Eze 16 | TyvTUV | STEP | Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 16

Израиль чон ашаанга шынчы эвес херээжен ышкаш

1 Дээрги-Чаяакчы меңээ Бодунуң сөзүн ажыдып чугаалаан: 2 «Кижи амытан, Иерусалимниң чонунга ооң чүдек-бужар чүүлдерин айтып көр ^a. 3 Сен Иерусалимге Дээрги-Бурган-Чаяакчының чугаалаан чүвезин дамчыт: сээң дазыл-дөзүң болгаш төрээн чериң – ханаан чер; сээң адаң – амор кижи, а иең – хет херээжен турган ^b. 4 Төрүттүнген хүнүңде сээң хиниңниң ужун шарываан, сени дус чажып, арыглаваан, суг-биле чугбаан, чөргекке орааваан. 5 Ол бүгүнүң бирээзин кым-даа сеңээ өршээлдиг сагыжындан кылып бербээн, кым-даа сенче кээргел-биле көрүнмээн. Харын сени ажык шөлче үндүр октапкан, төрүттүнген хүнүңде улус сээң амы-тыныңны херекке албаан.

6 Мен сээң чаның-биле эртип бар чыткаш ^c, ханыңда былчажып, тепкиленип чыдарыңны көрүп каан мен. Ханыңга былчажып чыдырыңда, „Амы-тынныг артар сен!“дээн мен, „Өлбес сен!“дээн мен. 7 Сени, хову-шөлдүң чечээ дег, өстүрүп каан мен. Сен өзүп келгеш, узап, кайгамчык чараш апарган сен; эмиглериң борбайып, бажың дүгү узай берген, ынчалза-даа чанагаш, шыптынмаан хевээр арткан сен.

8 Чаның-биле катап база эртип бар чыткаш, Мен сени көрүп каан мен: ынакшыыр үең келген болган. Мен сени чалгыным адаанга кызып ап ^d, чанагажыңны чажыра шуглап каан мен. Сеңээ даңгыраам бергеш, сээң-биле керээ чарып алган мен. Сен Мээңии апарган сен ^e – деп, Дээрги-Бурган-Чаяакчы медеглээн. – 9 Мен сээң ханыңны суг-биле чуггаш, мага-бодуңну чаагай чыттыг үс-биле чаап каан мен. 10 Мен сеңээ угулзалап даараан тон кедиргеш, будуңга чаражы кончуг идик кедирип каан мен. Сээң бажыңны чуга лён-биле шыпкаш, торгу думаалай кедирип каан мен. 11 Оон сени каасталгалар-биле шимеп кагдым: билектериңге билектээштер суккаш, мойнуңга каас илчирбежигештер азып кагдым; 12 кулааңга сыргалар, думчууңга сырга суп кагдым ^f, бажыңга каас-чараш дээрбек бөрт кедирдим. 13 Алдын-мөңгүн-биле каастанып алдың, чуга лён, торгу болгаш угулзалыг пөстерден даараан хептер кедип турдуң, аъш-чемиң – эң эки далган, ары чигири болгаш олива үзү турду ^g. Сен кайгамчык чараш апарып, кадын кижиниң өндүр-чаагайын чедип алдың. 14 Чараш-каазың дээш, чоннар аразынга алдар-адың нептерей берген, чүге дээрге сеңээ Мээң бергеним кайгамчык чараш каасталга, хевиң ачызында чараш-каазың тулган апарган болгай». Дээрги-Бурган-Чаяакчының медеглээн чүвези ол-дур.

15 «А оон сен бодуңнуң чараш-каазыңга идегээш, ат-алдарыңны ажыглап, самыырап эгеледиң ^h. Чаның-биле эрткен кижи бүрүзү-биле самыын чорук кылып, кым-биле-даа холбажыптар турдуң ⁱ. 16 Хевиңниң чамдыызын ап алгаш, бедик тейлерге бурганнарга мөгейиишкин кылыр каасталгалыг черлер туткаш, аңаа самыырап турдуң; ындыг чорук кажан-даа турбас ужурлуг. 17 Сеңээ бергеним, Мээң алдын-мөңгүнүмден кылган кайгамчык чараш каасталгаларың ап алгаш, бодуңга эр көжээ-дүрзүлер кылып ап, олар-биле самыырап турдуң ^j. 18 Бодуңнуң угулзалыг тоннарың ап алгаш, ол көжээ-дүрзүлерге кедирип кагдың, оларның мурнунга Меңээ хамааржыр олива үзүн, чаагай чыттыг чүүлдерни салып турдуң. 19 Мээң сеңээ берген аъш-чемимни: сени чемгерип турганым эң эки далган-тараа, олива үзү болгаш ары чигирин бодуңнуң дүрзү-бурганнарыңга берип ^k, чаагай чыттыг өргүл кылдыр өрттедип турдуң. Бүгү чүве ынчаар болуп турду». Дээрги-Бурган-Чаяакчының медеглээн чүвези ол-дур.

20 «Сен Меңээ төрүп берген оглу-кызыңны ап алгаш, дүрзү-бурганнарга өргүл кылдыр чиртип турдуң. Сээң самыыраашкының чедишпес болганы ол бе? 21 Мээң ажы-төлүмнү өлүргеш, дүрзү-бурганнарга өргүп турдуң ^l. 22 Чүдек-бужар чаңчылдарың база самыыраашкының кедереп турда, аныяк шааңны – чанагаш, шыптынмаан, ханыңда былчажып, тепкиленип чытканыңны сагынмадың.

23 Ат болур сен! – деп, Дээрги-Бурган-Чаяакчы медеглээн. – Ол бүгү бузуттуг үүлгедиглериң соонда, 24 бодуңга бедигээштер кылып ап, шөл бүрүзүнге бурганнарга мөгейиишкин кылыр черлер тудуп алдың. 25 Булуң бүрүзүнге бурганнарга мөгейиишкин кылыр черлер тудуп алгаш, бодуңнуң чараш-каазыңны бужартадып, чаның-биле эрткен кижи бүрүзүнге чыдып берип, самыыраашкының кедереп турду ^m. 26 Сен египетчилер-биле, эрзээ кончуг кожаларың-биле самыырааш ⁿ, Мээң килеңим кыптыктырып, самыыраарың кедереп турду. 27 Көр даан, Мен сенче холум аннып, сеңээ доктаадып каан девискээрни кызырып кагдым. Мен сени бужар аажы-чаңыңдан ыядып човай берген дайзыннарың – филистимнерге кара туразында аажылаар кылдыр хүлээдип бердим. 28 Сен ассирийлер-биле база самыырап турдуң ^o, ынчалза-даа ол база сеңээ чедишпес болду, ханар деп чүве билбес болдуң. 29 Халдей чер – садыгжылар чурту-биле самыыраарың кедерээн ^p, ынчалза-даа ол база сеңээ чедишпес болду.

30 Дөстүнмес самыын херээжен ышкаш, ол бүгүнү үүлгедип туруңда, сээң чүрээң кайы хире могап-турупкан ирги! – деп, Дээрги-Бурган-Чаяакчы медеглээн. – 31 Булуң бүрүзүнге бедигээштер кылып ап, шөл бүрүзүнге бурганнарга мөгейиишкин кылыр черлер тудуп ап тургаш, сен анаа яңган херээженге дөмей эвес болдуң, чүге дээрге төлевир албайн турдуң. 32 Сен болза бодунуң ашаанга өскерлип, өске ашактарже туралаан херээжен дег болдуң ^q. 33 Бүгү яңган херээженнер төлевир алыр болгай, а сен хандыкшааннарыңга бодуң белектер сөңнеп, олар сээң-биле самыыраар дээш, кайыын-даа болза кээр кылдыр, оларны садып ап турдуң ^r. 34 Сээң самыыраашкының өске херээженнернии ышкаш эвес болду: сени кым-даа сүрүп маңнавады, сен бодуң хандыкшааннарыңга төлевир берип турдуң, а сеңээ кым-даа төлевир бербеди. Ындыг чорууң-биле сен өскелерге дөмей эвес болдуң».

35 Ынчангаш, самыыраан Израиль, Дээрги-Чаяакчының сөзүн дыңна! 36 Дээрги-Бурган-Чаяакчы мынча дээн: «Акша-мөңгүнүңнү хандыкшааннарың дээш чарып ^{▼▼ Азы: «Эмин эрткен туралаашкының көргүзүп».}, шалдаңыңны оларга көргүзүп, олар-биле база бүгү чүдек-бужар дүрзү-бурганнарың-биле самыырааның дээш, ажы-төлүңнүң ханын төп, оларны дүрзү-бурганнарга өргүп турганың дээш, 37 Мен сээң таалап-ханып турганың бүгү хандыкшааннарыңны – ам ынакшып турарың-даа улусту, ам көөр хөңнүң чок-даа улусту кады чыыптар мен. Оларны чер болгандан сеңээ удур чыггаш ^t, сени оларның мурнунга шалдаңнаар мен, олар сээң бужарыңны көрүп каар ^u. 38 Мен сеңээ ашаанга өскерилген херээженнерге дег база кижи өлүрген улуска дег кеземче онаар мен ^v; хүннээнимден хорадап, килеңнээш, сээң ханың төгер мен. 39 Сени бодуңнуң хандыкшааннарыңга хүлээдип бээримге, олар сээң бедигээштериңни узуткап, бурганнарга мөгейиишкин кылыр черлериңни үреп бузуп каар; олар сээң хевиңни ушта тырткаш, чаражы кончуг каасталгаларыңны хунаап алгаш ^w, сени шыптынмаан, чанагаш кылдыр арттырып каар ^x. 40 Олар сеңээ удур хөй улус чыып эккелгеш, сени даштар-биле соп, хылыштар-биле одура шаап каар ^y. 41 Олар сээң бажыңнарыңны өрттедип ^z, сеңээ үндүрген шииткелди хөй күрүнелер көрүп турда, күүседир. Мен сээң самыыраашкыныңның төнчүзүн салыр мен ^aa, сен моон соңгаар хандыкшааннарыңга төлевир бербес сен.

42 Ооң соонда Мээң сеңээ удур килеңим намдай бээр ^ab, хорадаан сагыжым сенден чайлай бээр. Мен оожургап, сенче оон ыңай килеңневес мен. 43 Аныяк шааңны сагынмайн барганың дээш, ол бүгү-биле мени килеңнедип келгениң дээш, чедип алган чүвеңни бодуңнуң бажыңче халдадыр мен. Бодуңнуң өске чүдек-бужар чаңчылдарыңга самыыраашкынны чүге немеп алдың?» – деп, Дээрги-Бурган-Чаяакчы медеглээн.

Иерусалим кожа чурттардан дора

44 «Чугаазынга үлегер домактар ^ac ажыглаар улус сээң дугайыңда: „Авазы кандыгыл, уруу база ындыг болур“– деп боор. 45 Сен бодуңнуң аваңның ёзулуг уруу сен, а ол ашаандан база ажы-төлүнден ойталаан болгай, сен – угба-дуңмаларың ышкаш сен, а олар ашактарын база ажы-төлүн каапкан болгай. Силерниң иеңер хет херээжен, а адаңар – амор кижи ^ad. 46 Сээң угбаң – Самария; ол бодунуң уруглары-биле ^{▼▼ Уруглар – кол хоорайга хамааржыр чоок-кавы хоорай, суурлар.} сээң соңгу талаңга чурттап турган. А дуңмаң Содом бодунуң уруглары-биле сээң мурнуу талаңга чурттап турган ^af. 47 Сен чүгле оларның оруктарын эдерип, чүдек-бужар чаңчылдарын үлегерлеп ап турган эвес, а оон-даа дора бооп, бодуңнуң бүгү оруктарыңга олардан артык будалган сен ^ag. 48 Мен дириг Бодумнуң адым-биле даңгыраглап тур мен ^ah: Содом дуңмаң база ооң уруглары сээң база сээң уругларыңның үүлгедип турганы бузуттуг херектерни үүлгедип көрбээннер – деп, Дээрги-Бурган-Чаяакчы медеглээн. –

49 Содом дуңмаңның база ооң уругларының кем-буруузу бо-дур: олар улуургап, эмин эрттир тодуп, амыр-шөлээн чурттап тургаш ^ai, ядыы-түреңги, чединмес улуска дуза катпааннар. 50 Олар менээргенип, Мээң мурнумга чүдек-бужар херектер үүлгедип турган ^aj. Ону көргеш, Мен олардан ойталаан мен. 51 А Самария сээң бачыттарыңның чартыы хире безин бачыт үүлгетпээн. Сен оларны чүдек-бужар чаңчылдарың-биле ажып каапкан сен, үүлгедип турган чүдек-бужар херектериңни көөрге, сээң угба-дуңмаң актыг ышкаш көстүр-дүр ^ak. 52 Бак адың эдилээр сен, а угба-дуңмаңның байдалын экижидип каан-дыр сен ^{▼▼ Азы: «Сен угба-дуңмаңны буруудадып турган сен».}: бачыттарың оларныындан бужар болгаш, олар сенден актыг бооп көстүр-дүр. Ыятканыңдан арның кыссын, бодуңнуң бак адыңны эдилээр сен, чүге дээрге сээң чаныңга угба-дуңмаң актыг бооп көстүр-дүр.

53 Ынчалза-даа Мен Содомга база ооң уругларынга эки чолду эгидер мен, Самарияга база ооң уругларынга эки чолду эгидер мен. Оларга ышкаш, сеңээ база эки чолду эгидер мен ^am. 54 Сен ынчан бодуңнуң бак адыңны эдилеп, үүлгеткен бүгү чүвеңден ыядып човаар сен, угба-дуңмаң сени көргеш, аргалал алыр. 55 Сээң угба-дуңмаң – Содом болгаш ооң уруглары база Самария болгаш ооң уруглары биеэги байдалынче эглип кээр, сен база бодуңнуң уругларың-биле кады биеэги байдалыңче эглип кээр сен. 56 Улуургап турган үеңде Содом дуңмаң сеңээ кочуланчыг болган ^{▼▼ Азы: «Улуургап турган үеңде чугаа-сөзүңге Содом дуңмаң дугайында сактыр хире эвес турган сен».}. 57 Сээң үүлгеткен бузут-багың көстү бербээнде, ындыг турду. А ам сен бодуң арамей чонга ^{▼▼ Өске бурунгу сөзүглелде «Эдом чонга» деп бижээн.} болгаш ооң бүгү кожаларынга база филистим чонга – сени бак көрүп турар долгандыр хүрээлээн бүгү улуска – кочулал апарган-дыр сен. 58 Бодуңнуң самыыраашкының дээш, чүдек-бужар чаңчылдарың дээш кеземчени чүктээр сен». Дээрги-Чаяакчының медеглээн чүвези ол-дур.

59 Дээрги-Бурган-Чаяакчы мынча дээн: «Мен сени кылган үүлгедииң ёзугаар аажылаар мен, сен даңгырааңны тоовайн барып, чагыг-керээмни үрээн-дир сен. 60 Ынчанмыже Мен аныяаңда сээң-биле чарган чагыг-керээмни утпас мен ^ap, сээң-биле мөңге чагыг-керээни чарар мен ^aq. 61 Кажан Мен сээң угба-дуңмаңны, улуун-даа, бичезин-даа, ап алгаш, уругларың дег кылдыр сеңээ хүлээдип бээримге, эрткен оруктарың сактып келгеш, ыядып човаар сен ^ar. Ол бүгү Мээң сээң-биле чарган чагыг-керээмниң кезээ эвес-даа болза, Мен ынчаар кылыр мен. 62 Сээң-биле чарган чагыг-керээм катап база күштүг апаар, ынчан сен Мени Дээрги-Чаяакчы деп билип аар сен ^as. 63 Ынчан сээң үүлгеткен бүгү херектериңни арыглап каарымга, ону утпайн сактып, ыядып човаар база ыятканыңдан моон соңгаар аксың безин ажыдып шыдавас сен». Дээрги-Бурган-Чаяакчының медеглээн чүвези ол-дур.