Eze 13 | TyvTUV | STEP | Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 13

Бурганның меге медээчилерни шииткени

1 Дээрги-Чаяакчы меңээ Бодунуң сөзүн ажыдып чугаалаан: 2 «Кижи амытан, Израильдиң ам өттүр билип медеглеп турар медээчилеринге удур медегле. Боттарының даап бодаанын ёзугаар медеглээр ол медээчилерге ^a: „Дээрги-Чаяакчының сөзүн дыңнаңар!“– деп чугаала. 3 Оларга Дээрги-Бурган-Чаяакчының чугаалаан чүвезин дамчыт: боттарының бодалдарын эдерип, чүнү-даа көрбейн барган мугулай медээчилер ат болур! 4 Израиль, сээң медээчилериң бузундулар аразында шөө-бөрүлер дег-дир. 5 Медээчилер, ханада ойбактарда турбайн турар-дыр силер ^b база Дээрги-Чаяакчының шииткел хүнүнде израиль чон тулчуушкунга чайгылыш чок туржур кылдыр, оларны дуглай хана тутпайн турар-дыр силер ^{▼▼ Иезекиилдиң бо шүлүкте ажыглап турар овур-хевири дайын үезинде хоорайның камгалакчыларын көргүзүп турар. Кажан дайзын хананы оя шааптарга, камгалакчы шериглер ойбак черже барып, дайзынны дозуп, хоорайже киирбес турган.}. 6 Силерниң көрген көстүүшкүннериңер меге, чугаалаан ажыдыышкыннарыңар шын эвес ^d; Дээрги-Чаяакчы силерни айбылап чорутпайн турда-ла, „Дээрги-Чаяакчының медеглээн сөзү бо-дур“деп чугаалап ^e, сөзүңер бүдерин манап турар-дыр силер. 7 Көрген көстүүшкүннериңер хоозун-меге эвес деп бе? Мен чугаалаваан-даа болзумза, „Дээрги-Чаяакчының медеглээн сөзү бо-дур“дижип, шын эвес ажыдыышкыннар чугаалап турбаан силер бе?»

8 Ынчангаш Дээрги-Бурган-Чаяакчы: «Силерниң хоозун-меге сөстериңер дээш, шын эвес көстүүшкүннериңер дээш, Мен ам силерге удур апардым ^f – деп медеглээн. – 9 Хоозун-меге көстүүшкүннер көрүп, шын эвес ажыдыышкыннар медээлеп турар медээчилерже Мээң холум көдүрлүр. Олар ам Мээң чонумнуң чөвүлелинге киришпес, израильчилерниң чизе-даңзызынче киир бижитпес база израиль черже дедир чанмас ^g. Ынчан Мени Дээрги-Бурган-Чаяакчы деп билип аар силер ^h. 10 Ол медээчилер Мээң чонумну шын оруктан астыктырып, амыр-тайбың чок турда-ла, „Амыр-тайбың-дыр“дээр-дир ⁱ база чон быжыг эвес хана тудуп турда, ону чугай-биле чаап турар-дыр. 11 Ынчангаш хананы чугай-биле чаап турар улуска ооң буступ дүжерин чугаала. Суггур чаъс кудар, улуг долу чаар, кедергей шуурган көдүрлүр ^j, 12 хана оон буступ дүжер. Ынчан улус силерден: „Ону чаап турган чугайыңар кайыл?“– деп айтыра бербес бе?»

13 Ынчангаш Дээрги-Бурган-Чаяакчы мынча дээн: «Мен килеңней бергеш, кедергей шуурган көдүрер мен, хорадаарымга, суггур чаъс кудуп, улуг долу чаггаш, хананы бүрүнү-биле узуткап кааптар. 14 Чугай-биле чаап кааныңар хананы үреп бускаш, чер-биле деңнештир таптап кааптарымга, ооң таваа көстүп кээр. Хана буступ дүжерге, силер база ооң-биле кады өлүп каар силер. Ынчан Мени Дээрги-Чаяакчы деп билип аар силер ^k. 15 Ханаже база ону чугай-биле чаап турар улусче килеңим ынчаар кыптыгар. „Хана-даа, ону чугайлап турган улус-даа ам чок“– деп, силерге чугаалаар мен. 16 Амыр-тайбың чок турда-ла, Иерусалимге амыр-тайбың доктаар деп ажыдыышкыннар медеглеп турган Израильдиң медээчилери чок апаар». Дээрги-Бурган-Чаяакчының медеглээн чүвези ол-дур.

17 «А ам, кижи амытан, чонуңда боттарының даап бодап алганын ёзугаар өттүр билип медеглеп турар херээженнерже көрүп көр. Оларга удур медеглеп, 18 Дээрги-Бурган-Чаяакчының чугаалаан чүвезин дамчыт: бүгү улустуң холдарынга ^{▼▼ Өске бурунгу сөзүглелде «Мээң холдарымның бүгү чүстеринге» деп бижээн.} сугар билектээштер даарап база узуну аңгы-аңгы баш шывыглары кылып, кижилерниң амы-тынын илби-шиди-биле дузактап турар херээженнер, ат болур силер! Таанда-ла Мээң чонумнуң аразынга кижи амы-тыны дузактап тургаш, боттарыңарның амы-тыныңарны камгалап аар бодадыңар бе? 19 Силер каш адыш ишти арбай дээш база каш кескинди хлеб дээш ^m, Мээң чонумнуң аразынга Мени бак атка киирип, мегеңерни тооп дыңнап турар Мээң чонумну дуурайлап, өлбес ужурлуг улусту өлүмге онаап, амылыг артпас ужурлуг улусту амы-тынныг арттырып каар-дыр силер».

20 Ынчангаш Дээрги-Бурган-Чаяакчы мынча дээн: «Мен силерниң кижилер амы-тыны тудуп ап, дузактап турарыңар илби-шидилиг билектээштериңерге удур мен. Оларны холуңардан ушта тырткаш, тудуп ап турарыңар улусту, дузакка кирген куштар дег, хостап салыр мен. 21 Силерниң баштарыңар шывыгларын ора тырткаш, Бодумнуң чонумну силерниң холуңардан адырар мен, ол ам силерниң олча-тывыжыңар болбас. Ынчан Мени Дээрги-Чаяакчы деп билип аар силер. 22 Чөптүг-шынныг кижилерниң сеткил-хөңнүн аартырын күзевейн турумда-ла, боттарыңарның мегеңер-биле оларның сеткил-чүрээн муңгараткан силер, кем-буруулуг улусту бузут-бактыг оруктарындан ойталавас кылдыр деткип ⁿ, оларга амы-тынын камгалап аар арга бербейн турар силер ^o. 23 Ол бүгү дээш, силер моон соңгаар хоозун-меге көстүүшкүннериңер көрбес силер ^p, илби-шидиңер кылбас силер. Мен Бодумнуң чонумну силерниң холуңардан адырар мен. Ынчан Мени Дээрги-Чаяакчы деп билип аар силер».