‏ Deuteronomy 28

Хоойлуну дыңнааны дээш, чонга йөрээшкиннер

(Лев. 26:1-13; Ы. х. к. 11:13-15)

1«Бир эвес Дээрги-Чаяакчы Бурганыңның сөзүн тооп дыңнаар база бөгүн сеңээ айтып-чагып турарым Ооң шупту айтыышкыннарын күүседирин кызыдар болзуңза, Дээрги-Чаяакчы Бурганың сени чер-делегейниң шупту чоннарындан өрү көдүрүп каар a. 2Дээрги-Чаяакчы Бурганыңның сөзүн тооп дыңнаар болзуңза, бо йөрээшкин бүрүнү-биле сеңээ доктаап, сеңээ хамаарыштыр чогуп бүдер.

3Хоорайга-даа, шөлге-даа ачы-буянны алыр сен. 4Сээң ажы-төлүң болгаш чериңден үнер дүжүт, бода база шээр малыңның төлү хөй болур. 5Дүжүт чыыр аргаан хааржактарың, барба-саваң долу болур. 6Кылып турар бүгү чүүлүңге, бүгү үелерде ачы-буянга бүргеттирер сен b.

7Дээрги-Чаяакчы сенче халдап турар дайзыннарыңны сээң мурнуңга чылча шаап каар: олар сеңээ удур чаңгыс орук-биле тулчуп үнүп келгеш, чеди аңгы орук-биле дезип ыңай болур c.

8Дээрги-Чаяакчы сээң аңмаарларыңны долдуруп бээр, кылып турар кандыг-даа ажыл-херээңге чедиишкинниг болур сен; Дээрги-Чаяакчы Бурганыңның сеңээ берип турары черге ачы-буянны алыр сен d. 9Дээрги-Чаяакчы Бурганыңның айтыышкыннарын сагып, Ооң оруктары-биле чоруур болзуңза, Дээрги-Чаяакчы, сеңээ даңгыраглааны дег, сени Бодунга хамааржыр ыдыктыг чон кылдыр тургузуп каар e. 10Ынчан чер кырында шупту чоннар сээң Дээрги-Чаяакчыга хамааржырыңны дыңнап кааш, сенден корга бээр.

11Дээрги-Чаяакчы сеңээ бээр бооп ада-өгбеңге даңгыраглаан черинге элбек-чаагай чорукту: бодуңга эңдерик үре-төлдү, мал-маганыңга эңмежок төлдү, чериңге элбек дүжүттү хайырлаар. 12Дээрги-Чаяакчы сеңээ дээрниң эжиктерин – Бодунуң ачылыг эртине шыгжамырын ажыдып, сээң чериңге чаъсты чогуур өйүнде чагдырып бээр f база кылып турар шупту ажыл-херээңге ачы-буянын хайырлаар; хөй чоннарга чээлиге акша-хөреңги бээр сен, а бодуң олардан чегдинмес сен g.

13Бир эвес мээң бөгүн сеңээ сагып, күүседир кылдыр айтып-чагып турарым Дээрги-Чаяакчы Бурганыңның айтыышкыннарын тооп дыңнаар болзуңза, Дээрги-Чаяакчы сени кудурук эвес, баш кылып каар, адаанга эвес, кырынга турар сен. 14Чүгле мээң бөгүн сеңээ айтып-чагып турарым бүгү сөстерден оң-даа, солагай-даа талаже чайлава, өске бурганнар эдербе, оларга бараан болба».

Хоойлуга чагыртпааны дээш, чонга каргыштар

(Лев. 26:14-45)

15«Ынчалза-даа Дээрги-Чаяакчы Бурганыңның сөзүн тооп дыңнавас база мээң бөгүн сеңээ айтып-чагып турарым Ооң шупту айтыышкыннар, дүрүмнерин күүседирин кызытпас болзуңза, шупту бо каргыштар сеңээ доктаап, сени хөме таварыыр h.

16Хоорайга-даа, шөлге-даа каргаттырар сен. 17Дүжүт чыыр аргаан хааржактарың, барба-саваң каргаттырар. 18Үре-төлүң, чериңден үнер дүжүдүң, бода база шээр малыңның төлү каргаттырар. 19Кылып турар бүгү чүүлүң бүгү үелерде каргаттырар.

20Дээрги-Чаяакчы сенче, узуткаттырып каггыжеңге чедир, кылып турар кандыг-даа ажыл-херээңче каргышты, мөгүдээшкинни болгаш хайны салыр – Дээрги-Чаяакчыдан ойталааның дээш, бузуттуг херектериң уржуу-биле удавайн өлүп каар сен. 21Ээлеп чурттаар дээш кирип турарың черге Дээрги-Чаяакчы сенче, амы-тыныңны үзүп каггыжеге чедир, хамчык аарыгны салып кээр. 22Оон Дээрги-Чаяакчы сенче харыксырадыр аарыгны, халыынны, дегдирер аарыгны халдадыр i; сээң дүжүдүңче каңдаашкынны, өрттендир чип турар изиг хатты болгаш дүдүктү салыр j – ол бүгү айыыл-халап өлгүжеңге чедир сени истеп-сүрер. 23Сээң бажың кырында дээр демир дег, будуң адаанда чер чес дег апаар
Бо сөстерниң утказы мындыг: «Дээр силерже чаъзын чагдырбас, чер силерге дүжүдүн бербес» (Лев. 26:19 көр).
.
24Дээрги-Чаяакчы сээң чериңче чаъс-чаашкын орнунга дээрден элезин-довурак бадырар l – ол бүгү сенче амы-тының үзүлгүжеге чедир бадып кээр.

25Дээрги-Чаяакчы сени дайзыннарыңга аштырып аар кылдыр хүлээдип бээр: оларга удур чаңгыс орук-биле тулчуп үнгеш, олардан чеди аңгы орук-биле дезип ыңай боор сен m, бүгү чер-делегейниң күрүнелери сээң айыыл-халавыңны көргеш, „Дадайым!“дээр. 26Улузуңнуң мөчү-сөөгү дээрниң хамык куштарынга, черниң аң-араатанынга чемиш болур n, оларны ойладып-хойзур кижи тывылбас o.

27Дээрги-Чаяакчы сенче, египетчилерже дег, ириңниг балыгларны p, оюлганнаар кеш аарыын база янзы-бүрү хевирлиг кодурларны халдадыр – ол дээрге эмнеттинмес аарыглар болур. 28Дээрги-Чаяакчы сени солуудадыр, согурартыр болгаш аңгададыр; 29сен ынчан дал дүъште, караңгыда согур кижи дег, база суйбанып кылаштаар сен q; бүгү оруктарыңга чедимче чок болур сен, дайзыннар сени хүннүң-не кызып-кыйып, үптээр – сени кым-даа камгалавас.

30Херээжен кижи-биле дүгдежип аарыңга, өске эр кижи ооң-биле хойгажыр; бажың тудуп алгаш, аңаа чурттап шыдавас сен; виноград тарып алгаш, ону ажыглап шыдавас сен r; 31сен көрүп туруңда, бугаңны соп каарга, ооң эъдин чивес сен; элчигениңни хунаап аппаргаш, сеңээ дедир эгитпес; шээр малыңны дайзыннарыңга хүлээдип бээр – сени кым-даа камгалавас.

32Сээң оглу-кызыңны өске чоннар тудуп аппаар s, карактарың хүннү бадыр оларны дилегзинип көрдүнгеш, турлур деп баар, холдарың сула салдына бээр.

33Чериңге үнер дүжүттү, ажыл-ижиңниң бүгү үре-түңнелин сээң билбезиң чон былаап чиир, үргүлчү кыстыртып, хилинчектенир сен t. 34Карааң-биле көрүп турарың бүгү чүведен угааның солуудай бээр. 35Дээрги-Чаяакчы дискектериң биле чодаларыңче коргунчуг аарыг халдадыр – ол таваңгайыңдан тейиңге чедир бүгү бодуңну шыва аптар u.

36Дээрги-Чаяакчы сени база аңаа башкартыр дээш дүжүлгеге олуртуп алган хааныңны сээң-даа, ада-өгбеңниң-даа билбези черже аппаар v, аңаа баргаш, ыяш биле даштан кылган хары бурганнарга бараан болур сен w. 37Дээрги-Чаяакчының сени аппарып кааны черде бүгү чоннар сээң байдалыңны көргеш, коргуп-сестир, адыңны бужар үлегер-чижек кылдыр ажыглап, кочулап-шоодар x.

38Шөлүңге хөй үрезин тарып аар сен, а дүжүдүң эвээш болур y, чүге дээрге шартылаа чиптер z. 39Виноград шөлдериңге виноград тарып, болбаазырадыр сен, а арага ишпес сен, чимис чыып албас сен aa, чүге дээрге виноградты курт чиптер. 40Олива ыяштары сээң чериңге каяа-даа үнер, а ооң үзүн ажыглап шыдавас сен, чүге дээрге чимизи тоглап дүже бээр. 41Оглу-кызың төрүттүнер, ынчалза-даа чаныңга арттырып ап шыдавас сен, чүге дээрге оларны тудуп аппаар ab. 42Сээң хамык ыяштарың биле чериңде үнген бүгү дүжүдүңнү шерги узуткап каар. 43Чон аразында чурттап турар даштыкы кижи сенден арттыр депшип, улам-на өрү көдүрлүр, а сен улам-на куду бадар сен. 44Ол кижи сеңээ чээли бээр, а сен аңаа чээли бээр харык чок боор сен, ол – баш, а сен – кудурук болур сен.

45Сени узуткап каггыжеге чедир, шупту ол каргыштар сеңээ доктаап, сени таварыыр база истеп-сүрер, чүге дээрге Дээрги-Чаяакчы Бурганыңның сөзүн тооп дыңнавайн, Ооң сеңээ айтып-чагаан айтыышкын, дүрүмнерин сагывайн турган болгай сен. 46Ол каргыштар сеңээ база сээң үре-салгалыңга кезээ мөңгеде бадыткал демдээ база барымдаа болур.

47Дээрги-Чаяакчы Бурганыңга, бүгү чүве элбекшилдиг турда, эки тура-биле бараан болбааның дээш ac, 48Дээрги-Чаяакчының сеңээ удур салганы дайзыныңга бараан болуп, аштап-суксаар сен, кедер хеви чок, чүү-даа чүвези чок кижи болур сен; Дээрги-Чаяакчы, сээң амы-тыныңны үзүп каггыжеге чедир, мойнуңга демир хомут кедирип каар ad.

49Дээрги-Чаяакчы ырактан – чер-делегейниң кыдыындан – сеңээ удур чон көдүрүп эккээр ae, дылын билбезиң чон сенче эзир ышкаш шүүргедеп ужуп кээр af. 50Олар дээрге кадыг-дошкун шырайлыг, кырганнарны хүндүлевес, аныяктарны өршээвес улус болур. 51Ол чон сени хоозурадып каггыжеге чедир, мал-маганыңның төлүн база чериңге үнер дүжүттү чип кээр ag; сеңээ далган-тараа, арага, олива үзүн база бода-даа, шээр-даа малыңның төлүн арттырбас, сээң амы-тыныңны үзүп каггыжеге чедир, былаап ап кээр.

52Ол чон сээң идегеп турар бедик быжыг ханаларыңны бүгү чериңге үреп бузуп каггыжеге чедир, сени шупту хоорайларыңга кызып-кыйып, бүзээлеп кээр; Дээрги-Чаяакчы Бурганыңның сеңээ бергени бүгү черге, шупту хоорайларыңга дайзын сени кызып-кыйып, бүзээлээр ah. 53Сен ынчан дайзыныңга бүзээледип, кыстыргаш, бодуңнуң үре-төлүңнү, Дээрги-Чаяакчы Бурганыңның сеңээ бергени оглу-кызыңның эът-бодун чиир сен ai. 54Чон аразынга туразында, таалап чыргап чурттап чораан эр кижи ха-дуңмазы кижиже, эргим ынак кадайынче, артып алган ажы-төлүнче кам-хайыра чок көөр; 55бодунуң чип турары ажы-төлүнүң эът-бодун чоок улузунуң кайызынга-даа бербес, чүге дээрге дайзының сени шупту хоорайларыңга бүзээлеп, кызагдап кээрге, ол эр кижиниң чиир өске аъш-чеми чок болур. 56Чон аразынга туразында, таалап-чыргап чурттап чораан болгаш, будун безин черге дээспейн чораан херээжен кижи бодунуң эргим ынак ашаанче, оглу-кызынче кам-хайыра чок көөр; 57дайзының сени шупту хоорайларыңга бүзээлеп, кызагдап кээрге, чиир өске аъш-чем чогундан ол херээжен божуп алган чаш төлүн уруг сыртыы-биле кады бүдүү чип амыдыраар aj.

58Бо дүрүг номда бижиттинген бо хоойлунуң шупту сөстерин күүседирин кызытпас, Дээрги-Чаяакчы Бурганыңның алдарлыг болгаш сүрээденчиг адындан кортпас болзуңза, 59Дээрги-Чаяакчы сени база үре-салгалыңны анаа эвес айыыл-халап-биле үскүлештирер; Ооң сеңээ таварыштырар айыыл-халавы доктаамал база күчүлүг, аарыглары – хоралыг база доктаамал болур. 60Ол сенче Египетке көргениң, коргуп турарың шупту аарыг-аржыкты халдадыр, олар сеңээ чыпшына бээр ak. 61Дээрги-Чаяакчы сенче бо хоойлу номунда бижиттинмээн-даа янзы-бүрү аарыгларны, айыыл-халапты, амы-тыныңны үзүп каггыжеге чедир, халдадып кээр. 62Дээрде сылдыстар ышкаш хөй-даа болзуңарза al, дыка эвээжиңер дириг артып каар, чүге дээрге Дээрги-Чаяакчы Бурганыңарның сөзүн дыңнавайн турган болгай силер.

63Силерге буян көргүзүп, силерни өстүрүп-көвүдедип тура, Дээрги-Чаяакчының өөрүп турганы дег, силерни узуткап, кырып тура, Ол база өөрүүр am; 64Дээрги-Чаяакчы сени бүгү чоннар аразынга, чер-делегейниң бир кыдыындан өске кыдыынга чедир тарадып кааптар an, аңаа бодуңнуң-даа, өгбеңниң-даа билбес чорааны, ыяш биле даштан кылган хары бурганнарга бараан болур сен. 65Ол чоннар аразынга оожургал көрбес сен, будуң дыштандырар чер тыппас сен. Дээрги-Чаяакчы аңаа чүрээңни хөлзедип, дүвүредир, карааңны шыладып, баксырадыр, сеткил-хөңнүңнү муңгарадып, хилинчектээр; 66амы-тыныңга үргүлчү айыыл кыжаныр, дүне-даа, хүндүс-даа коргуп-дүвүрээр сен, „Амы-тынныг артар мен“деп бүзүрел чок болур сен. 67Коргуушкунга алыскаш, көрүп турар чүвеңден мөгүдээш, эртен: „Дүрген-не кежээ дүшкен болза!“, а кежээ: „Дүрген-не даң аткан болза!“– дээр сен ao. 68Мээң сеңээ: „Ону моон соңгаар көрбес сен“– дээним орук-биле ap Дээрги-Чаяакчы сени Египетче, корабльдарга олурткаш, дедир эккээр aq, аңаа бодуңарны эр, херээжен кулдар кылдыр дайзыннарыңарга садар дээриңерге, садып алыкчы тывылбас».
Copyright information for TyvTUV