Est 3 | TyvTUV | STEP | Ол бүгү болуушкуннарның соонда Ахашверош хаан Аман деп аттыг бир кижини канчаар-даа аажок алдаржыдып, бүгү нояннардан бедидир көдүрүп, оларның үстүнге салып каан. Аман дээрге Агагтың үре-салгалы, Амадаттың оглу болган.

‏ Esther 3

Аманның Мардохейге болгаш еврейлерге удур кара сагыжы

1 Ол бүгү болуушкуннарның соонда Ахашверош хаан Аман деп аттыг бир кижини канчаар-даа аажок алдаржыдып, бүгү нояннардан бедидир көдүрүп, оларның үстүнге салып каан. Аман дээрге Агагтың ^{▼▼ Агаг – израильчилерниң дайзыннары амалик чоннуң хааны (1 Хаан. 15:8, 32-33 көр).} үре-салгалы, Амадаттың оглу болган. 2 Хаанның чоок дүжүметтери шуптузу хаанның дужаалын ёзугаар Аманга черге чедир мөгейип бараалгап турганнар. Чүгле Мардохей аңаа черге чедир мөгейип бараалгавайн барган. 3 Шак ынчан хаанның чоок дүжүметтери Мардохейден: «Сен хаанның дужаалын чүге күүсетпейн тур сен?» – деп айтырганнар. 4 Хүннүң-не аңаа чугаалаарга-даа, Мардохей оларны дыңнавас болган, ынчангаш олар Аманга ооң дугайында, ол «Еврей кижи мен» деп турганының дугайында хоптаныпканнар. Хаанның чоок дүжүметтери Мардохей Аманның мурнунга бодун канчаар алдынар ирги дээрзин көрүксеп турганнар. 5 Мардохей ооң мурнунга черге чедир мөгейип бараалгавас боорга, Аманның килеңи кыптыга берген. 6 Чүгле Мардохейниң амызынга чедип, шаажылаары Аманның сагыжынга четпес болган; ынчангаш Мардохей еврей кижи болганда, Ахашверош хаанның чагыргазының адаанда бүгү еврейлерни узуткаарын Аман бодап алган.

7 Ахашверош хаанның чагыргага келгениниң он ийи дугаар чылының Нисан ^b деп баштайгы айы турган. Ынчан Аманның мурнунга ай, хүн тодарадыр «пур» деп төлге салганнар ^c. Ол төлге Адар ^d деп он ийиги айга дүшкен. Аман еврейлерни ол өйде узуткап эгелээр деп шиитпирлээн.

8 Аман Ахашверош хаанга мынча дээн: «Силерниң чагырган девискээриңерде аңгы чоннар аразында тарай берген бир чон бар-дыр; ол чоннуң хоойлузу өскелерниинден ылгалдыг, хаанның дужаалдарын олар күүсетпейн турарлар-дыр ^e; ынчангаш хаан кижи ону ынчаар арттырып болбас ужурлуг. 9 Бир эвес хаан күзээр болза, оларны узуткаар деп дужаалдан үндүрзүн; ынчан хаанның күрүне хөреңгизинче киирер дээш, хаанның дүжүметтеринге 10 000 талант хире деңзилиг мөңгүннү бээр мен».

10 Ынчан хаан бодунуң холундан таңмалыг билзээн ужулгаш ^{▼▼ Кандыг-даа дужаалга ол таңманы базып каарга, күштүг болур.}, Агагтың үре-салгалы, Амадаттың оглу, еврейлерниң дайзыны Аманга суп берипкен ^g. 11 Хаан Аманга: «Бо мөңгүннү болгаш чонну сеңээ берип тур мен; оларны канчаарыңны бодуң бил» – дээн.

12 Бирги айның он үште хаанның бижээчилерин келдирткеш, Аманның айтыышкыны-биле күрүне эргелекчилеринге, девискээрлер чагырыкчыларынга, чон бүрүзүнүң нояннарынга оларның үжүк-бижиктери-биле оларның дылдарынга чагааларны бижиткен ^h; ол бүгү Ахашверош хаанның адындан бижиттинген болгаш ооң билзээ-биле таңмалаттынып бадыткаттынган. 13 Чагааларны шапкынчылар дамчыштыр хаанның чагыргазында бүгү девискээрлерже тарадыпкан ⁱ. Ында бижээнин ёзугаар еврейлерниң шуптузун: аныяк-кырганны-даа, уруг-дарыгны-даа, херээженнерни-даа чаңгыс хүнде – Адар ^j деп он ийи дугаар айның он үште кыргып-хыдыыр, узуткаар, оран-савазын база акша-хөреңгизин үптээр ужурлуг. 14 Дужаалдыг чагааның хоолгазын чурттуң булуң бүрүзүнче чорудары көрдүнген. Ол хоойлу дег бооп, бүгү чоннарга четкен турзун дээн, чүге дээрге олар демги хүнге белен турар ужурлуг.

15 Шапкынчылар хаанның чарлыы-биле кончуг дүрген чорупканнар ^k. Чарлык Сузының ордузунга база тарай берген; хаан биле Аман дойлап найырлап органнар, а Сузы хоорай хөлзээзин-дүвүрелге алзыпкан.