Est 7 | TyvTUV | STEP

‏ Esther 7

Эсфирниң ийиги дою база Аманны шаажылааны

1 – 2 Хаан Аман-биле кады Эсфир кадынның ийи дугаар доюнга чедип келгеннер. Дой шуудай бергенде, арага-дарыны ижип турар өйде, хаан база катап Эсфир кадынга мынча дээн: «Күзелиң чүл, Эсфир кадын, ону хандырып бээр мен; дилээң чүл? Күрүнемниң чартыын-даа дилээр болзуңза, ону күүседир мен ^a».

3 Эсфир кадын мынча деп харыылаан: «Бир эвес хаан менче ээ көрнүп турар болза, хаан күзээр-ле болза ^b, мээң күзелим-биле, мээң дилээм-биле меңээ болгаш мээң чонумга амыдыралдан хайырлазын! 4 Мен болгаш мээң чонум кыргып-хыдыышкынга, өлүм-чидимге таваржыр кылдыр саттырыпкан-дыр бис ^c. Бир эвес чүгле кулдар кылдыр саттырыпкан болзувусса, мен ыыттавас ийик мен, чүге дээрге ол айыыл-халап хаанны дүвүредир хире эвес үүрмек чүүл болгу дег-дир».

5 Ахашверош хаан Эсфир кадындан: «Ындыг багай чорукту кылырын семээн кижи кайыл, кымыл ол?» – деп айтырган.

6 Эсфир: «Шак ындыг дайзын ^d – өштүг-өжээнниг Аман бо-дур!» – деп харыылаан. Ынчан Аман хаанның болгаш кадынның мурнунга девидеп, сириңейнип эгелээн.

7 Хаан ажынып-хорадап, дойну каапкаш, ордунуң садынче чоруй барган. А Аман Эсфир кадындан бодунуң амы-тынын өршээрин дилеп, чаннып артып калган. Хаанның аажызындан коргунчуг яла аңаа онаажырын Аман билип турган. 8 Кажан хаан ордунуң садындан дой болуп турган черже кирип кээрге, Аман Эсфир кадынның мурнунда орун-дөжээнде кээп дүшкен чыткан! Хаан мынча дээн: «Мен бажыңымга бодум турумда-ла, кадынны күштээр бодап турар де!» Хаан ынча дээри билек, Аманның арнын дуглааш, тудуп алганнар.

9 Хаанның база бир бүзүрелдиг чалчазы Харбона ^e мынча дээн: «Хаанга эки чүве кылган Мардохейни шаажылаар дээш Аманның белеткеп алган бежен кыры дурту хире бедик ыяжы бо-дур ^f. Ол Аманның бажыңының чанында тур ышкажыл».

Ону дыңнааш, хаан дужааган: «Аманны аңаа азып өлүрүңер! ^g» 10 Мардохейге белеткеп каан турган ыяшка Аманны азып каан ^h. Хаанның кылыы ам кээп чазылган.