Ecc 12 | TyvTUV | STEP | Аныяк-чалыы назыныңда Чаяакчыңны утпайн чор. Ооң соонда аар-берге хүннер база «Олардан меңээ таалал чок-тур» дээриң чылдар чедип кээр ;

‏ Ecclesiastes 12

1 Аныяк-чалыы назыныңда Чаяакчыңны утпайн чор. Ооң соонда аар-берге хүннер база «Олардан меңээ таалал чок-тур» дээриң чылдар чедип кээр ^a; 2 ынчан хүн болгаш чырык, ай болгаш сылдыстар өже бээр, база чаъс соонда чаа булуттар диргелип кээр ^b.

3 Ынчан бажыңның таңныылдары сириңейни бээр, күштүглер күдүгүр апаар, дээрбениң ажылчыннары эвээш артканындан дээрбелевейн баар, а соңгаже көргеннерге караңгы апаар ^{▼▼ Бо шүлүктерниң чамдык овур-хевирлериниң утказы эки билдинмес. Мында кырган кижиниң мага-бодун элдээрткен чадавас.}. 4 Дашкаар үнер ийи эжииң ^d хагдына бээр база дээрбе даажы дыңналбайн баар ^e; куштуң бир дугаар алгызындан-на оттуп кээр апаар сен, ырлаар кыстар шупту ыытташпайн баар. 5 Бедик черлерден коргар апаар сен, а оруктарны айыыл долган ышкаш апаар, миндаль ыяжы чечектели бээр ^{▼▼ Миндаль ыяжы – ооң чечектери ак өңнүг, ынчангаш баш дүгүнүң агара бээриниң дугайында элдээрткен чадавас. Бо домактың болгу дег өске утказы мындыг: «Миндаль тооруунуң амданы билдинмес апаар».}; шерги шимченгир эвес апаар база каперс ^{▼▼ Каперс дээр үнүштү чемге амдан киирер база эр кижиниң төл төрүдер күжүн көвүдедир холуксаа кылдыр ажыглап турган.} дээштиг эвес апаар. Оон кижини ооң мөңге бажыңынче аппар чыдар ^h, а ыглаан-сыктаан улус ону долганып, кудумчуда бар чыдар.

6 Ынчан мөңгүн илчирбежигеш үстү бээр, база алдын аяк чарлы бээр, база суг бажының чанында доңга бусту бээр, кудуктуң кочал тыртып долгаар дугую үрели бээр ⁱ; 7 довурак-доозундан чаяаттынган кижи ^j черже катап эглип, биеэги хевээр довурак апаар ^k, а амыдыралдың тыныжы ону берген Бурганче катап эгли бээр ^l.

8 Хоозундан хоозун чүве-дир – деп, Суртаалчы чугаалап каан. – Бүгү чүве хей-бус ышкаш! ^m

Түңнел сөс

9 Мерген угаанныг боорундан аңгыда, Суртаалчы чонну билигге өөредип чораан. Ол хөй-ле угаадыглыг чугааларны деңзигүүрлей хынап шинчилеп база чогаадып чораан ⁿ. 10 Суртаалчы чечен сөстерни дилеп тып чораан база шынның сөстерин чиге бижип каан. 11 Мерген угаанныгларның сөстери – мал сүрүкчүзүнүң шиш баштыг ыяжы дег база чыып каан угаадыглыг чугаалары – чаңгыс Кадарчыдан ^o келген кадап каан өргеннер дег.

12 А оон аңгыда моон оваарнып чор ^{▼▼ Азы: «А ол бүгүнүң кырынга немешкен өөредиглерден оваарнып чор».}, оглум: хөй номнар бижиирге, төнчү турбас, база хөлүн эрттир номнар шинчилээрге, мага-ботка шыланчыг ^q. 13 Бүгү чугаа төнген, түңнели бо-дур: Бургандан коргуп, Ооң айтыышкыннарын сагып чор ^r, чүге дээрге кижиге херек-ле чүве ол. 14 Чүге дээрге бүгү-ле ажыл-херектер дээш, бүгү-ле чажыртынган чүүлдер дээш ^s – ол бүгүнүң экизин, багайын тодарадып – Бурган кижилерден харыы негээр ^t.