Ecc 7 | TyvTUV | STEP | Чаагай ат-алдар чаагай чыттыг үстен дээре база өлүм хүнү төрүттүнген хүнден дээре .

‏ Ecclesiastes 7

1 Чаагай ат-алдар чаагай чыттыг үстен дээре ^a база өлүм хүнү төрүттүнген хүнден дээре ^b.

2 Найыр-дой болуп турар черже баарының орнунга, качыгдалдың ыы-сыызы дыңналып турар черже барганы дээре, чүге дээрге кижи бүрүзүнүң төнчүзү ындыг, дириг кижи ону чүрээнге шыгжап алзын ^c. 3 Каткыдан муңгарал дээре, чүге дээрге муңгаргай арындан угаан-чүрек экижиир ^d. 4 Мерген угаанныгларның чүрээ – качыгдалдың бажыңында, а мугулайларның чүрээ – хөглээшкин бажыңында.

5 Мугулайларның ырын дыңнаарындан мерген угаанныгның чемезин дыңнааны дээре ^e. 6 Чүге дээрге мугулайларның каткызы – паш адаанда отта хараган будуктарының дызыраажы-дыр. Ол база-ла хоозун куруг чүүл-дүр!

7 Базымча мерген угаанныг кижини мугулай кылып каар база хээли сеткил-чүректи сандарадып үрээр ^f.

8 Ажыл-херектиң төнчүзү ооң эгезинден дээре; шыдамыккай сеткил улуургак сеткилден дээре ^g. 9 Сеткил-хөңнүң-биле кылыктанырынче далаш болба; чүге дээрге кылык мугулайларның хөрек-чүрээнде турумчуп чоруур.

10 «Чүге эрткен үе амгы үеден дээре чүвел?» диве; сен улуг угаанныг болзуңза, ындыг айтырыг салбас сен.

11 Чырык хүннү көрүп чоруурларга мерген угаан биле өнчү-хөреңги кады бар болза, эки; кайызы-даа ажык-дүжүктүг. 12 Чүге дээрге мерген угаанның чаглааның адаанга турары акша-мөңгүннүң чаглааның адаанга турары-биле дөмей; ынчалза-даа угаан-билигниң дээрези – ооң эдилекчизиниң амы-тынын камгалаарында.

13 Бурганның кылып турар ажыл-херээнче көрүп көр: Ооң ыргайтып каан чүүлүн кым дортайтып шыдаарыл? ^h 14 Менди-чаагай хүннерде аас-кежиктиг бол, а берге хүннерде мону бодан: кижи амытан бодунуң соонда чүү болурун билбес болзун дээш ^{▼▼ Азы: «Кижи амытан Бурганны буруудадып шыдавас болзун дээш».}, Бурган оларның кайызын-даа тургузуп каан.

Мерген угаан, чөптүг-шынныг чорук болгаш бачыт

15 Хоозун куруг чүүл долган назынымда чүнү-даа көрүп келдим: чамдык улус чөптүг-шынныг-даа болза, өлүп каар-дыр, чамдык улус бузуттуг-даа болза, үр чурттап чоруур-дур ^j. 16 Бодуңну хөлүн эрттир чөптүг-шынныг кылдыр-даа, хөлүн эрттир мерген угаанныг кылдыр-даа алдынма; бодуңну чок кылдырган херээң чүл? 17 Хөлүн эрттир бузуттуг болба база мугулай болба: эрте дээре өлген херээң чүл? ^k 18 Бир эвес бирээзинден туттунгаш, өскезинден база холуң ыратпас болзуңза, ол эки; Бургандан коргар кижи оларның кайызынче-даа чайлы бербес.

19 Угаанныг кижини мерген угааны хоорайның он чагырыкчызындан-даа күштүг кылыптар ^l.

20 Бачыт кылбайн, чүгле буян кылып чоруур чөптүг-шынныг кижи чер кырында чок ^m. 21 Улустуң чугаалап турары сөс бүрүзүн-не сүрүп коптарба, оон башка бодуңнуң чалчаң сени бактап турарын дыңнай бээр сен ⁿ. 22 Чүге дээрге сен бодуң улусту бактап турганың хөй таварылгаларны сээң чүрээң билир болгай.

23 Ол-ла бүгүнү мерген угааным-биле шылгап хынаан мен, бодумга «Мерген угаанныг болуйн» дээн мен, ынчалза-даа мерген угаан менден ырак-тыр. 24 Болуп турар бүгү чүвениң утказы ырак-ла-дыр база ханы-ла-дыр: кым ону тып, угаап билип шыдаарыл? ^o

Херээжен кижи дугайында

25 Мерген угаанны илередип тып, бодамчалыг чорукту шинчилеп билип аарынче, угаан-билиг чок мугулай болгаш бузуттуг чорукту угаап билип аарынче чүрээмни угландырдым ^p. 26 Түңнелинде илередип тыпканым бо-дур: херээжен кижи өлүмден дора айыыл-дыр ^q, чүге дээрге ол – четки-дир, ооң чүрээ – дузак-тыр, холдары – кинчилер-дир; Бурганга таарымчалыг кижи оон ойлай бээр, а бачыттыг – аңаа туттурар ^r. 27 – 28 Мээң илереткен чүүлүм бо-дур, көрүңер: бодамчалыг чорукту улаштыр дилевишаан, бүгү чүвени ^{▼▼ Азы: «Херээженнерниң шуптузун».} дес-дараалай шенеп шинчилээш, ону тыппадым – деп, Суртаалчы чугаалаан. – Муң кижиниң аразындан бодамчалыг чаңгыс эр кижини тыптым, а ындыг херээжен кижини улус аразындан шуут тыппадым. 29 Бурган кижилерни чөптүг-шынныг кылдыр чаяап каан-дыр, а олар хөйнү күзеп, дилеп эгелээн-дир ^t – шак-ла мону илередип тып, угаап билдим.