Ecc 8 | TyvTUV | STEP | Мерген угаанныг кижиге кым деңнежирил база чүвениң алыс утказын кым билир боор. Кижиниң мерген угааны ооң арнын чырыдып, кадыг шырайын чымчадып турар.

‏ Ecclesiastes 8

Эрге-күш дугайында

1 Мерген угаанныг кижиге кым деңнежирил база чүвениң алыс утказын кым билир боор. Кижиниң мерген угааны ооң арнын чырыдып, кадыг шырайын чымчадып турар.

2 Бурганга берген даңгырааңны бодааш, «Хаан чарлыын сагып чор» деп чугаалап тур мен ^a. 3 Хаандан ыраар деп далашпа ^b база багай херектерге болушпа; чүге дээрге ол чүнү күзээр-дир, дөгерезин кылып шыдаар. 4 Хаанның сөзү эрге-күштүг; база аңаа «Ол чүнү канчап турарың ол?» деп кым чугаалаар боор ^c. 5 Айтыышкынны сагып чоруур кижи кандыг-даа багай чүүлче чоокшулавас: мерген угаанныгның чүрээ шын үе-хуусааны-даа, шын арга-хорганы-даа билир. 6 Чүге дээрге бүгү-ле чүүл үе-хуусаалыг база арга-хоргалыг, а кижиге ол улуг айыыл-дыр, 7 ол оон чүү болурун билбес; база ону аңаа кым чугаалап бээрил? 8 Кижиде хат-салгынны туткаш, салбайн баары дег, өлүр хүн-шагының бажын билир эрге-күш чок, демиселден ол хосталып-даа шыдавас, а бузуттуг кижини ооң бузуду камгалап-даа шыдавас. 9 Кижи кижини чагырып, аңаа хора чедирип чоруур шагда ^d, чырык черде дойлуп турар бүгү-ле херектерни чүрээм-биле сайгарып бодап чорааш, бо бүгүнү көрдүм.

Салым-чолдуң тывызыы

10 Улус бузуттугларны хөөржүдүп кааш, ыдыктыг черден ырай бергеш, демгилерниң бак үүлгедиглер кылып чорааны хоорайынга оларны мактап турарын ^{▼▼ Еврей сөзүглелде бо домактың утказы эки билдинмес. Өске бурунгу сөзүглелде «мактап турарын» эвес, а «уттуптарын» деп сөстү бижээн.} база көрдүм. Ол база-ла хоозун куруг чүүл-дүр. 11 Бак үүлгедиглерниң шииткели дүрген эвес күүсеттинип турарындан кижи чүрээ бачыт кылыр күзел-биле долуп чоруур. 12 Бачыттыг кижи чүс-даа катап бачыт кылып чорааш, узун назы назылаарын-даа көрүп чордум. Ийе, билир мен: «Аас-кежик Бургандан коргар улуска кээр, 13 а бузуттуг кижиге эки болбас, Бургандан кортпас кижиниң назыны хөлегеге дөмей ^f, ол оозун узадып шыдавас». 14 Ынчалза-даа чер кырында мындыг хоозун куруг чүүл база бар: чөптүг-шынныг улуска бузуттугларның үлүг-хуузу онаажып-даа, бузуттуг улустуң үлүг-хуузу чөптүг-шынныгларга онаажып-даа турар-дыр ^g. Ол база-ла хоозун куруг чүүл-дүр деп билдим.

15 Ынчангаш өөрүшкүлүг хөглээшкинни экизиндим; чүге дээрге кижи амытанга чырык черге аштанып-чемненип, хөглээринден дээре чүве чок-тур ^h, ол бүгү кижини эдерип, Бурганның аңаа чырык черге чурттаар кылдыр берген назынында кылып чоруур ажыл-ижи-биле кады чоруур-дур. 16 Кижиниң хүндүс-даа, дүне-даа уйгу-дыш көрбейн киржип чорууру ажыл-херектерни ⁱ – чер кырында дойлуп турар бүгү-ле ажыл-херектерни – эргий көөр база мерген угаанны угаап билип аар дээш, чүрээмни угландырдым. 17 Бурган бүгү-ле чүүлдү тургузарда, кижи чырык черде дойлуп турар чүүлдерни угаап билип ап шыдавас кылдыр кылган дээрзин ынчан көрдүм. Кижи ол бүгүнү шинчилээр дээш чеже-даа кызар болза, ол ону дөмей-ле билип ап шыдавас ^j база кандыг-ла бир мерген угаанныг кижи «Билир мен» дээр-даа болза, ол ону угаап билип ап шыдавас.