Deuteronomy 34
Моисейниң мөчээни
1 Моавтың ховуларындан Моисей Нево дагже, Иерихон хоорайның дужунда турар Фасги сынның шыпшык бажынче үне берген. Дээрги-Чаяакчы аңаа бүгү чуртту: Галаадтан Дан хоорайга чедир черни; 2Неффалимниң бүгү черин, Эфрем биле Манассияның черлерин база Иуданың бүгү черин мырыңай Барыын далайга чедир; 3оон Негев ховузу, Пальмалар хоорайы Иерихондан a Сигор хоорайга чедир b Төгерик шынааны c көргүскен. 4Оон Дээрги-Чаяакчы Моисейге: «„Бо черни силерниң үре-салгалыңарга бээр мен“– деп Авраам, Исаак болгаш Иаков оларга бээр бооп даңгыраглаан черим бо-дур d. Мен сеңээ ону карааң-биле көөр арганы бердим, ынчалза-даа сээң будуң ынаар киир баспас e» – дээн. 5Дээрги-Чаяакчының чалчазы Моисей аңаа, моав черге, Дээрги-Чаяакчының чугаалаанын ёзугаар мөчээн. 6Ону Бет-Фегор хоорайның дужунда шынаада, моав черде хөөржүткен база ооң чевээ кайда дээрзин бөгүнге чедир кым-даа билбес f. 7Моисей 120 харлыында мөчээн g, өлүрүнге чедир ооң карааның шоозу баксыраваан, күш-шыдалы сулараваан. 8Израиль чон Моавтың ховуларынга Моисейниң ажыын ажып, үжен хүн ыглап-сыктап келген h. Моисейниң ажыын ажыырының хүннери эрте бээрге, 9бодунуң соон салгаар кылдыр Моисейниң томуйлап кааны i Нуннуң оглу Иисус мерген угаанга бүргедипкен j. Израиль чон аңаа чагыртып эгелээш, Дээрги-Чаяакчы Моисейге канчаар дужааганыл, ынчаар кылып турган. 10– 11Оон бээр Израильге Моисей ышкаш Бурганның медээчизи кажан-даа турбаан. Дээрги-Чаяакчы ооң-биле удур-дедир көржүп, таныжар турган k. Ол ону египет черже – фараонга, ооң дүжүметтеринге база бүгү египет чуртка удур бадыткал демдектери биле кайгамчык чүүлдер кылзын дээш – чорудупкан. 12Чүгле Моисей ындыг быжыг холдуг турган, чүгле ол ындыг коргунчуг чүүлдерниң шуптузун бүгү израиль чон көрүп турда кылып шыдаан.
Copyright information for
TyvTUV