Deuteronomy 17
1Дээрги-Чаяакчы Бурганыңга кандыг-бир четпес чүүлдүг бода азы шээр малды өргүл кылдыр эккеп салба, ол дээрге Дээрги-Чаяакчы Бурганыңга чүдек-бужар өргүл-дүр a. 2– 3Дээрги-Чаяакчы Бурганыңның сеңээ берип турары хоорайларыңның кайы-бирээзинде чурттаан чон аразында Дээрги-Чаяакчы Бурганыңның мурнунга бузут үүлгедир, Ооң чагыг-керээзин үрээр: барып, өске бурганнарга бараан болуп, хүнге, айга азы сылдыстарның шупту аг-шериинге мөгеер эр азы херээжен кижи тыптып кээп болур. Мен ынчаар кылырын хоруп каан-на болгай мен. 4Сеңээ ону медээлээрге, дыңнап алгаш, эки истеп хына: бир эвес ол ылап шын бооп, Израильге шак ындыг чүдек-бужар чүве үүлгеттинген болза, 5ол бузутту үүлгеткен эр азы херээжен кижини хоорайыңның эжик-хаалгазынга эккелгеш, даш-биле өлүр соп каавыт b. 6Чүгле ийи азы үш кижиниң херечилээн аксы-сөзү бар болза, ол кижини өлүмге шиидип болур; чаңгыс херечиниң аксы-сөзүн ёзугаар кижини өлүрүп шиидип болбас c. 7Херечилер ол кижини өлүрери-биле кымны-даа мурнай олче холун көдүрзүн, ооң соонда бүгү чон шаажылалга киржип, холун көдүрзүн d, чон аразында бужар-бакты ынчаар узуткап калыңар».Шиитпирлээри берге херектери
8«Бир эвес хоорайыңга кандыг-бир херекти: азы өлүрүүшкүннү, азы чаргы-чаалыны, азы кемдээшкинни үзе шиитпирлээри сеңээ берге болза, Дээрги-Чаяакчы Бурганыңның шилип алыр черинче чоруй бар. 9Аңаа левит бараалгакчыларга база ол үеде орта турар шииткекчиге чеде бергеш, олардан айтырып көр. Олар сеңээ херекти канчаар үзе шиитпирлээрин айтып бээр e. 10Бараалгакчы биле шииткекчи сеңээ Дээрги-Чаяакчының шилип алыр черинге чүү дээр болдур, ол ёзугаар кылып, оларның сеңээ айтыры бүгү чүвени күүседирин кызыдар сен. 11Оларның сеңээ айтыр хоойлузу биле шиитпирин ёзугаар кылыр сен; чугаалаар сөзүнден оң-даа, солагай-даа талаже чайгылбас сен. 12А Дээрги-Чаяакчы Бурганыңга бараан болуп турар бараалгакчы биле шииткекчини тооп дыңнавас, туразы улуг кижини өлүрүп каар ужурлуг, Израильде бужар-бакты ынчаар узуткап каг. 13Бүгү чон ол дугайында дыңнап кааш, корга бээр база ооң соонда ынчаар туразы улгатпас».Хаанны дүжүлгеге олуртуру
14«Дээрги-Чаяакчы Бурганыңның сеңээ берип турары черже чедип кээп, ону эжелеп, ээлеп чурттай бергеш, „Мени долгандыр чурттаан өске чоннар ышкаш, мени башкарар хаандан олуртуп аар-дыр“деп барган дижик сен f. 15Ынчан Дээрги-Чаяакчы Бурганыңның шилип аар хаанын сени башкарар кылдыр дүжүлгеге олуртуп ал g; шак ол хаанны ха-дуңмаң аразындан эккеп, дүжүлгеге олуртуп ап болур сен, ха-дуңмаң эвес, даштыкы кижини бодуңга хаан кылбас сен. 16Чүгле ол хаан кижи эңдерик аът эдилевезин h база эңмежок аът эккеп аар дээш Египетче чонну эгитпезин i; Дээрги-Чаяакчы силерге: „Ол орук-биле черле дедир эгбеңер“– деп чугаалаан-на болгай. 17Сагыш-хөңнүн дуурайлатпас дизе, хаан кижи эңмежок кадай албазын j база эңдерик мөңгүн, алдын чыып, бодун байытпазын k. 18Хаан кижи дүжүлгеге саадапкаш, левит бараалгакчыларның шыгжап турары дүрүг-номдан ол хоойлуну бодунга чара бижидип алзын. 19Ук хоойлу хаанга турзун, ол ону бүгү назынында номчуп l, Дээрги-Чаяакчы Бурганындан коргуп өөрензин база ол хоойлунуң бүгү айтыышкын, дүрүмнерин күүседир дээш кызытсын. 20Ынчан хаан кижи бодун ха-дуңма чонундан өрү көрдүнмес, ол хоойлудан оң-даа, солагай-даа талаже чайгылбас, шак ындыг хаан база ооң үре-салгалы үр үеде Израиль күрүнениң хааннары бооп, дүжүлгеге саадаар».
Copyright information for
TyvTUV