Ezekiel 11
Паш биле эът
1Бурганның Сүлдези мени көдүргеш a, Дээрги-Чаяакчының өргээзиниң чөөн чүкче көрүнген хаалгазынга эккелди b. Көөрүмге, хаалгаже кирер чер чанында чээрби беш кижи турар болду c. Оларның аразында чоннуң нояннары болур Азурнуң оглу Иазанияны, Ванеяның оглу Фалтияны көрдүм. 2Дээрги-Чаяакчы меңээ: «Кижи амытан, бузуттуг бодалдар бодап, хоорайда багай арга-сүме берип турар улус бо-дур. 3Олар: „Бажыңнар тудар таарымчалыг үе удавас чедип кээр эвес чүве бе? Бо хоорай паш дег, бис – ында эът дег бис ▼▼ Бо домактың утказы эки билдинмес. Олар, паштың эътти оттан камгалап турары дег, Иерусалимниң ханалары чонну дайзынның аг-шериинден камгалаар деп, чонну сорук киирип турар чадавас (Иез. 24:3-4 көр).
“– дижип турар-дыр. 4Ынчангаш сен оларга удур өттүр билип медегле, барып, медегле, кижи амытан» – дээн. 5Ооң соонда Дээрги-Чаяакчының Сүлдези менче бадып кээрге, Ол меңээ: «Дээрги-Чаяакчының чугаалаан чүвезин дамчыт: израиль чон, силерниң бодап турар чүвеңер бо ышкажыл; Мен силерниң бодалыңарга чүү кирип турарын билир мен. 6Силер бо хоорайга хөй улусту өлүрген силер, ооң кудумчуларынга мөчү-сөөктү оваалап каан силер» – дээн e. 7Ынчангаш Дээрги-Бурган-Чаяакчы мынча дээн: «Хоорай иштинде оваалай салып каан өлүрткен улузуңар дээрге эът-тир, а бо хоорай – паш-тыр; а силерни Мен оон үндүр сывырыптар мен. 8Силер дайын-чаадан коргуп турар силер, а Мен силерже дайын-чаа ыдар мен f – деп, Дээрги-Бурган-Чаяакчы медеглээн. – 9Мен силерни хоорайдан үндүр сывырыпкаш, хары улус холунга хүлээдип бээр мен, силерге онаашкан шииткелди үндүрер мен. 10Дайын-чаадан өлүр силер. Мен силерни Израильдиң девискээринге шиидер мен. Ынчан Мени Дээрги-Чаяакчы деп билип аар силер. 11Иерусалим силерге паш болбас, а силер ооң иштинде эът болбас силер; Мен силерни Израильдиң девискээринге шиидер мен. 12Ынчан Мени Дээрги-Чаяакчы деп билип аар силер; Мээң дүрүмнеримни сагывайн, Мээң хоойлуларымны күүсетпейн, силерни долгандыр чурттап турар чоннарның чаңчылдарын сагып чурттап турган-дыр силер». 13Мен өттүр билип медеглеп турар арамда, Ванеяның оглу Фалтия өлүп калган. Мен дискектенгеш, хаваамны черге дегзип: «О, Дээрги-Бурган-Чаяакчы! Израиль чоннуң артынчызын төнчүзүнге чедир чок кылыр деп бардың бе?» – деп алгыра аарак айтырдым g. Бурган Израильди катап тургузар
14Дээрги-Чаяакчы меңээ Бодунуң сөзүн ажыдып чугаалаан: 15«Кижи амытан, бодуңнуң ха-дуңмаңны, төрел чонуңну, сээң-биле кады туттуруушкунга турган улусту, бүгү израиль чонну бодап көр. Иерусалимде чурттап турар улус оларның дугайында: „Олар Дээрги-Чаяакчыдан ырап чоруй барган-дыр, бо черни ээлээр кылдыр оларга эвес, а биске берип каан-дыр“– дижип турар-дыр. 16Ынчангаш Дээрги-Бурган-Чаяакчының чугаалаан чүвезин дамчыт: оларны өске чоннар аразынче ырадыр чорудупкан-даа болзумза база өске чурттарже тарадыпкан-даа болзумза, өргээмниң орнунга Мен Бодум оларга элээн үеде ыдыктыг чер болур мен h. 17Оон Дээрги-Бурган-Чаяакчының чугаалаан бо чүвезин база дамчыт: Мен силерни өске чоннардан чыып, тарадып каапканым чурттардан дедир чандырар мен, израиль черни силерге эгидип бээр мен i. 18Мээң улузум чанып келгеш, мында турар бүгү бак, чүдек-бужар чүүлдерни чайладып кааптар. 19Мен оларга чаңгыс аай чүректи хайырлап j, оларны чаа сүлде-биле бүргээр мен; оларның дашталган чүрээн ап каапкаш, чымчак чүректи бээр мен k. 20Ынчан олар Мээң дүрүмнеримни сагыыр, Мээң хоойлуларымны барымдаалап, күүседир; олар Мээң чонум болур, а Мен – оларның Бурганы болур мен l. 21А сеткил-чүрээ боттарының чүдек-бужар, бак чүүлдеринге алыскан улустуң чедип алган чүвезин оларның бажынче халдадыр мен m». Дээрги-Бурган-Чаяакчының медеглээн чүвези ол-дур.Бурганның өндүр чырыының Иерусалимни каапкаш барганы
22Оон Израильдиң Бурганының өндүр чырыынга бүргеткен херувимнер чалгыннарын далбайтыпкаш, ужуп үнүпкен, дугуйлар база оларның чанында чораан n. 23Дээрги-Чаяакчының өндүр чырыы хоорай кырындан көдүрлүп чоруткаш, ооң чөөн талазында даг кырынга доктаай берген o. 24Оон көстүүшкүнге Бурганның Сүлдези мени көдүргеш p, халдей черде чурттадып каан израильчилерже аппарган. Ооң соонда мээң көрүп турган көстүүшкүнүм чиде берген. 25Мен бо черже көжүрткен израильчилерге Дээрги-Чаяакчының меңээ көргүскен бүгү чүвезин чугаалап берген мен.
Copyright information for
TyvTUV