Deu 29 | TyvTUV | STEP | Дээрги-Чаяакчының Моисейге израиль чон-биле, Хорив дагга чарганы чагыг-керээзинден аңгыда , моав черге чарарын дужааган чагыг-керээзиниң сөстери бо-дур.

‏ Deuteronomy 29

Моавка чагыг-керээни база катап чарганы

1 Дээрги-Чаяакчының Моисейге израиль чон-биле, Хорив дагга чарганы чагыг-керээзинден аңгыда ^a, моав черге чарарын дужааган чагыг-керээзиниң сөстери бо-дур.

2 Моисей бүгү израиль чонну чыылдырып алгаш, чугаалаан: «Дээрги-Чаяакчының египет черге, силер көрүп туруңарда, фараон-биле, ооң шупту дүжүметтери болгаш чурту-биле кылган бүгү чүүлүн көрген болгай силер: 3 ол өндүр улуг ялаларны, бадыткал демдектерин база кайгамчык чүүлдерни карааңар-биле көрген болгай силер; 4 ынчалза-даа Дээрги-Чаяакчы силерге бөгүнге чедир чүве билип алыр кылдыр угаан бербээн-дир, көөр кылдыр карак бербээн-дир, дыңнап алыр кылдыр кулак бербээн-дир ^b. 5 Ол: „Мен силерни дөртен чыл дургузунда ээн кургаг ховуга эдертип кээримге безин, мага-бодуңарда хевиңер-даа, будуңарда идииңер-даа элевээн болгай ^c; 6 ол үе дургузунда анаа эвес аъш-чемни-даа чиген, анаа эвес суксунну-даа ишкен силер ^d, ынчангаш Дээрги-Чаяакчы Бурганыңар – Мен дээрзин билип алган силер“– дээн болгай.

7 Бо черге чедип кээриңерге, Эсевоннуң хааны Сигон биле Васанның хааны Ог биске удур тулчуп үнүп кээрге, оларны чылча шаап каан бис ^e. 8 Оларның черин эжелеп алгаш, Рувимниң, Гадтың аймактарынга база Манассияның аймааның чартыынга хуваап берген бис ^f. 9 Ындыг болганда, бо чагыг-керээниң сөстерин сагып, күүседиңер, ынчан кылып турар бүгү чүүлдериңерге чедиишкинниг болур силер ^g.

10 Силер шупту бөгүн мында Дээрги-Чаяакчы Бурганыңарның мурнунда тур силер: аймактарыңар баштыңнары, даргаларыңар, удуртукчуларыңар, шупту эр израильчилер; 11 бичии ажы-төлүңер, алган кадайларыңар, турлааңарда силер-биле кады чурттап, ыяжыңар чарып, сууңар суглап берип турар даштыкы улус база мында тур ^h. 12 Израиль чон, сен мында Дээрги-Чаяакчы Бурганың-биле чагыг-керээ чарып, ону даңгырак-биле бадыткап турарың ол-дур. Дээрги-Чаяакчы Бурганың бөгүн сээң-биле керээ чарып, 13 сени Бодунуң чону кылып ап турар-дыр, Ол ам сээң Бурганың апаар-дыр ⁱ. Ол сеңээ ынчалдыр аазап, ада-өгбең болур Авраам, Исаак болгаш Иаков оларга ынчалдыр даңгыраглап турган болгай. 14 Даңгырак-биле бадыткаан шак бо чагыг-керээни чүгле силер-биле – 15 бөгүн мында Дээрги-Чаяакчы Бурганывыстың мурнунда мээң-биле кады турар улус-биле эвес, а бөгүн бистиң аравыста ам-даа төрүттүнмээн улус-биле база чарып тур мен.

16 Египет черге канчаар чурттап турганывысты, орук ара биске таварышкан чоннарның черин канчаар эрткенивисти билир болгай силер. 17 Ол чоннарның чүдек-бужар чүүлдерин – ыяш, даш, мөңгүн болгаш алдындан кылган дүрзү-бурганнарын көрген силер. 18 Бөгүн силерниң араңарга ол чоннарның бурганнарын эдерип, бараан болур дээш, Дээрги-Чаяакчы Бурганывыстан ойталап турар эр, херээжен кижи-даа, төрел бөлүк-даа, аймак-даа турбас болзун. Силерниң араңарга кандыг-даа оо-хоранныг, ажыг чашпан дазылданып үнмезин ^j. 19 Ындыг кижи ол даңгырактың сөстерин дыңнап кааш, сеткил-хөңнүнге бодун алгап-йөрээп: „Бодум турам-биле-даа чурттап чорааш, амыр-чыргалдыг болур мен“– дээр болза, ол бак кижи бодун-даа, өске улусту-даа айыыл-халапче киирер ^{▼▼ Еврей сөзүглелде бо домактың утказы эки билдинмес. Дорт очулдурарга, «Ынчан өл кижини кургаг кижи-биле кады чууй шаап алгаш баар» дээн.}. 20 Дээрги-Чаяакчы ындыг кижиге өршээл көргүспес, харын Ооң килеңи кыптыгып, аңаа дыка хорадаар база бо номда бижиттинген шупту каргыш ол кижиниң кырынга дүжер, Дээрги-Чаяакчы ооң адын чырык чер кырындан балап кааптар ^l. 21 Дээрги-Чаяакчы ол кижини шак бо хоойлу номунда бижиттинген чагыг-керээниң хамык каргыштарын ёзугаар Израильдиң шупту аймактарындан аңгылап, бак аажылаар.

22 Дараазында салгал, силерниң сооңарда чурттаар ажы-төлүңер база ырак чурттан чедип кээр даштыкы кижи бо черниң айыыл-халавын, Дээрги-Чаяакчының аңаа халдаткан аарыгларын көргеш: 23 „Күгүр, дуска бүрүнү-биле чирткен ^m, өрттенип калган чер-дир, тараа тарывастаан, дүжүт бербестээн, кандыг-даа оът-сиген өзүп үнмес апарган чер-дир; Дээрги-Чаяакчы килеңнеп хорадааш, таптай базып каапкан Содом, Гоморра, Адма болгаш Цевоим хоорайларның узуткаттырган үезинде дег хоозураан чер-дир“– дээр ⁿ.

24 Бүгү чоннар: „Дээрги-Чаяакчы бо черни чүү дээш ынчаар бак аажылааны ол? Чүү дээш ынчаар килеңнээни ол?“– деп айтырар ^o. 25 Оларга харыы бо-дур: „Чүге дээрге бо чон ада-өгбезиниң Бурганы Дээрги-Чаяакчының оларны Египеттен үндүре бергеш, олар-биле чарган чагыг-керээзинден ойталаан-дыр ^p. 26 Олар барып, хары бурганнарга бараан болуп, ооң мурнунда билбес турганы, Дээрги-Чаяакчының оларга үлүг кылдыр бербээни бурганнарга мөгейип турганнар. 27 Ол бүгү дээш, Дээрги-Чаяакчының килеңи бо черже кыптыга берген. Ол ынаар бо номда бижиттинген хамык каргыштарны салыпкан ^q. 28 Дээрги-Чаяакчы килеңнеп, кылыктанып, аажок хорадааш, оларны боттарының чуртунга дазылындан тура тырткаш, өске черже шөлүпкен-дир ^r. Ам ынчалдыр бүткен-даа-дыр“.

29 Чажыт чүве Дээрги-Чаяакчы Бурганывыска хамааржыр ^s, а Ооң ажыдып берген чүвезин биске болгаш үре-салгалывыска, ол хоойлунуң шупту сөстерин күүсетсин дээш, кезээ мөңгеде дамчыдып берген».