Deu 23 | TyvTUV | STEP | «Чуургаларын чуура бастырып алган азы эр сүрүзүн одура кестиртип алган кижи Дээрги-Чаяакчыга мөгеер ниитилелге каттыжып болбас .

‏ Deuteronomy 23

Израиль ниитилелге каттыжып болбас улус

1 «Чуургаларын чуура бастырып алган азы эр сүрүзүн одура кестиртип алган кижи Дээрги-Чаяакчыга мөгеер ниитилелге каттыжып болбас ^a. 2 Сурас бооп төрүттүнген ^{▼▼ Азы: «Хан холужуушкунундан төрүттүнген».} кижи Дээрги-Чаяакчыга мөгеер ниитилелге каттыжып болбас, ооң онгу салгал чедир үре-салгалы безин ол ниитилелге каттыжып болбас.

3 Аммон азы моав аймак-сөөктүг кижи Дээрги-Чаяакчыга мөгеер ниитилелге каттыжып болбас ^c, оларның онгу салгал чедир үре-салгалы безин кажанда-даа ол ниитилелге каттыжып болбас, 4 чүге дээрге Египеттен үнгеш, бар чыдырыңарда, олар сеңээ аъш-чем биле суг бээринден ойталап, хүндүлевээн-дир база сенче каргыш салдырар дээш Арам-Нахараимде Петор чурттуг Беорнуң оглу Валаамны сеңээ удур хөлезилеп алган-дыр ^d. 5 Ынчалза-даа Дээрги-Чаяакчы Бурганың Валаамның сөстерин хүлээвейн, ооң каргыжын сеңээ йөрээшкин кылдыр хуулдурупкан ^e, чүге дээрге Дээрги-Чаяакчы Бурганың сеңээ ынак болгай; 6 чурттап чоруур бүгү үеңде, кезээ мөңгеде ол чоннар-биле эп-найыралдашпа, оларга чаагай чорук күзеве.

7 А эдом чонну дора көрбе, ол сээң ха-дуңмаң болгай ^f; египет чонну дора көрбе, сен ооң черинге өскээртен келгеш, чурттап чораан болгай сен ^g. 8 Сээң-биле аралаштыр чурттап турар эдом болгаш египет улустуң үшкү салгалында төрүттүнер ажы-төл Дээрги-Чаяакчыга мөгеер ниитилелге каттыжып болур».

Турлагның арыг-шевери

9 «Дайзыннарыңга удур тулчуп үнгеш, кандыг-даа бак чүве кылырындан кичээнип чор. 10 Бир эвес дүне када кандыг-бир кижиниң үрези төгүлгеш, арыг эвес апарган болза, ол кижи турлаг даштынче үне бергеш, дедир кирбес ужурлуг ^h, 11 а кежээ дүжерге, сугга чунуп алзын, ынчан ол кижи хүн ажа бээрге, турлагже кирип кээп болур.

12 Албаннаар чериң турлагның даштынга турар ужурлуг. 13 Чепсээңден аңгыда, озук ап чоруур ужурлуг сен, турлаг даштынга албаннап олурар апаргаш, ооң-биле черге оңгар каскаш, кадыг албаныңны хөөп каар сен; 14 чүге дээрге Дээрги-Чаяакчы Бурганың сени камгалап, дайзыннарыңны сээң эргеңге хүлээдип бээр дээш, турлааңда чоруп турар болгай ⁱ, ынчангаш турлааң ыдыктыг болур ужурлуг, оон башка Ол сенде ыянчыг чүүл барын көрүп кааш, сени каапкаш баар».

Дургуннаан кулдар

15 «Бодунуң дээргизинден Израильче дургуннап келген кул кижини ооң дээргизинге эгитпе, 16 ол кул кижи израиль чоннуң аразынга, сээң хоорайларыңның кайы-бирээзинге – таарымчалыг деп көргеш, шилип алган черинге чурттазын, ону базынма».

Самыын-садар кижилер

17 «Израиль херээжен-даа, эр-даа улус аразындан дүрзү-бурганнарның өргээлеринде самыын-садар кижи турбас болзун ^j. 18 Кандыг-даа даңгырааң күүседип тура, самыын-садар херээженниң азы чүдек-бужар эрниң ажылдап алган төлевирин Дээрги-Чаяакчы Бурганыңның өргээзинге өргүл кылдыр салба, ол ийи самыын-садар чорук Дээрги-Чаяакчы Бурганыңга чүдек-бужар чүүл болур».

Хөө хуузу

19 «Чаңгыс аймак-сөөк ха-дуңмаңга хөө хуузу алыр сорулга-биле акша-мөңгүн, аъш-чем азы өске-бир чүве чегдирбе. 20 Даштыкы кижиден хөө хуузу ап болур сен, а бодуңнуң ха-дуңма чонуңдан хөө хуузу алба ^k, ынчан Дээрги-Чаяакчы Бурганың эжелеп аар дээш бар чыдарың черге кылыр бүгү чүвеңге ачы-буянын хайырлаар».

Даңгырактар

21 «Дээрги-Чаяакчы Бурганыңга даңгырак берип турар болзуңза, ону саадатпайн күүсет ^l, чүге дээрге Дээрги-Чаяакчы Бурганың ол дээш сенден негеп аар, күүсетпээн дээш, бачыт чүктээр сен. 22 А бир эвес даңгырак бербээн болзуңза, бачыт чүктевес сен. 23 Аксыңдан үнген сөзүңнү сагып, күүсет. Дээрги-Чаяакчы Бурганыңга эки тура-биле берген аксы-сөзүң ёзугаар күүседир ужурлуг сен».

Алыксак-чиксек болбазы

24 «Өске кижиниң виноград шөлүнче кирип келгеш, ооң чимизин мага хандыр, тоттур чип болур сен, а барба-саваңга чыгба.

25 Өске кижиниң тараа тараан шөлүнче кирип келгеш, тараа баштарын холуң-биле чулуп чип болур сен ^m, а дүжүдүн хол кадыыры-биле кеспе».