсин g. 19Хоойлуну хажытпа, улусту ылгай көрбе h, хээли алба – хээли мерген угаанныг улусту согурартыр, актыг улустуң чугаа-сөзүн хажыдар i. 20Чөптүг-шынныг чорукче, чүгле чөп-шынче чүткү! Ынчан дириг артар сен база Дээрги-Чаяакчы Бурганыңның сеңээ берип турар черин ээлээр сен».Дүрзү-бурганнарга мөгеерин хоругдааны
21«Дээрги-Чаяакчы Бурганыңга тудуп алганың өргүл салыр бедигээш чанынга Ашера бурганга тураскааткан ыяштар тургуспа j. 22Мөгеер дээш даш көжээ тургуспа, Дээрги-Чаяакчы Бурганың оларны көөр хөңнү чок болгай.
Copyright information for
TyvTUV