Deu 20 | TyvTUV | STEP | «Дайзыныңга удур дайылдажып үнгеш, дайынчы аъттар биле тергелер база сенден хөй санныг аг-шериг көрүп кааш, кортпа, чүге дээрге сени египет черден үндүре берген Бурганың Дээрги-Чаяакчы сээң-биле кады болгай .

‏ Deuteronomy 20

Шериг хүлээлгези болгаш дайын чорудулгазы

1 «Дайзыныңга удур дайылдажып үнгеш, дайынчы аъттар биле тергелер база сенден хөй санныг аг-шериг көрүп кааш, кортпа, чүге дээрге сени египет черден үндүре берген Бурганың Дээрги-Чаяакчы сээң-биле кады болгай ^a.

2 Тулчуушкунче бар чыдырыңарда, Бурганның бараалгакчызы чедип келгеш, чонга мынча дизин: 3 „Израиль чон, дыңна, бөгүн дайзыннарыңар-биле тулчур деп тур силер, сорук-күжүңер кошкаш дивезин, коргуш чок болуңар, сүрээдеп хөлзевеңер; 4 Бурганыңар Дээрги-Чаяакчы силер-биле кады бар чыдар болгай, дайзыннарыңар-биле тулчу бээриңерге, Ол силерге тиилелгени Боду хайырлаар!“

5 Удуртукчулар ынчан чонга мынча деп чарлазын: „Чаа бажың тудуп алгаш, аңаа чурттап четтикпээн кижи бар болза, чана берзин, оон башка ол кижи дайынга өлүртүп каар болза, өске кижи ооң бажыңынга чурттай бээр. 6 Чимистиг үнүштер тарып алгаш, ооң дүжүдүн чыып чип четтикпээн кижи бар болза, чана берзин, оон башка ол кижи дайынга өлүртүп каар болза, өске кижи ооң дүжүдүн ажаап аар. 7 Душтуу кыс-биле дүгдешкеш, ооң-биле кады чурттаваан кижи бар болза, чана берзин, оон башка ол кижи дайынга өлүртүп каар болза, өске кижи ол кысты кадай кылып аар ^b“. 8 Удуртукчулар чонга оон ыңай: „Кортук, сорук чок кижи бар болза, чана берзин, оон башка ол кижи ха-дуңмазын боду ышкаш чүрээ бош улус кылып каар“– деп чарлазын ^c. 9 Удуртукчулар ол бүгүнү чонга чугаалап дооскаш, чонну башкарар шериг баштыңнарын томуйлап каар ужурлуг.

10 Хоорайны эжелеп аар дээш чеде бергеш, аңаа тайбыңдан саналда. 11 Бир эвес ооң чурттакчылары сээң саналдаан тайбыңыңны хүлээп ап, эжик-хаалгазын ажыдып бээр болза, ында чурттап турар улус шупту сеңээ ажылдап берип ^{▼▼ Азы: «Албан-үндүрүг төлеп».}, бараан болзун. 12 А ол хоорай сээң саналдаан тайбыңыңдан ойталап, сээң-биле дайылдажы бээр болза, ону бүзээлеп ал. 13 Кажан Дээрги-Чаяакчы Бурганың ону сээң холуңга хүлээдип бээрге, ында чурттап турар шупту эр улусту хылыш-биле узуткап каг. 14 Чүгле херээженнерни, ажы-төлдү, мал-маганны болгаш хоорайда артып калган бүгү чүвени – шупту олча-тывышты бодуңга ап алгаш, Дээрги-Чаяакчы Бурганыңның сеңээ хүлээдип бергени дайзыннарыңдан алган олча-тывыжыңны ажыглап, эдиле ^e. 15 Ол дүрүм сенден дыка ыракта турар хоорайларга хамааржыр, а Ханаанда чурттап турар чоннарның хоорайларынга хамаарышпас.

16 А Дээрги-Чаяакчы Бурганыңның сеңээ оларның черин ээлеп аар кылдыр берип турары черде чоннарның хоорайларынга чаңгыс-даа дириг кижи арттырба, 17 Дээрги-Чаяакчы Бурганыңның сеңээ дужааганын ёзугаар, хет, амор, хананей, ферез, хиввей, иевус чоннарны бүрүнү-биле узуткап каг ^f; 18 ынчан олар боттарының бурганнарынга мөгеерде сагып турары чүдек-бужар ёзу-чаңчылдарынга сени өөредип шыдавас, а сен Дээрги-Чаяакчы Бурганыңның мурнунга бачыт үүлгетпес сен.

19 Кандыг-бир хоорайга удур дайылдажып, эжелеп аар дээш, ону үр үеде бүзээлээр болзуңза, хоорайны долгандыр үнген ыяштарже балды аннып, үреве; оларның чимизин чип болур-ла болгай, ынчангаш ужурба! ^g Шөлде үнген ыяш – кижи эвес-ле болгай, ону бүзээлеп, ооң-биле дайылдашкан херээ чүү боор ^{▼▼ Азы: «Ыяш сенден шивээже дезип кире берип шыдавас».}. 20 Чүгле чимистерин чемге хереглевес деп билириң ыяштарны үреп, ужургаш, сээң-биле дайын чорудуп турар хоорайга удур, ону чагырып алыры-биле, бүзээлел ажылдары кылып, ажыглап болур сен».