Exo 30 | TyvTUV | STEP | «Акация ыяжындан айдызаар өргүл бедигээжинден кылып аар сен.

‏ Exodus 30

Айдызаар өргүл бедигээжи

(Хост. 37:25-28)

1 «Акация ыяжындан айдызаар өргүл бедигээжинден кылып аар сен. 2 Ону дөрбелчин кылдыр кылыр сен: узуну болгаш дооразы бир кыры дурту, а бедии ийи кыры дурту болзун; ооң азыгларынга боду-биле тудуш чаңгыс мыйыстар турзун ^a. 3 Бедигээштиң кырын, кыдыгларын болгаш мыйыстарын арыг алдын-биле шап ал, а дескиндир алдын хаажыны кылып каг. 4 Бедигээштиң хаажызының адаанга, ийи кыдыынга ийи алдын дээрбектен кылып каг. Ол дээрбектерже көдүрткүүш-мергелер кедиргеш, айдызаар бедигээшти көдүрүп дажыглаар. 5 Бедигээштиң көдүрткүүш-мергелерин акация ыяжындан кылгаш, алдын-биле шап ал. 6 Оон бедигээшти ыдыктыг аптараның мурнунда азып каан көжеге баарынга салып каг ^b – ол бедигээш Мээң сээң-биле ужуражып кээрим халыптың дужунга турзун.

7 Аарон эртенниң-не, деңнерни белеткеп тура, айдызаар бедигээшке чаагай чыттыг чүүлдерден кыпсып, айдызазын. 8 Имир дүшкенде деңнерни кыпсып кээп тургаш, ол база катап айдызазын – ол чаагай чыттыг чүүлдерни Дээрги-Чаяакчының мурнунга салгалдан салгал дамчып, доктаамал айдызаар ужурлуг. 9 Айдызаар өргүл бедигээжинге ажыглаарын чөпшээревээн айдызаар чүүлдер кывыспаңар ^c; бүрүн өрттедир өргүлдер-даа, далган-тараа өргүлү-даа, арага өргүлү-даа кылбаңар. 10 Аарон чылда бир катап айдызаар бедигээштиң мыйыстары-биле арыглаашкын ёзулалын кылыр ужурлуг. Улустуң бачыттары дээш өргүлдүң ханы-биле ол бедигээштиң мыйыстарын чаап, ону чылда бир катап, салгалдан салгал дамчып арыглаар ужурлуг ^d. Ол айдызаар өргүл бедигээжи дээрге Дээрги-Чаяакчыга хамааржыр аажок ыдыктыг чүүл-дүр».

Ыдыктыг үндүрүг

11 Дээрги-Чаяакчы Моисейге мынча деп чугаалаан: 12 «Израиль чоннуң чизе-даңзызын тургузуп ^e, олар шупту чеже бооп турарын тодарадып, санаар үеде эр кижи бүрүзү Меңээ амы-тыны дээш төлевирден берзин. Оон башка санаашкын үезинде олар айыыл-халапка таваржыр ^f. 13 Чизелээшкинче кирип турар эр кижи бүрүзү ыдыктыг черге ажыглаар мөңгүн шекелдиң чартыын төлезин ^{▼▼ Ыдыктыг черге ажыглап турган шекел хүн бүрүнүң садыг-саарылгазынга ажыглап турганындан аар турган чадавас.}. (А мөңгүн шекелдиң деңзизи чээрби герага деңнежир турган.) ^h Ол чартык шекел дээрге Дээрги-Чаяакчыга салган онза өргүл-дүр ⁱ. 14 Чизелээшкинче кирип турар чээрби хардан өрү назылыг эр кижи бүрүзү Дээрги-Чаяакчыга ол өргүлдү салыр ужурлуг. 15 Бай-даа, ядыы-даа кижи чартык шекелден хөй-даа, эвээш-даа эвес мөңгүннү Дээрги-Чаяакчыга өргүл кылдыр бээр ужурлуг, ол дээрге амы-тыныңар дээш төлевир-дир. 16 Израильчилерниң шак ол төлевир акшазын чыып алгаш, ону Ужуражылга майгынынга хереглээри-биле ажыгла. Ол дээрге Дээрги-Чаяакчыга израиль чон дугайында сагындырыг-дыр, силер дээш долаа-дыр ^j».

Хүлер чунар сава

(Хост. 40:30-32)

17 Дээрги-Чаяакчы Моисейге мынча деп чугаалаан: 18 «Хүлер чунар савадан база ооң адаанга салыр хүлер дөжектен кылып алгаш, ону Ужуражылга майгыны биле өргүл салыр бедигээштиң аразынга тургускаш, сугдан кудуп каг ^k. 19 Аарон биле ооң оолдары аңаа холдарын, буттарын чуп ап турзуннар. 20 Олар Ужуражылга майгынынче кирер апарганда азы өргүл салыр бедигээшке бараан болуру-биле чоокшулап, Дээрги-Чаяакчыга салган өргүлдү өрттедир деп барганда, суг-биле чунуп алзыннар, оон башка өлүп каарлар. 21 Өлбес дээш, боттарының хол-буттарын чуп алзыннар. Ааронга болгаш ооң салгакчыларынга кезээ мөңгеде доктаадып каан дүрүм ол-дур».

Ыдыктыг олива үзү

22 Дээрги-Чаяакчы Моисейге мынча деп чугаалаан: 23 «Эң-не эки дээн чаагай чыттыг чүүлдерден ап ал. Деңзизи 500 шекел мирра деп дамдылаачал чуктан; ооң чартыы азы 250 шекел деңзилиг чаагай чыттыг корицадан; база-ла 250 шекел деңзилиг чаагай чыттыг кулузундан; 24 деңзизи 500 шекел кассия деп чуктан (ол бүгүнү ыдыктыг черге ажыглаар шекелге* хемчээр сен) база бир гин ишти олива үзүнден ап ал. 25 Ол бүгүден ыдыктыг шилип чаар олива үзүн – уран мергежилдиг кижиниң холуп кылыры дег үстү кылып каг ^l. 26 Ындыг олива үзү-биле Ужуражылга майгынын, ыдыктыг аптараны; 27 ширээни болгаш ооң хамык херекселдерин, чырыткыны болгаш ооң хамык херекселдерин, айдызаар бедигээшти; 28 бүрүн өрттедир өргүл бедигээжин болгаш ооң хамык херекселдерин, чунар саваны болгаш ооң дөжээн чаап каг ^m. 29 Ол бүгүнү ынчалдыр ыдыктап каг – олар ынчан аажок ыдыктыг чүүлдер болу бээр. Ол чүүлдерге дегген бүгү чүве ыдыктыг апаар ⁿ.

30 Ааронну болгаш ооң оолдарын шилип чаап каг ^o; олар Мээң бараалгакчыларым болур кылдыр ыдыктап каг. 31 А израиль чонга: „Бо холуксаа дээрге Дээрги-Чаяакчыга хамааржыр ыдыктыг шилип чаар олива үзү-дүр, ону салгалдан салгал дамчып ажыглаар силер – деп чугаала. – 32 Өске улустуң мага-бодун ооң-биле чаап болбас, ооң-биле дөмей тургузуглуг холуксааны бодуңарга кылбас ужурлуг силер. Ол дээрге ыдыктыг чүүл-дүр – ону ыдыктыг чүүл кылдыр көөр ужурлуг силер. 33 Ооң-биле дөмей тургузуглуг холуксаа кылыр азы бараалгакчы эвес кижини ооң-биле чаап каар кым-даа турар болза, ону чонунуң аразынга амылыг арттырбас ужурлуг“».

Чаагай чыттыг чүүл-биле айдызаары

34 Дээрги-Чаяакчы Моисейге мынча дээн: «Чаагай чыттыг чүүлдерден: стактадан, онихадан, халван дээр чуктан ап ал. Чаагай чыттыг чүүлдер-биле дең хемчээлдиг кылдыр арыг ладан дээр чуктан ап ал. 35 Ол бүгүден чаагай чыттыг үс белеткээринге мергежээн кижиниң холдары-биле холаан дег, дус холумактыг, айдызаарынга херек арыг база ыдыктыг холуксаадан кылып алгаш ^p, 36 ону үүредир соктап каавыт. Ол хоюг айдызаар чүүлдүң бир кезиин Ужуражылга майгынында ыдыктыг аптараның мурнунга ^{▼▼ Ыдыктыг аптараның мурнунга – айдызаар өргүл бедигээжинге дээн чадапчок.} салып каг, Мен шак аңаа сээң-биле ужуражып кээр мен. Ону аажок ыдыктыг чүүл кылдыр көөр ужурлуг силер. 37 Ол холуксааның тургузуун өттүндүр боттарыңарга айдызаар чүүлдер кылбаңар: силерге демги холуксаа Дээрги-Чаяакчыга хамааржыр ыдыктыг чүүл болзун. 38 Боду чыттаар дээш аңаа дөмей холуксаа кылып алыр кижини чонунуң аразынга амылыг арттырбас ужурлуг».