Eph 5 | TyvTUV | STEP | Ындыг болганда, Бурганның ынак ажы-төлү дег, Аңаа дөмей боорун оралдажыңар .

‏ Ephesians 5

Чырыктың ажы-төлү дег амыдыраңар

1 Ындыг болганда, Бурганның ынак ажы-төлү дег, Аңаа дөмей боорун оралдажыңар ^a. 2 Христос биске ынакшааш, Бодунуң амы-тынын бис дээш Бурганга салган чаагай чыттыг, күзел ханар өргүл дег берипкен ^b. Ооң ынчаар ынакшааны ышкаш, ынчалдыр ынакшылга бүргедип амыдыраңар ^c.

3 Үй-балай самыырал ^d азы кандыг-даа бужар чорук болгаш алыксак-чиксек чорук ышкаш чүүлдер дугайында араңарга чугаа безин көдүрүлбезин. Ындыг үүлгедиглер Бурганның ыдыктыг улузунга көңгүс таарышпас. 4 Ааска эптешпес сөстер, хоозун куруг чугаалар болгаш үй-балай баштактар чугааңарже кирбезин ^e, ол бүгү чүүл чок! Бурганга өөрүп четтирери оон канчап-даа дээре! 5 Харын бүзүреп боор силер: чаңгыс-даа самыыраан, бодун бужартаткан база чазый кижи (а ол дүрзү-бурганга чүдүүрлерден ынай-даа ылгалбас) ^f Христостуң база Бурганның Чагыргазынга өнчү албас ^g.

6 Силерни кым-даа хоозун сөстер-биле дуурайлавазын! ^h Чүге дээрге чогум-на ол чүүлдер дээш, Бурганның килеңи Ону дыңнавастарже халдаар ⁱ. 7 Ынчангаш олар-биле силерниң араңарга дөмей чүү-даа турбазын! ^j 8 Боттарыңар кажан-бир шагда караңгыга бүргеткен улус чораан силер ^k, а ам, Дээрги-Чаяакчыга башкарткаш, чырыкка бүргедиптиңер. Чырыктың ажы-төлү дег амыдыраңар! ^l 9 А чырыктың үре-түңнели ^{▼▼ Өске бурунгу сөзүглелдерде «Чырыктың үре-түңнели» эвес, а «Сүлдениң үре-түңнели» деп бижээн (Гал. 5:22 көр).} – кандыг-даа янзылыг буянныг херек, чөптүг-шынныг чорук болгаш алыс шын боор. 10 Дээрги-Чаяакчыга таарымчалыг чүүлдү тодарадып аарын оралдажыңар ⁿ. 11 Караңгының үре-түңнел чок үүле-херээнге киришпеңер, харын оларны сойгалаңар ^o. 12 Чүге дээрге ындыг ёражоктарның бүдүү чүнү үүлгедип турарын чугаалаары безин ыянчыг-дыр. 13 Ынчалза-даа чырыктың сойгалааны бүгү чүүл көскү апаар ^p. 14 А чырыктың көскү кылыпканы бүгү чүүл боду база чырык апаар. Ынчангаш мынча деп чугаалаар бис:

«Удаан кижи, оттуп кел! ^q
Өлүг кижи, дирлип кел,
сени ынчан Христос херелдендир чырыдыптар!» ^r

15 Таптыг көрүңер, оваарымчалыг болуңар: боттарыңарны мелегей эвес, а угаанныг улус ышкаш ап чоруңар ^s. 16 Кандыг-даа арганы чөп ажыглаарын оралдажыңар, чүге дээрге бузуттуг-бак чорук көвүдээн үе-дир бо. 17 Ынчангаш сарыыл чок болбаңар, а Дээрги-Чаяакчының күзел-соруун билип аарын оралдажыңар ^t. 18 Араганы эзиртир ишпеңер, оон чүгле үрелир силер ^u. Ооң орнунга Сүлдеге бүргеттириңер. 19 Ыдыктыг ырлар, йөрээлдер болгаш Сүлдеден кээр ырлар күүседип ^v, араңарда ынчалдыр харылзажыңар. Ырлажыңар, чүректериңер ханызындан Дээрги-Чаяакчыны алгап-йөрээңер ^w. 20 Дээргивис Иисус Христостуң ады-биле Бурган Адага бүгү чүве ужун үргүлчү өөрүп четтириңер ^x.

Христиан өг-бүле

(Кол. 3:17—4:1)

21 Христосту ^{▼▼ Өске бурунгу сөзүглелдерде «Христосту» эвес, а «Бурганны» деп бижээн.} хүндүлээриңерниң демдээ кылдыр бот-боттарыңарга чагыртыңар.

22 Херээжен улус, Дээрги-Чаяакчыга дег, ашактарыңарга чагыртыңар ^z. 23 Христостуң Бодунуң ниитилели болур мага-бодунуң Бажы ^aa болгаш Камгалакчызы болганы дег, ашаа кадайынга баштыңчы боор ^ab. 24 Христостуң ниитилелиниң Аңаа чагыртканы дег, кадайлар база ашактарынга бүрүнү-биле чагыртыр ужурлуг.

25 А силер, ашактар, Христостуң Бодунуң ниитилелинге ынаа ышкаш, кадайларыңарга ынак болуңар ^ac. Ол Бодунуң амы-тынын ол дээш өргээн болгай. 26 Христиан ниитилелди сугга чуп ^ad, арыглааш, Бодунуң сөзү-биле ыдыктап, аңгылап алыр дээш, 27 ону Бодунуң мурнунга бүрүн каазы-биле: четпес-дудуу чүве чок, бокка борашпаан – бачыт база кем чок бооп көзүлзүн дээш ^ae, Ол ынчаар кылган. 28 Ашактар база ынчалдыр, бодунуң мага-бодунга дег, кадайларынга ынак боор ужурлуг. Кадайынга ынак кижи бодунга база ынак. 29 Бодунуң мага-бодун көөр хөңнү чок чаңгыс-даа эр кижи кажан-даа туруп көрбээн, харын ол оозун чемгерер, ажаап-тежээр болгай. Христос Бодунуң ниитилели дээш база ынчалдыр сагыш човаар. 30 А бис Ооң мага-бодунуң кезектери-дир бис ^{af
,} ^{▼▼ Өске бурунгу сөзүглелдерде бо сөстерге «Ооң мага-бодундан база Ооң сөөк-даяандан» деп сөстерни немээн.}.

31 Ынчангаш эр кижи ада-иезин каапкаш, кадайы-биле катчы бээр,
ынчан ийи кижи чаңгыс мага-бот апаар ^ah.

32 Мында аажок ханы чажыт бар, ол чажыт Христоска болгаш Ооң ниитилелинге хамааржырын чугаалап тур мен. 33 Силерниң эр кижи бүрүзү база, бодунга боду дег, кадайынга ынак боор ужурлуг, а кадайы ашаан хүндүлезин ^ai.