Exo 16 | TyvTUV | STEP | Бүгү израиль ниитилел Элимден үнүп чоруткаш, Египеттен үнгенинден бээр санаарга, ийи айның он бешки хүнүнде Элим биле Синайның аразында чыдар Син деп ээн кургаг ховуга чедип келген .

‏ Exodus 16

Дээрги-Чаяакчының дээрден аъш-чемни хайырлааны

1 Бүгү израиль ниитилел Элимден үнүп чоруткаш, Египеттен үнгенинден бээр санаарга, ийи айның он бешки хүнүнде Элим биле Синайның аразында чыдар Син деп ээн кургаг ховуга чедип келген ^a. 2 Олар шупту ээн кургаг ховуга Моисей биле Ааронга хомудап: 3 «Дээрги-Чаяакчының холундан египет черге өлүрүвүс кай! ^b Эът дүлген паштар чанынга ордувус чоп, далган-тарааны тоттур чип турдувус чоп ^c. А ам силер бистиң шуптувусту бо ээн кургаг ховуже, аштап өлзүннер дээш, үндүрүп эккелдиңер» – деп хыйланып турганнар.

4 Дээрги-Чаяакчы ынчан Моисейге: «Мен силерге дээрден аъш-чемни чагдырып берейн. Улус хүннүң-не үнүп, хүнде чеже херек-тир, ынчаны чыып ап турзун. Олар Мээң дүрүмүм ёзугаар кылыр бе азы кылбас бе дээрзин ынчаар шенеп көөр мен. 5 А алдыгы хүнде чыып алган аъш-чемин белеткеп алгаш, көөрге, өске хүннерде чыып ап турганындан ийи катап хөй апарган болур» – деп чугаалаан.

6 Моисей биле Аарон бүгү израиль чонга: «Силерни египет черден Дээрги-Чаяакчы үндүре берген дээрзин кежээ билип алыр силер, 7 а эртен Ооң өндүр бедиин көөр силер. Чүге дээрге Дээрги-Чаяакчы силерниң Аңаа хомудап, хыйланганыңарны дыңнап каан-дыр. А бисте чүү боор, биске хомудап, хыйланган херээңер чүл? ^d» – деп чугаалааннар. 8 Моисей: «Дээрги-Чаяакчы силерниң Олче хомудап, хыйланганыңарны дыңнап каан-дыр, ынчангаш Ол силерге аъш-чем кылдыр эътти кежээ бээр-дир, а эртен далган-тарааны тоттур бээр-дир. А бисте чүү боор, биске эвес, Дээрги-Чаяакчыга хомудап, хыйланганыңар ол-дур» – деп немей чугаалаан.

9 Моисей Ааронга: «Бүгү израиль ниитилелге: „Дээрги-Чаяакчының мурнунче чоокшулап келиңер, Ол силерниң хомудап, хыйланганыңарны дыңнап каан болгай“– деп дамчыт» – дээн. 10 Аарон бүгү израиль ниитилелге ону чугаалап турда, улус ээн кургаг ховуже углай көрнүп кээрге, Дээрги-Чаяакчының чайынналчак чырыы булутта чырып келген.

11 Дээрги-Чаяакчы Моисейге: 12 «Мен израиль чоннуң хомудап, хыйланганын дыңнап кагдым, оларга: „Кежээки имиртиңде эът чиир силер, а даарта эртен тоттур далган-тараа чиир силер, ынчан Мени силерниң Дээрги-Чаяакчы Бурганыңар деп билип алыр силер“– деп дамчыт» – дээн. 13 Кежээликтей матпадактар ужуп келгеш, улустуң турлагжаан черин шыва апкан ^e, а даарта эртен ол кезек черге шалың дүшкен чыткан ^f. 14 Шалың эсти бергенде, улус көөрге, ээн кургаг ховунуң кырынга хыраа ышкаш бир-ле эстиичел чүүл артып калган болган.

15 Израильчилер ону көргеш, бот-боттарындан: «Бо чүү боор?» – деп айтыржып турганнар, чүге дээрге ол чүл дээрзин билбес болганнар.

Моисей оларга: «Бо дээрге Дээрги-Чаяакчының силерге берген далган-тараазы-дыр. 16 Ол силерге бо далган-тарааны кижи бүрүзү хереглээн аайы-биле, бир кижиге-ле бир гомор иштин ^g, өг-бүлезинде чеже кижи барын барымдаалап, чыып алырын дужааган-дыр» – деп чугаалаан. 17 Израиль чон шак ынчаар кылгаш, чамдыызы – хөй, чамдыызы – эвээш далган-тарааны чыып алганнар. 18 Хөйнү чыып алган кижи артыкшыл билбес болзун, а эвээшти чыып алган кижи чедишпезин билбес болзун дээш, олар гомор-биле хемчээп турганнар. Кижи бүрүзү бодунга чеже херек-тир, ынчаны чыып алган ^h.

19 Моисей улуска: «Кым-даа далган-тараазын эртенге чедир арттырбазын» – деп чугаалаан. 20 Ынчалза-даа олар ону тооп дыңнавайн барган – чамдык улус далган-тараазын эртенге чедир арттырып аарга, оозу курттуп, чыдып эгелээн. Моисей ол улуска ажына берген. 21 Улус далган-тарааны хүннүң-не эртен эрте, хереглээн аайы-биле чыып ап турган, дүштеки изигде ол эрий бээр болган.

22 Алдыгы хүнде далган-тарааны ийи катап хөйнү, бир кижиге-ле ийи гомор иштин чыып алганнар. Ниитилелдиң баштыңнары шупту Моисейге кээп, ону дыңнатканнар. 23 Моисей оларга мынча деп чугаалаан: «Дээрги-Чаяакчыны дыңнаңар, Ол: „Даарта амыр-дыш хүнү, Дээрги-Чаяакчыга бараалгаткан ыдыктыг хүн болур-дур ⁱ, быжырар аъш-чемиңерни бөгүн быжырып, хайындырар аъш-чемиңерни бөгүн хайындырып алыңар, а артып калганын даартага чедир кадагалай салып алыңар“– дээн болгай». 24 Улус Моисейниң айтыышкынын ёзугаар аъш-чемин эртенге чедир шыгжап каарга, оозу чыдываан-даа, курттуваан-даа.

25 Моисей чонга: «Ол далган-тарааны бөгүн – Дээрги-Чаяакчыга бараалгаткан амыр-дыш хүнүнде чиңер. Бөгүн шөлден далган-тараа тыппас силер. 26 Алды хүн дургузунда далган-тарааны чыңар, а чедиги – амыр-дыш хүнүнде – далган-тараа шөлге турбас» – деп чугаалаан.

27 Ынчалза-даа чамдык улус чедиги хүнде чыып үнгеш, чүнү-даа тыппааннар. 28 Дээрги-Чаяакчы ынчан Моисейни дамчыштыр чонга мынча дээн: «Мээң айтыышкыннарым болгаш дүрүмнеримни күүседиринден чежеге дээр ойталап кээр силер? 29 Дыңнаңар, Дээрги-Чаяакчы силерге амыр-дыш хүнүн хайырлаан-дыр, ынчангаш Ол алдыгы хүнде ийи хүн дургузунда чиир далган-тарааны берип турар-дыр: чедиги хүнде кижи бүрүзү аалынга артып калзын, кым-даа турар черинден ырап чорбазын». 30 Чон ынчан чедиги хүнде дыштанып эгелээн.

31 Израиль чон ол далган-тарааны манна ^{▼▼ Манна – еврей дылда «Бо чүү боор?» дээн сөстерге дөмей (16:15 көр).} деп адап алган. Манна дээрге кориандр үрезиннери дег ак өңнүг тараа болган, а ооң амданы ары чигири чаап каан боова ышкаш болган. 32 Моисей чонга: «Дээрги-Чаяакчы: „Силерни египет черден үндүрүп эккелгенимде, ээн кургаг ховуга чемгерип турганым далган-тарааны көрзүннер дээш, силерниң бүгү салгалдарыңарга бир гомор ишти маннаны кадагалап арттырып калыңар“– деп айтыышкын берди» – деп чугаалаан.

33 Моисей оон Ааронга: «Бир идиш-савадан ап алгаш, олче бир гомор маннаны ургаш, силерниң бүгү салгалдарыңарга кадагалаттынып артар кылдыр, Дээрги-Чаяакчының мурнунга салып каг» – дээн. 34 Аарон Дээрги-Чаяакчының Моисейге дужааганын ёзугаар манна куткан идиш-саваны ыдыктыг аптараның мурнунга салып каан. 35 Израиль чон маннаны дөртен чыл дургузунда ^k – чурттаар черинге, ханаан черниң кызыгаарынга чеде бергижеге чедир чип келген ^l. 36 (А гомор болза эфаның оннуң бир кезээ болур чүве-дир.)