Ecc 1 | TyvTUV | STEP | Давидтиң оглу, Иерусалимге хааннаан Суртаалчының сөстери.

‏ Ecclesiastes 1

1 Давидтиң оглу, Иерусалимге хааннаан Суртаалчының ^a сөстери.

Бүгү чүве хоозун куруг

2 – Хоозун куруг чүве-дир – деп, Суртаалчы чугаалап каан. – Хоозундан хоозун чүве-дир, бүгү чүве хей-бус ышкаш! ^b

3 Чырык черге кылып чораан бүгү-ле ажыл-ижинден кижи кандыг ажык-дүжүк алырыл че? ^c 4 Салгалдар эртип-ле турар, салгалдар кээп-ле турар, а чер-делегей мөңге шагда туруп-ла турар ^d. 5 Хүн үнүп-ле турар, хүн ажып-ла турар, оон база катап үнер черинче эгиштеп бар-ла чыдар ^e. 6 Хат мурнуу чүкче углай үнгеш, соңгу чүкче ээп – ол-ла хевээр дескинип-ле, дескинип-ле, бодунуң долганчак оруктарынче дедир эглип кээп-ле турар. 7 Бүгү-ле хемнер далайже агып чыдар ^f, ынчалза-даа далайның эриин ажыр долбас, а хемнер киир агып чыдар черинче агып-ла, агып-ла чыдар ^{▼▼ Азы: «А хемнер боттарының үнген черинче, оон катап-ла агып бадар дээш, дедир эглип кээп-ле турар».}. 8 Бүгү чүве ол хире шыланчыг, кижи ону илередип-даа шыдавас; ынчалза-даа карак көргеш-даа, көрүп ханмас ^h, кулак дыңнааш-даа, дыңнап пөкпес.

9 Турган чүве туруп-ла турар, болуп турган чүүлдер болуп-ла турар ⁱ, чырык черде чаа чүү-даа чок. 10 Чамдыкта улус бир-ле чүве дугайында «Көрем, бо чаа чүүл-дүр» дижи бээрлер, ынчалза-даа ол чүүл бистиң мурнувуста эрткен эрте-бурунгу үелерде-ле турган база болуп каапкан боор. 11 Эрткен үеде болуп турган чүүлдерни кижилер уттупкан, а ам болур чүүлдерни ооң соонда чедип кээр улус база ол ышкаш уттуптар ^j.

Мерген угаанның хоозуну

12 Мен, Суртаалчы, Иерусалимге Израильдиң хааны тургаш, 13 бо өртемчейде болуп турар бүгү-ле чүүлдерни мерген угаан-биле шинчилээринче болгаш шенеп көөрүнче чүрээмни угландырдым. Кижи бодунуң күжүн үндүрүп чорзун дээш, кайы хире берге үүлени Бурган кижи төрелгетенге онаап каан-дыр! ^k 14 Чырык черде дойлуп турар бүгү-ле ажыл-херекти көрүп келдим: бүгү чүве хоозун куруг чүве-дир, түңнел чок күжениишкин-дир ^{▼▼ Түңнел чок күжениишкин – еврей сөзүглелде бо сөстерниң утказы эки билдинмес. Болгу дег өске уткалары мындыг: «Сагыш човаа», «Хатты кадарары».}. 15 Ыргак чүүл дорттаттынмас ^m база чок чүүл санаттынмас.

16 Ынчан мен сагыш-чүрээмде: «Мээң мурнумда Иерусалимге хааннап чорааннарның аразындан тергиидеп, мерген угаан талазы-биле дөгерезин аштым ⁿ, мерген угаанны-даа, билиглерни-даа мээң чүрээм хөйнү көрген» дидим. 17 Мерген угаанны-даа, мугулай болгаш тенек угаанны-даа шинчилеп билип алырынче чүрээмни угландырып чорааш, ол бүгү база-ла түңнел чок күжениишкин дээрзин билдим. 18 Чүге дээрге улуг угаанда улуг муңгарал бар-дыр база угаан-билигни көвүдедип чоруур кижи ундаралды көвүдедип чоруур-дур ^o.