Exo 35 | TyvTUV | STEP | Моисей израиль чоннуң бүгү ниитилелин чыып алгаш, оларга мынча дээн: «Дээрги-Чаяакчының силерге күүсетсин дээш берген айтыышкыннары бо-дур.

‏ Exodus 35

Амыр-дыш хүнүнүң дугайында дүрүм-хоойлу

1 Моисей израиль чоннуң бүгү ниитилелин чыып алгаш, оларга мынча дээн: «Дээрги-Чаяакчының силерге күүсетсин дээш берген айтыышкыннары бо-дур. 2 Алды хүн дургузунда ажыл-херектериңер кылыңар, а чедиги хүн силерге ыдыктыг, Дээрги-Чаяакчыга бараалгаткан онзагай амыр-дыш хүнү болзун; ол хүнде ажыл-херээн кылыр кандыг-даа кижини өлүрүп каар ужурлуг ^a. 3 Бүгү оран-саваларыңарга амыр-дыш хүнүнде от безин кывыспаңар».

Ужуражылга майгынынга ажыглаар эргежок чугула чүүлдер

(Хост. 25:1-7)

4 Моисей израиль чоннуң бүгү ниитилелинге мынча дээн: «Дээрги-Чаяакчының чугаалаан айтыышкыннары бо-дур. 5 Дээрги-Чаяакчыга бээр онза өргүл белектеринден чыып алыңар. Эки туразы-биле өргүл белээн салып турар кижи бүрүзү Дээрги-Чаяакчыга дараазында белектерден: алдын, мөңгүн, хүлер; 6 көк, кызыл-хүрең болгаш кызыл өңнүг пөстер, ак лён, өшкү дүгү, 7 кызыдыр будаан кошкар кежи, тахаш кежи ^b; акация ыяжы; 8 чырыткыже кудар олива үзү, бараалгакчыларны шилип чаар үс кылырынга база айдызаарда ажыглаар чаагай чыттыг чүүлдер; 9 оникс дээр үнелиг даштар болгаш эфодка база ыдыктыг хапчыгашка быжыглаар үнелиг даштардан эккеп берзин.

10 Силерниң араңарда уран-шевер улус чедип келгеш, Дээрги-Чаяакчының дужааганы бүгү чүвени белеткеп кылзын: 11 ыдыктыг өргээ-майгынны, ооң дээвиир-шывыын болгаш шывыгларын; ооң дээктерин, хана-каракталчак рамкаларын болгаш доора оорга ыяштарын, адагаштарын болгаш дөжектерин; 12 ыдыктыг аптараны, ооң көдүрткүүш-мергелерин, халывын болгаш аптараның турар черин чажырар көжегени; 13 ширээни, ооң көдүрткүүш-мергелерин, хамык херекселдерин база Дээрги-Чаяакчыга өргээн ыдыктыг хлебтерни; 14 чырыдар чырыткыны, ооң херекселдерин, деңнерин болгаш чырыдып кыпсыр олива үзүн; 15 айдызаар өргүл бедигээжин, ооң көдүрткүүш-мергелерин, шилип чаар олива үзүн, айдызап кыпсыр чаагай чыттыг чүүлдерни, майгынче кирер черни дуглаар көжегени; 16 бүрүн өрттедир өргүлдер салыр бедигээшти, ооң хүлер шишкиижин, көдүрткүүш-мергелерин болгаш хамык херекселдерин; чунар саваны, ооң дөжээн; 17 херимниң шывыгларын, адагаштарын, адагаштарның дөжектерин болгаш майгынче кирер хаалга-шывыын; 18 майгынның болгаш ооң хериминиң өргеннерин база оларга шарыыр хендирлерни; 19 ыдыктыг черге бараан болурда кедер тускай хептерни – Бурганның бараалгакчызы Аароннуң ыдыктыг хептерин болгаш ооң оолдарының Бурганга бараалгаарда кедер хептерин».

20 Израиль чоннуң бүгү ниитилели Моисейни каапкаш, тарай берген. 21 Дээрги-Чаяакчыга өргүл белектерин Ужуражылга майгынын тудуп тургузарынга, ооң хамык хереглелдеринге болгаш ыдыктыг хептерни даараарынга ажыглаар кылдыр эки туразы-биле эккеп бериксээн шупту улус ол бүгүнү эккеп берип турган. 22 Дузалаарын күзээн бүгү улус – эр-даа, херээжен-даа улус чедип кээп, Дээрги-Чаяакчыга өргүл белээ кылдыр алдынын: билзектерни, сыргаларны, ызырткыларны, билектээштерни болгаш өске-даа алдын каасталгаларны эккеп берген. 23 Бодунда көк, кызыл-хүрең болгаш кызыл өңнүг пөстер, ак лён, өшкү дүгү, кызыдыр будаан кошкар кештери болгаш тахаш кештери ^c бар улус ол чүүлдерин эккеп берип турган. 24 Мөңгүн азы хүлер бериксээн улус оозун Дээрги-Чаяакчыга өргүл белээ кылдыр эккеп берип турган. Бодунда акация ыяжы бар улус оозун майгынга чүнү-даа кылырынга ажыглазын дээш эккеп берип турган. 25 Бүгү уран-шевер херээженнер дүк ээрер ажыл кылып, көк, кызыл-хүрең болгаш кызыл өңнүг пөстерни эккеп берип турган. 26 Сеткилиниң айбызын дыңнаан бүгү уран-шевер херээженнер өшкү дүгүн ээрип турган. 27 А төрел бөлүктер баштыңнары оникс дээр үнелиг даштарны, эфодка база хөрек баартыгы хевирлиг хапка быжыглаар үнелиг даштарны эккеп берип турган. 28 Баштыңнар ол ышкаш чаагай чыттыг чүүлдерни база чырыдарынга, шилип чаарынга болгаш чаагай чыттыг айдызаар холуксаалар кылырынга ажыглаар олива үзүн эккеп берип турган. 29 Израиль чондан сеткилиниң айбызын дыңнаан эр-даа, херээжен-даа улус Дээрги-Чаяакчының Моисейни дамчыштыр кылырын дужааганы кандыг-даа ажылды кылырынга херектиг өргүл белектерин Дээрги-Чаяакчыга эки туразы-биле эккеп берип турган.

Ус-шеверлерниң ажыл-ижиниң эгелээни

(Хост. 31:1-6)

30 Моисей ынчан израиль чонга мынча дээн: «Дыңнаңар, Дээрги-Чаяакчы Иуданың аймаанга хамааржыр Хурнуң оглунуң оглу, Урийниң оглу Веселиилди шилип алгаш, 31 ону Бурганның Сүлдези-биле бүргеди – билди-билигни, янзы-бүрү арга-мергежилди аңаа берди. 32 Ол кижи ам алдын, мөңгүн болгаш хүлер-биле чогаадыкчы, шевер ажылдар кылып шыдаар; 33 үнелиг даштарны хоога сугары-биле кырлай кылыр; ыяшты оюп-хээлээр – кандыг-даа уран ажылды кылып шыдаар. 34 Дээрги-Чаяакчы өске уран-шевер улусту өөредир арга-мергежилди Веселиилге база Данның аймаанга хамааржыр Ахисамахтың оглу Аголиавка берген. 35 Дээрги-Чаяакчы оларның чүректерин мерген угаан-биле бүргээн, ынчангаш олар кандыг-даа уран ажылды кылып шыдаар: ыяш-даш чонар; көк, кызыл-хүрең болгаш кызыл өңнүг удазыннардан база ак лёндан угулзалыг пөстер аргып, даараар – уран-шевер улустуң бүгү арга-мергежилин билир улус турган.