Deu 24 | TyvTUV | STEP | «Бир эр кижи кыс кижи-биле өгленчип, ону кадай кылып алган соонда, ооң бир-ле бужар чүвезин билип каапкаш, кадайынга таарзынмайн барып, аңаа чарлыр дугайында бижик бижээш, холунга тудускаш, ону бажыңындан чорудупкан дижик .

‏ Deuteronomy 24

Өгленчири болгаш чарлыры

1 «Бир эр кижи кыс кижи-биле өгленчип, ону кадай кылып алган соонда, ооң бир-ле бужар чүвезин билип каапкаш, кадайынга таарзынмайн барып, аңаа чарлыр дугайында бижик бижээш, холунга тудускаш, ону бажыңындан чорудупкан дижик ^a. 2 Демги херээжен кижи ашааның бажыңындан чоруй баргаш, өске эр кижи-биле өгленчип аарга, 3 ооң ол ашаа база аңаа хөңнү чок апаргаш, чарлыр дугайында бижик бижээш, кадайының холунга тудускаш, ону бажыңындан чорудупкан дижик азы ону кадай кылдыр ап алган ийиги ашаа өлүп калган дижик. 4 Ынчан ол херээженни чандырыпкан баштайгы ашаа ону катап кадай кылдыр ап ап шыдавас, чүге дээрге ол херээжен бужартай берген-дир – оларның катап чоокшулажыры Дээрги-Чаяакчының мурнунга чүдек-бужар чүве болур; Дээрги-Чаяакчы Бурганыңның сеңээ хуваап берип турар черин ынчалдыр бачыт-биле бужартатпа ^b.

5 Чоокта чаа кадайланып алган кижини шеригже албазын база аңаа кандыг-даа албан-хүлээлге дааспазын, ол эр кижи бажыңынга бир чыл дургузунда хостуг чурттап, алган кадайын хөглетсин ^c».

Ачы-дуза болгаш чөптүг чорук дугайында дүрүмнер

6 «Кандыг-бир кижиге чээлиге акша берип тургаш, долаа кылдыр ол кижиниң тараа дээрбелээр даштарын алба – шак ол даштар ооң амыдыралы-дыр.

7 Бодунуң ха-дуңма израиль чонунуң аразындан бир кижини оорлааш, ону кулу кылып алган кижи турар болза, ол ооржу кижини өлүрүп каар ужурлуг ^d; чон аразында бужар-бакты ынчаар узуткап каг.

8 Араңарга халдавырлыг кеш аарыы тыптып кээринден оваарныңар ^e, левит бараалгакчыларның өөредип турар бүгү чүүлдерин шыңгыы сагып, күүседиңер, мээң оларга айтып-чагааным ёзугаар хынамчалыг күүседиңер; 9 Египеттен кел чыдырыңарда, Дээрги-Чаяакчы Бурганыңның Мариамны канчалганын утпа ^f.

10 Өске-бир кижиге чээлиге акша берип турар болзуңза, долаа ап аар дээш ооң бажыңынче кирбейн, 11 даштыгаа манап тур, сенден чээли алган кижи долаазын боду үндүрүп бээр. 12 Бир эвес ол ядыы кижи болза, ооң долаа кылдыр берген хевин дедир бербейн, удуп чыдып алба, 13 харын ол кижи хеви-биле шуглангаш, удуп чыдып алзын; сени алгап-йөрээп кагзын дээш, ооң берген долаазын хүн ажар өйде эгидип бер ^g, ынчан Дээрги-Чаяакчы Бурганың сени чөптүг-шынныг кижи кылдыр санаар ^h.

14 Хөлечииң болур ядыы-түреңги кижиниң, ол кижи сээң израиль ха-дуңмаңның бирээзи-даа азы сээң чериңде, хоорайларыңның кайы-бирээзинде чурттап турар даштыкы кижи-даа болза, сеткилин хомудатпайн ⁱ, 15 аңаа ажыл төлевирин хүннүң-не, хүн ажар бетинде, төлеп берип тур ^j, чүге дээрге ол кижи ядыы болгаш, алыр төлевирин идегелдиг манап турар болгай, оон башка ол сеңээ хомудап, Дээрги-Чаяакчыны кыйгырарга, бачыт үүлгеткен деп санаттырар сен ^k.

16 Ада кижи ажы-төлүнүң кем-буруузу дээш өлүмге онаар кеземче албас ужурлуг, ажы-төл база адазы дээш өлүртпес ужурлуг; кижи бүрүзү чүгле бодунуң кем-буруузу дээш өлүртүр ужурлуг ^l.

17 Даштыкы кижиниң база өскүс кижиниң эргезин кызагдава ^m, дулгуяк херээженниң хевин долаа кылдыр алба. 18 Египетке кул болуп чорааныңны, Дээрги-Чаяакчының сени оортан адырып хостаанын утпа, ынчангаш мен сеңээ ол бүгүнү кылырын айтып-чагып тур мен.

19 Бодуңнуң чериңге дүжүт ажаап тура, шөлге бир моожаны көрбейн эрттирипкеш, ону ап, дедир келбе; ол тараа даштыкы кижиге, өскүс кижиге болгаш дулгуяк херээженге артып калзын ⁿ, ынчан Дээрги-Чаяакчы Бурганың кылып турарың кандыг-даа ажыл-херекке ачы-буянын хайырлаар. 20 Олива ыяштарының чимизин дүжүр шаап тура, будуктарда арткан чимистерни катап кээп, чыгба; олар сээң чуртуңда турар даштыкы кижиге, өскүс кижиге болгаш дулгуяк херээженге артып калзын. 21 Виноградың шөлүнден каттар ажаап ап тура, артып калган каттарны чедир чыгба; олар даштыкы кижиге, өскүс кижиге болгаш дулгуяк херээженге артып калзын. 22 Египет черге кул болуп чорааныңны утпа, ынчангаш мен сеңээ ол бүгүнү кылырын айтып-чагып тур мен».