Eph 6 | TyvTUV | STEP | Ажы-төл, Дээрги-Чаяакчыга башкарткаш, ада-иеңерни дыңнаңар, ынчаар кылыры чөптүг-шынныг болур .

‏ Ephesians 6

Ажы-төл болгаш ада-ие

1 Ажы-төл, Дээрги-Чаяакчыга башкарткаш, ада-иеңерни дыңнаңар, ынчаар кылыры чөптүг-шынныг болур ^a. 2 Бурганның аазаашкынынга коштунган Ооң бирги айтыышкынын утпаңар:

«Ачаң биле аваңны хүндүлеп чор.
3 Сеңээ ынчан буян-кежик доктаап,
чер кырынга үр амыдыраар сен» ^b.

4 Ада-иелер, ажы-төлүңерни бужургандырбаңар! Оларны Дээрги-Чаяакчының чурумун болгаш өөредиин ёзугаар өстүрүп-кижизидиңер база сургаңар ^c.

Кулдар болгаш оларның ээлери

5 Кулдар, чер кырында ээлериңерни, Христоска чагыртып турган-даа дег, хүндүткеп база коргуп-сүрээдеп, чүрээңер ханызындан дыңнаңар ^d. 6 Улустуң эки хамаарылгазын чаалап аар дээн чашпаачылар дег, карак чаап эвес, а Бурганның күзел-соруун сеткилиниң ханызындан күүседип турар Христостуң кулдары дег ажылдаңар ^e. 7 Улуска эвес, а Дээрги-Чаяакчыга бараан бооп турган дег, чүткүлдүү-биле бараан болуңар. 8 Кымның-даа: кул-даа, хостуг-даа кижиниң кылган буянныг ажыл-херээ дээш, Дээрги-Чаяакчы шаңнал бээрин билип алыңар ^f.

9 А ээлер силер, кулдарыңарга база шак ындыг хамаарылгалыг болуңар, кыжаныгдан туттунуңар ^g. Оларда-даа, силерде-даа дээрде чаңгыс Дээрги-Чаяакчы бар, а Ол кымны-даа өскелерден ылгай көрбес дээрзин утпаңар ^h.

Бурганның берген бүрүн чепсек-херексели

10 Адак сөөлүнде чугаалап каайн: Дээрги-Чаяакчыга башкарткаш, Ооң өндүр улуг күчү-күжү-биле бодуңарны быжыглаңар. 11 Бурганның берген бүрүн чепсек-херекселин кедип алыңар ⁱ, эрликтиң хамык кара сагыжынга удур ынчан туржуп шыдаар силер ^j. 12 Чүге дээрге бис эът-бот биле хандан бүткен улуска удур эвес, а эрге-чагырга ээлеринге, бистиң амыдыраан дүмбей үевисте ^k тергиидээн каптагайның чагырыкчыларынга база дээрлерде кара күштерге удур ^l демисежип турар-дыр бис.

13 Ынчангаш бузут тергидээр хүн кээрге, оларга удур туржур шаг-шинектиг бооп, шупту халдаашкыннарны ойтур шаап, тура тутчур дээш, Бурганның чепсек-херекселин кедип алыңар. 14 Чаныш-сыныш чок туржуңар! Алыс шынны чыыра куржангаш ^m, чөптүг-шынныг чоруктуң куяк хевин кедип алыңар ⁿ. 15 Амыр-тайбың дугайында Буянныг Медээни суртаалдаарынга белениңер – бутка кедер идииңер болзун ^o. 16 А ол бүгүден аңгыда, бүзүрелдиң дозуг-камгалалын тудуп алыңар ^p – ооң-биле бузуттуг эрликтиң хамык оттуг согуннарын дозуп шыдаар силер. 17 Камгалалды – куяк бөрттү дег, а Бурганның сөзүн – Сүлдениң силерге бээр хылыжын дег хүлээп алыңар ^q. 18 Мөргүлдүң бүгү хевирлери-биле мөргүңер. Кандыг-даа үеде Бургандан дилег кылып, Сүлдеге башкарткаш, мөргүңер ^r. А ындыг болганда, серемчилелдиг бооп ^s, Бурганның бүгү улузу дээш, чүткүлдүү-биле мөргүңер.

19 Мени бодааш – чугаалай бээримге-ле, Бурган меңээ херектиг сөстерни айтып берзин дээш база Буянныг Медээниң чажыдын коргуш чок суртаалдаарым дээш – мөргүңер-ле ^t. 20 Демирледип-даа алган болзумза ^u, ол Буянныг Медээ ужун Иисус Христостуң бүрүн эргелиг элчизи мен ^v. Хүлээлгемни чогууру-биле күүсетпишаан, ону дидими-биле база ажыы-биле медеглеп шыдаарым дээш мөргүңер.

Түңнел байыр чедириишкиннери

(Кол. 4:7-8)

21 Мээң канчаар амыдырап, чүнү кылып турарымны билип алыксап тур силер бе? Адырам, ол бүгүнү силерге Тихик ^w, ханы ынак бүзүрээн дуңмам, Дээрги-Чаяакчының шынчы бараан болукчузу, чугаалап чеде бээр. 22 Бистиң дугайывыста дыңнааш, чүректериңер сорук кирзин дээш, мен ону силерже ылап-ла ол сорулга-биле чорудуп тур мен ^x.

23 Ха-дуңма, силер бүгүдеге Бурган Адавыстан, Дээрги Иисус Христостан келген амыр-тайбың, ынакшыл болгаш бүзүрел доктаазын! 24 Дээргивис Иисус Христоска өлүм билбес ынакшыл-биле ынакшаан бүгү улуска Бурганның авыралы доктаазын! ^{▼▼ Өске бурунгу сөзүглелдерде бо шүлүк «Аминь» деп сөс-биле төнген.}