Exo 34 | TyvTUV | STEP | Дээрги-Чаяакчы Моисейге мынча дээн: «Бодуңга мурнундагы калбак даштар ышкаш ийи калбак даштан чондуруп ал. Мен ол калбак даштарга сээң буза шаап каапканың даштарга турган сөстерни оюп бижип каар мен.

‏ Exodus 34

Бурганның Израиль-биле чагыг-керээни чаартканы

(Ы. х. к. 10:1-4)

1 Дээрги-Чаяакчы Моисейге мынча дээн: «Бодуңга мурнундагы калбак даштар ышкаш ийи калбак даштан чондуруп ал. Мен ол калбак даштарга сээң буза шаап каапканың даштарга турган сөстерни оюп бижип каар мен. 2 Даарта эртен белен бол; эртен Синай дагже үнүп келгеш, даг бажынга Мээң мурнумга бараалгап туруптар сен ^a. 3 Кым-даа сээң-биле кады даг бажынче үнмезин, кым-даа ол дагга шуут көзүлбезин; шээр, бода малыңар безин ол даг чоогунга оъттавазын ^b».

4 Моисей биеэги даштар ышкаш ийи калбак даш чондуруп алгаш, эртен эрте тургаш, Дээрги-Чаяакчының дужааганын ёзугаар, Синай дагже үне берген. Ол ийи калбак дажын тудуп алгаш чораан. 5 Дээрги-Чаяакчы булут аразынга дүжүп келгеш, Моисейниң чанынга туруп алгаш, Бодунуң адын чарлаан. 6 Дээрги-Чаяакчы Моисейниң мурну-биле эрткеш, мынча деп чарлаан: «Дээрги-Чаяакчы мен – килеңнээчел эвес, кээргээчел, ээ көрнүүчел, өндүр улуг энерелдиг болгаш бүзүрелдиг Бурган мен! ^c 7 Мен Бодумнуң энерелимни муң-даа дугаар салгалга көргүзүп, улустуң кем-буруузун, кемниг херектерин, бачыттарын өршээп турар мен, ынчалза-даа буруулугларны кеземче чокка арттырбас мен база адаларның кем-буруузу дээш ажы-төлдү, ажы-төлдүң ажы-төлүн үшкү болгаш дөрткү салгал чедир кезедир мен ^d».

8 Моисей ол дораан доңгая кээп дүжүп, Бурганга мөгейгеш: 9 «Дээргим, бир эвес мен Сээң ээ көрнүүшкүнүңнү чедип алган болзумза, бистиң аравыска чоруп көрем, Дээргим! Ийет, бо чоннуң чөрүүзү кончуг-дур, ындыг-даа болза, бистиң бузуттарывысты болгаш бачыттарывысты өршээп көрем, бисти Бодуңнуң чонуң кылдыр хүлээп ап көрем» – дээн.

10 Дээрги-Чаяакчы мынча дээн: «Мен Израиль-биле чагыг-керээни чарып тур мен. Сээң бүгү чонуңнуң мурнунга чер-делегейге – кандыг-даа чоннарга мооң мурнунда болуп көрбээн кайгамчык чүүлдерни чаяар мен. Ынчан сени хүрээлээн бүгү улус Дээрги-Чаяакчының ажыл-херээн – Мээң сен дээш кайы хире кайгамчык херектер кылырымны көрүп каар. 11 Мээң бөгүн сеңээ дужаап турар чүүлдеримни күүсет. Мен ам сээң келген чериңден амор, хананей, хет, ферез, хиввей болгаш иевус чоннарны үндүр сывырар мен. 12 Көрдүң бе, чеде бээриң черниң чурттакчылары-биле керээ чарып, эвилелдешпе, оон башка олар сеңээ салган дузак дег апаар ^e. 13 Оларның өргүл салыр бедигээштерин үрегдеп бузуп, даш көжээлерин чуура шаап, Ашера бурганга тураскааткан адагаштарны кезип каавыт ^f. 14 Сен Дээрги-Чаяакчыдан өске бурганга мөгейбес ужурлуг сен, Ооң адын „Хүннээчел“дээр болдур ийин; хүннээчел Бурган-дыр ол ^g.

15 Шак ол черниң чурттакчылары-биле керээ чарып, эвилелдешпе, оон башка олар боттарының бурганнарын эдерип самыырааш, оларынга өргүл салып тура, сени база чалаарга, оларның өргүлге салган аъш-чемин чип аар сен ^h; 16 оон башка оларның кыстарын оолдарыңга кадай кылдыр ап бээр сен – ынчан оларның кыстары боттарының бурганнарын эдерип самыырааш, сээң оолдарыңны база бурганнарының аайы-биле самыыраашкынче киирип алыр ⁱ.

17 Бодуңга шуткаан дүрзү-бурганнар кылба ^j.

18 Ажыткы-биле хөөтпээн далганнар байырлалын сагы: Мээң дужааганым ёзугаар Авив айның доктааткан үезинде, чеди хүн дургузунда ажыткы-биле хөөтпейн быжырган далган-тараадан чи, чүге дээрге Авив айда Египеттен хосталып үнген болгай сен ^k.

19 Баштай төрүттүнген эр хиндиктиг төл бүрүзү Мээңии болур, сенде бар бода-даа, шээр-даа малдың бүгү эр дун төлдери база Мээңии болур ^l. 20 Элчигенниң дун төлүн хураган азы анай-биле солуп, садып хостаар ужурлуг, а бир эвес садып хоставас болзуңза, ооң мойнун сый шаап, өлүрүп каавыт. Силерниң дун оолдарыңарның шуптузун садып хостап ^{▼▼ 13:13-ке немелде тайылбырны көр.} алыңар.

Кым-даа Мээң мурнумга хол куруг келбес ужурлуг! ⁿ

21 Алды хүн дургузунда ажылда, а чедиги хүнде дыштан; тараа тарыыр, дүжүт ажаар үелерде безин чедиги хүнде дыштан ^o.

22 Кызыл-тастың баштайгы дүжүдү быжа бээрге, Чеди неделя байырлалын демдеглеп чор ^{▼▼ Чеди неделя байырлалы – еврей дылда «шавуот» дээр, «Беженги хүннүң байырлалы» азы «Баштайгы дүжүт байырлалы» деп аттарлыг, еврейлерниң Хосталыышкын байырлалы эрткенден бээр беженги хүнде демдеглээр байырлал (Хост. 23:16; Лев. 23:15 көр).}, а чыл төнүп турда, дүжүт ажаалдазының байырлалын демдеглеп чор.

23 Чылда үш катап сээң бүгү эр улузуң Израильдиң Бурганы, Дээрги-Чаяакчының мурнунга бараалгап келзин ^q. 24 Мен чоннарны сээң келген черлериңден дезеринче албадап, кызыгаарларыңны алгыдар мен. Чылда үш катап Дээрги-Чаяакчының мурнунга бараалгап кээр болзуңза, ол өйде кым-даа сээң чериңни эжелеп алыксавас.

25 Меңээ хан өргүп турар үеңде, ажыткылыг хлебти катай өргүве; Хосталыышкын байырлалында салган өргүлдүң кандыг-даа кезиин даартагы эртенге чедир арттырба ^r. 26 Сээң чериңниң дүжүдүнүң башкылыын Бурганың Дээрги-Чаяакчының өргээзинге эккеп бараалгат.

Анайны ооң авазының сүдүнге хайындырба ^s».

27 Дээрги-Чаяакчы Моисейге: «Бо сөстерни бодуңга бижип ал. Мээң сээң-биле база Израиль-биле чарып турарым чагыг-керээ дээрге бо сөстер ол-дур» – деп чугаалаан. 28 Моисей шак аңаа, Дээрги-Чаяакчының чанынга дөртен хүн-дүннү эрттирген ^t; ол өйде аъш-чем-даа чивээн, суг-даа ишпээн. Ол калбак даштарга он айтыышкынны – чагыг-керээниң бадыткал сөстерин бижип каан.

Моисейниң чырыткылыг арны

29 Моисей Синай дагдан чагыг-керээни бадыткаан ийи калбак дашты тудуп алгаш, бадып келген. Бурган-биле чугаалажып турган болгаш, арны херелдендир чырый бергенин ол боду билбээн ^u. 30 Аарон болгаш бүгү израиль чон Моисейниң арны чырып турарын көргеш, олче чагдаарындан коргуп турганнар. 31 А Моисей Ааронну болгаш ниитилелдиң бүгү баштыңнарын кый дептерге, олар аңаа чедип келгеннер; ол ынчан олар-биле чугаалашкан. 32 Ооң соонда бүгү израиль чон Моисейже чоокшулап кээрге, ол Дээрги-Чаяакчының Синай дагга аңаа чугаалаан бүгү айтыышкыннарын дамчыдып чугаалаан. 33 Моисей улус-биле чугаалашкан соонда, арнын шывыг-биле дуглап алган. 34 Ол Дээрги-Чаяакчы-биле чугаалажыр дээш Аңаа чеде берген санында-ла, Ужуражылга майгынындан үнмээн шаанда, шывыгны арнындан ап кааптар турган ^v. Кажан Моисей Дээрги-Чаяакчының айтыышкыннарын израильчилерге дамчыдар дээш үнүп кээрге, 35 израиль чон Моисейниң арны херелдендир чырый бергенин көрүп турган, ынчангаш ол Дээрги-Чаяакчы-биле дараазында чугаалажыышкынынга чедир арнын база катап шывыг-биле шып ап турган ^w.