Ecc 4 | TyvTUV | STEP | Эргий көргеш, чырык черде үүлгеттинип турар бүгү-ле базымчаны көрдүм : базындыртканнарның караа чаштыг, а оларны аргалаар кижи чок ; дарлакчыларның холунда эрге-күш бар-дыр, а дарлатканнарны аргалаар кижи чок-тур .

‏ Ecclesiastes 4

1 Эргий көргеш, чырык черде үүлгеттинип турар бүгү-ле базымчаны көрдүм ^a: базындыртканнарның караа чаштыг, а оларны аргалаар кижи чок ^b; дарлакчыларның холунда эрге-күш бар-дыр, а дарлатканнарны аргалаар кижи чок-тур ^c. 2 Ынчангаш мен чок апарган улусту ам чурттап чоруур улустан артык экизиндим ^d, чүге дээрге өлүглерниң чуртталгазы төнген-дир. 3 А оларның кайызындан-даа дээре салым-хуу – ам-даа төрүттүнмээн, чырык черде дойлуп турар каржы-дошкун херектерни көрбээн кижиде боор чүве-дир ^e.

4 Оон аңгыда кандыг-даа ажыл-иш болгаш кандыг-даа чедиишкин кижилер аразында адааргалдан үнүп турарын ^{▼▼ Азы: «Кижилер аразынга адааргалды тывылдырып турарын».} база көрдүм. Ол база-ла – хоозун куруг чүүл болгаш түңнел чок күжениишкин-дир. 5 Мугулай кижи чудуруун чудук адаанче суп алгаш, бодунуң бажын чип чоруур-дур дээрзи шын ^g. 6 Ындыг-даа болза, ажыл-иш болгаш улуг күжениишкин-биле чедип алган ийи адыш хиреден амыр-дыштыг оргаш алган чаңгыс адыш хирези дээре ^h.

Чааскаан болуру – берге үүле

7 Эргий көргеш, чырык черде оон-даа өске хоозун куруг чүүлдү көрдүм. 8 Бир кижи чааскаан, ооң чанында кым-даа чок, ооң оглу-даа, ха-дуңмазы-даа чок дижик; а ооң бүгү-ле ажыл-ижи төнчү чок, бай-байлаанга ооң караа тотпайн чоруур ⁱ. Ол кым дээш-ле иженип база сеткилинге чыргал көргүспейн чоруурул? Ол база-ла хоозун куруг чүүл болгаш берге үүле-дир.

9 Чаңгыс боорундан эштиг болганы дээре, чүге дээрге ийи кижиниң ажыл-ижи эки түңнелдиг. 10 Чүге дээрге олар барып дүжер болза, бот-боттарын көдүржүп аар. А чаңгыс кижи барып дүжер болза база ону көдүрүп каар эжи чок болза, ат болганы ол. 11 База ол ышкаш ийи кижи кады чыдар болза, оларга чылыг ^j; а чаңгыс кижи канчап чылыгып аарыл? 12 База ол ышкаш чаңгыс кижини ажып-тиилеп ап болур болза, ийи кижи алыспайн баар. База ол ышкаш үш каът кылдыр ээрип каан удазын белен үзүлбес.

13 Арга-сүме хүлээп билбес, кырган-даа бол, угаан чок хаандан ядыы-даа бол, угаанныг аныяк оол дээре. 14 Чүге дээрге ол хаанның үезинде демги оол ядыы бооп төрүттүнген-даа болза, кара-бажыңдан үнгеш, хааннай берген ^k. 15 Чырык черде кылаштап чоруур бүгү-ле дириг улус демги хаанның орнун ээлээр амдыы оолактың талазында дээрзин база көрдүм. 16 Ындыг-даа болза, оларның мурнунда хааннап чораан улусту санап четпес, а келир салгалдар ол оолакты магадавас ^{▼▼ Еврей сөзүглелде 13-16 шүлүктерниң утказы эки билдинмес. 16-гы шүлүктүң болгу дег өске утказы мындыг: «Ону эдерген чонну санап четпес болду, ынчалза-даа соонда келгеннери ону магадавас».}. Ол база-ла хоозун куруг чүүл болгаш түңнел чок күжениишкин-дир.

Бурган мурнунга хей даңгырактың хоозуну

17 Бурганның өргээзинче кел чыда, базымыңны кичээп хына ^m. Мугулайлар ышкаш, чүгле өргүл кылыр дээш эвес, а эки дыңнап аар дээш келгениң дээре ⁿ. Чүге дээрге шын эвес кылып турарын олар боттары билбес-тир ^o.