Exo 23 | TyvTUV | STEP | Меге чугаа-соот таратпа; бак кижиже холуң сунуп, мегелеп херечилеве .

‏ Exodus 23

1 Меге чугаа-соот таратпа; бак кижиже холуң сунуп, мегелеп херечилеве ^a.

2 Хөйнүң талазынче чайгылып, бузут үүлгетпе база чаргы үзе шиитпирлеп тура, хөйнүң талазынга турар дээш шындан ойталава.

3 Бир кижиниң чаргызын үзе шиитпирлеп тура, ядыы-ла болганы дээш, ону амдажытпа ^b.

4 Дайзыныңның-даа бугазы азы элчигени аза бергенин көрүп кагзыңза, ээзинге эгидип бер ^c. 5 Өжээтениңниң элчигени чүъгүнүң аарындан кээп ушканын көрүп кагзыңза, ону чыттырзын каапкаш барба: дайзыныңга дузалап, чүъктү дүжүрүш.

6 Түреңги кижиниң чаргызын үзе шиитпирлеп тура, ооң эргезин кызагдава ^d.

7 Шын эвес буруудадыышкындан чайлап, буруу чок, актыг кижини өлүрер кылдыр шиитпе ^e – Мен кем-буруулуг кижини агартпас болгай мен.

8 Хээлилээн белектер алба, олар карактыг улусту согурартып каар база актыг улустуң чугаа-сөзүнүң утказын хажыдып каар болгай ^f.

9 Өскээртен келген кижини кызып-кыйба: силер база египет черге өскээртен келген улус бооп чурттап чораан болгаш, ындыг кижиниң сеткил-хөңнүн билир болгай силер ^g».

Онзагай хүннер болгаш байырлалдар дугайында

10 «Бодуңнуң чериңни алды чыл дургузунда тарып, дүжүдүн ажаап ап кел. 11 А чедиги чылда аңаа дыштан берип, болбаазыратпа; чайгаар үнген дүжүттү сээң чонуңнуң түреңги улузу чыып чизин, ооң соонда артканын черлик аң-мең чемиш кылзын. Виноградың шөлү болгаш олива ыяштарың-биле база ынчалдыр кыл ^h.

12 Алды хүн дургузунда ажыл-херектериң кыл, а чедиги хүнде дыштанып ал, сээң бугаң биле элчигениң дыштанзын; эр, херээжен кулдарың биле өскээртен келген ажылчының дыштанзын ⁱ.

13 Силерге Мээң чугаалаан бүгү чүвемни күүседиңер, өске бурганнар аттары безин адаваңар: аксы-дылыңардан ол аттар үнмезин ^j.

14 Чылда үш катап Меңээ бараалгаткан байырлалды эрттирер сен ^k. 15 Ажыткы-биле хөөтпээн далганнар байырлалын сагып чор ^l: Мээң сеңээ дужааганым дег, Авив айның доктааткан үезинде, Египеттен хосталып үнүп келген үеңде, чеди хүн дургузунда ажыткы-биле хөөтпейн быжырган далган-тараа чиир сен. Ол ышкаш улус Мээң мурнумга хол куруг келбезин ^m. 16 Бодуңнуң шөлүңде тарып алган үрезиниңниң болгаш күш-ажылыңның үре-түңнели – баштайгы дүжүдүңнүң байырлалын демдеглеп чор ⁿ. Чыл төнчүзүнде шөлүңден күш-ажылыңның үре-түңнелин ажаап аарың – дүжүт ажаалдазының байырлалын демдеглеп чор ^o. 17 Чылда үш катап сээң бүгү эр улузуң Дээрги-Бурган-Чаяакчының мурнунга бараалгап келзин ^p.

18 Меңээ хан өргүп турар үеңде, ажыткылыг хлебти катай өргүве; байырлалда ^{▼▼ Байырлал – Хосталыышкын байырлалын ынча деп турар чадапчок (34:25 көр).} Меңээ салган өргүлдүң чаан даартагы эртенге чедир арттырба.

19 Сээң чериңниң дүжүдүнүң башкылыын Бурганың Дээрги-Чаяакчының өргээзинге эккеп бараалгат ^r.

Анайны ооң авазының сүдүнге хайындырба ^s».

Бурганның ханаан черни Израильге чагыртыр бооп аазааны

20 «Көр даан, Бодумнуң төлээмни, сени орукка кадагалазын дээш база Мээң белеткеп кааным черге чедирзин дээш, сени мурнай чорудуп тур мен ^t. 21 Ооң мурнунга бодуңну шын алдынып чор, ооң үнүн тооп дыңна, аңаа удурланма, чүге дээрге Мээң өмүнээмден айбылаткан болгаш, ол силерниң Меңээ удурланганыңарны өршээвес. 22 Бир эвес ооң сөзүн тооп дыңнап, сеңээ чугаалаан бүгү чүүлүмнү күүседир болзуңза, дайзыннарыңга дайзын апаар мен, сеңээ удур улуска удурланыр мен ^u.

23 Мээң төлээм сээң мурнуңга орук баштап чоруткаш, сени амор, хет, ферез, хананей, хиввей болгаш иевус чоннарга чедире бээр, ынчан оларны узуткап каар мен ^v. 24 Ол чоннарның бурганнарынга мөгейбе, оларга бараан болба ^w; ол чоннарның ажыл-херектерин өттүнме, харын оларның дүрзү-бурганнарын узуткааш, ыдыктыг көжээлерин чуура шаап каавыт ^x. 25 Дээрги-Чаяакчы Бурганыңга бараан бол, Мен ынчан сээң аъш-чемиңни болгаш сууңну элбек кылып каар мен, аарыг-аржыкты сенден чайладыр мен ^y. 26 Сээң чер-чуртуңга уруг дүжүрер база үре-төл чок херээженнер турбас ^z; сээң назыныңны узадыр мен.

27 Чаалажып чеде бээриң чоннарның шуптузун аймаарадып, сүртедир мен база сээң дайзыннарыңның шуптузун сенден дезе бээр кылдыр кылып каар мен ^aa. 28 Улуг арыларны ^{▼▼ Азы: «Улуг коргуушкунну».} сенден мурнай чорудар мен ^ac, олар сээң мурнуңдан хиввейлерни, хананейлерни болгаш хеттерни сывырып чорудуптар. 29 Сээң мурнуңдан ол чоннарны чаңгыс эвес чыл дургузунда чоорту үндүр сывырар мен, оон башка чер ээнзиреп, шөлдерге черлик аң-мең өзүп-көвүдээш, сеңээ айыылдыг апаар ^ad. 30 Оларны сээң келген чериңден бичии-бичиилеп – сен өзүп-көвүдээш, бо черни ээлеп алгыжеңге чедир – үндүр сывырар мен. 31 Кызыл далайдан Филистим далайга ^{▼▼ Филистим далай – Чер ортузу далай.} чедир, ээн кургаг ховудан Евфрат хемге чедир черни сеңээ ээлээр девискээр кылдыр бээр мен ^af, ол черде чурттап турар улусту сеңээ аштырар кылдыр кылып каарымга, оларны сывырып чорудуптар сен. 32 Ол чоннар-биле-даа, оларның бурганнары-биле-даа керээ чарба. 33 Олар сээң чериңге чурттавас ужурлуг, оон башка сени Меңээ удур бачыт үүлгедир чорукче киире бээрлер; оларның бурганнарынга бараан болур болзуңза, бодуң дузакка туттуруп алганың ол-дур ^ag».