Exo 38:1-7 | TyvTUV | STEP | Веселиил акация ыяжындан бүрүн өрттедир өргүл салыр бедигээшти кылып каан. Бедигээш дөрбелчин, ооң узуну болгаш дооразы беш кыры дурту, а бедии үш кыры дурту болган.

‏ Exodus 38:1-7

Өргүл салыр бедигээшти болгаш чунар саваны кылганы

(Хост. 27:1-8)

1 Веселиил акация ыяжындан бүрүн өрттедир өргүл салыр бедигээшти кылып каан. Бедигээш дөрбелчин, ооң узуну болгаш дооразы беш кыры дурту, а бедии үш кыры дурту болган. 2 Бедигээштиң дөрт азыынга, ооң-биле тудуш чаңгыс кылдыр, дөрт мыйысты кылып каан. Оон бедигээшти хүлер-биле шап каан. 3 Бедигээшке ажыглаар херекселдерни: хүл урар савалар, хүл-узарлар, хан кудар аяктар, илбектер болгаш көс дажыглаар хүүрекчигештерни – шуптузун хүлерден кылып каан. 4 Бедигээшке хүлер шишкиишти кылгаш, ону бедигээштиң хаажызының адаанга, шишкииш бедигээштиң ортузунга чедип турар кылдыр быжыглап каан. 5 Ол оон хүлер шишкииштиң дөрт азыынга көдүрткүүш-мергелер кедирер дөрт дээрбекти шуткуп кылып каан. 6 Көдүрткүүш-мергелерни акация ыяжындан кылгаш, оларны хүлер-биле шап каан. 7 Көдүрткүүш-мергелерни бедигээштиң ийи кыдыында дээрбектерге, ону көдүрүп дажыглаар дээш, кедирип каан. Өргүл салыр бедигээшти иштинде хос черлиг кылдыр, манзалардан кылып каан.