Ecc 3 | TyvTUV | STEP | Бүгү чүве өйлүг-шактыг база бо өртемчейде бүгү-ле чүүлге үе турар.

‏ Ecclesiastes 3

Өй-шак Бурганның холунда

1 Бүгү чүве өйлүг-шактыг база бо өртемчейде бүгү-ле чүүлге үе турар.
2 Төрүүр-даа үе турар,
өлүр-даа үе турар ^a;
тарыыр-даа үе турар,
тарып каан чүүлдү тура тыртар-даа үе турар;
3 өлүрер-даа үе турар,
эмнээр-даа үе турар;
бузуп үрегдээр-даа үе турар,
тудуп кылыр-даа үе турар;
4 ыглаар-даа үе турар ^b,
каттырар-даа үе турар;
кажыыдаар-даа үе турар,
хөглээр-даа үе турар;
5 даштарны тарадыр октаар-даа үе турар,
даштарны чыыр-даа үе турар ^{▼▼ Бо сөстер тараажының шөлде ажылын көргүскен бооп болур (Иса. 5:2 көр).};
куспактаар-даа үе турар,
куспактаашкындан ойлаар-даа үе турар;
6 дилээр-даа үе турар,
чидирер-даа үе турар;
кадагалаар-даа үе турар,
үндүр октаар-даа үе турар;
7 ора тыртар-даа үе турар ^d,
тудуштур даараар-даа үе турар;
ыыттавас-даа үе турар ^e,
чугаалаар-даа үе турар;
8 ынакшыыр-даа үе турар,
көөр хөөн чок боор-даа үе турар;
дайылдажыр-даа үе турар,
тайбың чурттаар-даа үе турар.

9 Ынчангаш иженип чоруур кижи кылган чүүлүнден кандыг ажык-дүжүк алырыл че? ^f 10 Кижи күжүн үндүрзүн дээш Бурганның кижи төрелгетенге онаап кааны берге үүлезин көрдүм ^g: 11 Бурган бүгү чүвени чогуур үеде кайгамчык эки боор кылдыр кылып каан, кижи амытанга мөңге өй дугайында бодап чоруур чүректи берип каан. Ындыг-даа болза, кижилер Бурганның кылып турар ажыл-херээн эгезинден төнчүзүнге чедир билип шыдавас ^h. 12 Ынчангаш оларга өөрүп-хөглээринден болгаш чуртталгазында буян кылырындан ^{▼▼ Азы: «Оларга өөрүп-хөглээринден болгаш чуртталгага таалаарындан».} дээре чүве чок-тур дээрзин угаап билдим ^j. 13 База бир эвес кандыг-бир кижи аштанып-чемненип-даа, бодунуң кандыг-даа ажыл-ижинден таалал ап чоруур болза, ол дээрге Бурган хайыразы-дыр ^k. 14 Бурганның кылып турар бүгү-ле чүүлү мөңгеде турар дээрзин угаап билдим; аңаа чүү-даа немээр аргажок база оон чүү-даа казыыр аргажок; улус Бургандан кортсун дээш, Ол ынчаар кылып турар. 15 Ам бар чүүлдер мооң мурнунда-ла турган, моон соңгаар болур чүүлдер бо үеде болуп турар ^l. Бурган эрткен үени ээлдириптер болгай ^{▼▼ Еврей сөзүглелде бо домактың утказы эки билдинмес. Болгу дег өске утказы мындыг: «Бурган эрткен үени харыы тудар кылдыр кыйгырар».}.

Өлүм шупту чүвени деңнеп турар

16 Чырык черде оон өске көргеним бо: шииткел черинде-даа бузут бар болду, чөптүг-шынныг чорук турар ужурлуг черде-даа бузут бар болду. 17 Ынчан мен сагыш-чүрээмде: «Чөптүг-шынныг-даа кижини, бузуттуг-даа кижини Бурган сайгарып шиидер-дир ⁿ, чүге дээрге бүгү-ле чүүлге база кандыг-даа ажыл-херекке үе Ооң холунда-дыр» деп чугааландым. 18 Кижи төрелгетенниң дугайында сагыш-чүрээмде: «Олар боттары мал-маган бис дээрзин ^o билзиннер дээш, Бурган оларны шылгап турар-дыр» деп чугааландым. 19 Чүге дээрге кижи төрелгетенниң хуу-салымы-даа, мал-маганның салым-хуузу-даа – чаңгыс салым-хуу-дур ^p; оларның өлүрү ышкаш, демгилери база өлүп турар, шуптузунуң тыныжының дөзү чаңгыс-тыр. Кижиниң мал-магандан дээредээр чүзү-даа чок-тур; чүге дээрге бүгү чүве – хоозун куруг чүве-дир! 20 Бүгү-ле дириг чүве чаңгыс черже чоруп турар, олар шуптузу довурак-доозундан тыптып келген база довурак-доозунче катап эгли бээр ^q. 21 Кижи төрелгетенниң сүлде-сүнезини өрү үнүп турар бе, дириг амытаннарның сүлде-сүнезини черже бадып турар бе? – ону кым билир боор. 22 Ынчангаш кижиге бодунуң ажыл-ижи дээш өөрүп чыргаарындан дээре чүве тывылбас-тыр дээрзин көрдүм ^r; кижиниң үлүг-хуузу ындыг-дыр, а ооң соонда чүү болурун көөр арганы аңаа кым бээр деп?