Est 4 | TyvTUV | STEP | Мардохей чүү болганын билип кааш, бодунуң идик-хевин ора соп каапкаш, качыгдалдың самдар хевин кеткеш, бодунче хүл чажып алган; оон хоорайның ортузунга үнүп келгеш, муңгаранчыг ыглап-сыктап, алгырып-кышкырып эгелээн.

‏ Esther 4

Мардохейниң Эсфир кадындан дуза дилээни

1 Мардохей чүү болганын билип кааш, бодунуң идик-хевин ора соп каапкаш, качыгдалдың самдар хевин кеткеш, бодунче хүл чажып алган; оон хоорайның ортузунга үнүп келгеш, муңгаранчыг ыглап-сыктап, алгырып-кышкырып эгелээн. 2 Ындыг янзылыг ол хаанның хериминиң чанынга чедип келгеш, кирбейн барган, чүге дээрге качыгдал хевин кеткен кижи хаанның хериминче кирип болбас турган. 3 Хаанның чарлык-дужаалы четкен девискээр, булуң бүрүзүн еврейлерниң качыгдалы, ыы-сыызы долуп, олар шээрленип турган; качыгдал хеви болгаш хүл оларның орун-дөжээн солуй берген ^a.

4 Эсфирниң бүзүрелдиг чалчалары база чалча кыстары аңаа келгеш, Мардохейниң дугайын чугаалап бергеннер. Кадын дыка-ла хөлзеп, дүвүрээн. Мардохей качыгдал хевин ужулзун дээш, Эсфир олче идик-хеп чорудупкан, ынчалза-даа ол ону хүлээп албаан, качыгдал хевин ужулбаан. 5 Ынчан Эсфир хаанның аңаа бараан болзун дээн бүзүрелдиг чалчазы Гатахты кыйгырыпкаш, ону Мардохейже: «Чүү деп чүвел бо? Чүү болганыл?» деп билип эккээри-биле чорудупкан. 6 Гатах хаанның бажыңының мурнунда хоорай шөлүнде турган Мардохейже чорупкан. 7 Мардохей аңаа ооң-биле чүү болганын дөгерезин чугаалап берген, еврейлерни узуткап каар болза, хаанның хөреңгизинче Аманның киирер болуп аазаан мөңгүнүнүң сан-түңүнден бээр чугаалаан ^b. 8 Мардохей Гатахка еврейлерни узуткаар дугайында Сузыга чарлаттынган дужаалдың хоолгазын ^c Эсфирге көргүзери-биле берип каан. Ол Эсфирниң шупту чүвени билип алырын күзээн. Хаандан еврей чонну өршээрин барып дилээрин ол Эсфирге чагаан.

9 Гатах ээп келгеш, Эсфирге Мардохейниң сөстерин дамчыдып берген. 10 Эсфир Гатахка Мардохейге барып, дараазында чүүлдү чугаалаарын айыткан: 11 «Хаанның чоок дүжүметтери болгаш ооң чагыргазының адаанда бүгү чон билир: хаан боду келдиртпээнде, ооң иштики хериминче кирер эр-даа, херээжен-даа кижилерге кеземче чаңгыс ^d – өлүм; чүгле хаан кымче алдын даянгыыжы-биле айтырыл – ол кижи дириг артар. А мени хаанче үжен хүн иштинде келдиртпейн тур».

12 Мардохейге Эсфирниң сөстерин дамчыдып бергеннер. 13 Ол Эсфирге мынча деп харыылаан: «Бүгү еврейлерден кара чааскаан хаанның бажыңынга камгаланып артып каар мен деп бодава. 14 Бир эвес сен бөгүн ыыттавайн эрттириптер болзуңза, еврейлерге хосталга болгаш камгалал өске черден чедип кээр, а сен база сээң адаңның төрелдери өлүп каар. Канчап билир, мындыг байдалда чонуңга дузалаар дээш сен кадын апарган эвес сен бе?»

15 Эсфир Мардохейге мынча деп харыылаан: 16 «Сузыда бар еврейлерниң шуптузун барып чыып ал, ынчангаш үш хүн иштинде дүне-хүндүс-даа чемненмейн, суг-даа ишпейн ^e, мен дээш шээрлениңер, мен база чалча кыстарым-биле ол шээрлениишкинни шак-ла ынчаар сагыыр мен, ооң соонда хоойлуга дүүшпес-даа болза, хаанга баар мен, а өлүр-даа болза, өлгей-ле мен». 17 Мардохей чорупкаш, Эсфир канчаар дужааганыл, шак-ла ынчаар күүсеткен.