Eze 1 | TyvTUV | STEP | Үженги чылдың дөрт айның беште Кевар хемниң чанынга Иудеядан үндүр сывырткан улус аразынга турумда, дээр ажыттына берген ; мен Бурганның чоруткан көстүүшкүннерин көрүп турдум .

‏ Ezekiel 1

Бурганның шимчеп чоруур дүжүлгези

(Иез. 10:7-20)

1 Үженги чылдың ^{▼▼ Чүнүң үженги чылы дээрзи эки билдинмес. Болгу дег бир утказы: «Чуртталгамның үженги чылының».} дөрт айның беште Кевар хемниң чанынга ^b Иудеядан үндүр сывырткан улус аразынга турумда, дээр ажыттына берген ^c; мен Бурганның чоруткан көстүүшкүннерин көрүп турдум ^d. 2 Ол айның беште (Иудеяның хааны Иехонияның туттурганының бешки чылы чоруп турган чүве) ^e 3 меңээ, Вузийниң оглу, Бурганның бараалгакчызы Иезекиилге, халдей черде Кевар хемге Дээрги-Чаяакчыдан ажыдыышкын келген, аңаа Ооң холу мени башкарып эгелээн ^f.

4 Мен топтап көөрүмге, соңгу чүктен күштүг хат-казыргы ^g, чырыкка бүргеткен улуг булут, кызаңнаан от диргелип кел чытты. 5 Ол оттуң ортузунда чайынналчак кызыткан демир дег бир-ле чүве көзүлдү ^h база дөрт дириг амытан ышкаш чүвелер турду ⁱ. Оларның хевир-шырайы кижилерге дөмей, 6 чүгле кайызы-даа дөрт арынныг болгаш дөрт чалгынныг болду. 7 Оларның буттары хөнү, а майыктары бызаа майыы дег болду, олар кылаңнааш хүлер дег чайынналып турду ^j. 8 Олар чалгыннарының адаанда, дөрт талазында кижинии ышкаш холдарлыг болду. Дөртелээ арыннарлыг болгаш чалгыннарлыг, 9 а чалгыннары бирээзи өскези-биле дегжип турду. Дириг амытаннарның кайызы-даа мурнунче дорт бар чыдар, шимчээшкин үезинде эргилбес болду. 10 Оларның арын-шырайын көөрге, кайызы-даа мурнунда кижинии дег арынныг, оң талазында – арзылаңныы дег, а солагай талазында – буганыы дег, а артында – эзирнии дег арынныг чорду ^k. 11 Оларның арыннары ындыг хевирлиг, а чалгыннары үстүнде херли берген; кайызының-даа ийи чалгыны өскелериниң чалгыннары-биле ийи талазында дегжип турар, өске ийи чалгын мага-бодун шып турар ^l. 12 Оларның кайызы-даа мурнунче дорт шимчеп бар чыдар. Сүлде кайнаар баар-дыр, олар база ынаар, шимчээшкин үезинде эргилбейн, бар чыдар болду. 13 Ол дириг амытаннар чалбыыштыг көстер, чырыткылар ышкаш хевирлиг чүвелер бооп көзүлдү. Оларның аразында от соксаал чок шимчеп, чалбыышталыр болду, чаңнык оон кызаңайнып-ла турду ^m. 14 Дириг амытаннар ол-бо талаже дүрген шимчээрге, чаңныктың кызаңнааны дег чорду.

15 Мен дириг амытаннарже топтап көргеш, черде оларның чанында дөрт дугуй көрүп кагдым. Дугуйларның бирээзи-ле бир амытан дужунда турар болду. 16 Оларның хевири болгаш тургузуу мындыг: алдынналчак эртине даш ышкаш кылаңнажып турар ⁿ, дөртелээ шуут дөмей хевирлиг, дугуй бүрүзү өске дугуйнуң иштинде турар-даа дег тургузуглуг болду. 17 Дугуйлар шимчеп үнгенде, кайызы-даа мурнунче дорт бар чыдар, шимчээшкин үезинде эргилбес чорду. 18 Оларның куржаглары улуг бедик болгаш коргунчуг; шупту дөрт дугуйнуң куржаглары долгандыр карактар-биле шыва алдынган болду ^o.

19 Кажан дириг амытаннар шимчеп чоруптарга, оларның чанында дугуйлар база кады шимчеп чоруптар; олар черден көдүрлүрге, дугуйлар база көдүрлүр болду. 20 Сүлде кайнаар баар-дыр, олар база ынаар бар чыдар, а дугуйлар база олар-биле кады көдүрлүр турган, чүге дээрге оларның сүлдези дугуйларда болган. 21 Кажан дириг амытаннар шимчеп чоруптарга, дугуйлар база кады шимчеп чоруптар; кажан демгилери доктаарга, болары база доктаар турган, а кажан дириг амытаннар черден көдүрлүрге, дугуйлар база кады көдүрлүр турган, чүге дээрге оларның сүлдези дугуйларда болган.

22 Дириг амытаннарның баштарында кайгамчык чараш, кристалл дег кылаңнаан бопурук бир чүве бар болду ^p; ол чүве оларның үстүнде чаттылган чорду. 23 Бопурук чүве адаанда оларның чалгыннары бирээзи өскезинче дорт херли берген; ол ышкаш кайызы-даа мага-бодун шыпкан ийи чалгынныг чорду. 24 Дириг амытаннар шимчээрге, мен оларның чалгыннарының даажын дыңнап турдум, ол дааш шапкын агым сугнуң коолаанынга ^q, Күчүлүг Бурганның үнүнге, шериг турлагда дааш-шимээнге дөмей болду. Доктаагаш, олар чалгыннарын бадырып ап турду.

25 Дириг амытаннар доктаагаш, чалгыннарын бадырып аарга, оларның баштарының кырында бопурук чүведен үн дыңналды. 26 Оларның баштарында бопурук чүвениң кырында сапфир даштан кылган дүжүлгеге дөмей бир-ле чүве бар болду ^r, а ол дүжүлгеге дөмей чүвениң кырында кижи амытан дег хевирлиг бир Кижи саадап олурду ^s. 27 – 28 Топтап көөрүмге, Ол белинден өрү чалбыышка бүргеткен чайынналчак кызыткан демир ышкаш, а белинден куду – бир-ле от ышкаш көзүлдү ^t. Ону долгандыр чайынналган чырык чаъс соонда булуттарда челээш ышкаш болду ^u.