Eze 17 | TyvTUV | STEP | Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 17

Виноград сывы болгаш ийи эзир

1 Дээрги-Чаяакчы меңээ Бодунуң сөзүн ажыдып чугаалаан: 2 «Кижи амытан, израиль чонга тывызык ыдып, бо угаадыглыг чугааны дамчыт. 3 Оларга Дээрги-Бурган-Чаяакчының чугаалаан чүвезин дамчыт:

Улуг далбагар чалгыннарлыг, селбегер шокар эзир
Ливан сынга ужуп келген ^a.
Ол бир пөштүң бажын сегирип алгаш,
4 ооң эң үстүнде чиирбейни сыккаш,
ханаан черже ^{▼▼ Азы: «Садыг-наймаа черинче».} эккеп, садыгжылар хоорайынга салып каан.
5 Эзир ол черниң бир үрезинин ап алгаш,
үнүш үнүүчел хөрзүнге, улуг суг чанынга олуртуп каарга ^c,
тал дег өзүп келген.
6 Үрезин өзүп үнгеш, саглагар, чавыс виноград сывы апарган ^d.
Ооң будуктары эзирже ээгип турган,
а дазылдары олуртуп каан черинге артып калган.
Үрезин ынчалдыр виноград сывы апарып,
адырланып, будук-бүрүленип, тарай берген.
7 Улуг далбагар чалгыннарлыг селбегер өске эзир база турган.
Демги виноград сывы бодунуң дазылдарын олуртуп каан черинден
ийиги эзирже шөйүп, ону суггарып, ажаар кылдыр,
будуктарын олче хере сунуп тур-ла!
8 Сыпты эки шөлге, улуг суг чанынга олуртуп каан,
ынчангаш ол будукталып, чимизин берип,
улуг-чаагай сып апарып шыдаар турган.

9 Дээрги-Бурган-Чаяакчының чугаалаан чүвезин дамчыт:

Ол сып чедиишкинниг болур бе?
Бирги эзир ону дазылы-биле тура тырткаш,
чимистерин үзе тыртып кааптарга, ол кадып калбас бе?
Ооң бүгү чаш будуктары кадып каар,
ону дазылы-биле тура тыртарда,
өндүр улуг күштүң-даа, хөй шеригниң-даа херээ чок.
10 Олуртуп каан-даа болза, ол чедиишкинниг болур бе?
Чөөн чүктүң изиг хады олче үрүптери билек, шуут кадып калбас бе?
Өзүп турган черинге кадып калбас бе? ^e»

11 Дээрги-Чаяакчы меңээ Бодунуң сөзүн ажыдып чугаалаан: 12 «Үймээнчи чонга: „Бо бүгүнүң чүү деп уткалыын билбезиңер ол бе?“– деп чугаала. Оларга мону дамчыт: Вавилоннуң хааны Иерусалимге келгеш, Иудеяның хаанын, ооң нояннарын тудуп алгаш, Вавилонче кады аппарганын көргүскени ол-дур ^f. 13 Вавилоннуң хааны Иудеяның хаанының хан төрелинден өске кижини шилип алгаш ^g, ооң-биле керээ чарып, даңгырак-биле хүлээндирип алган. Ол оон чурттуң баштың улузун база эдертип аппарган – 14 күрүне бажын чөпшүл доңгайтып, ооң соонда көдүрлүп шыдавайн баргаш, чүгле демги керээни сагып амыдыраар кылдыр аппарган. 15 Ынчалза-даа Иерусалимде чаа хаан Вавилоннуң хаанынга удур тура халыырын оралдажып ^h, аъттар болгаш хөй шериг дилеп аар дээш, бодунуң элчиннерин Египетче чорудупкан. Ол хаан чедиишкинниг болур бе? Ынчап турар кижи дириг артар бе? Керээ үрээш, ол дириг артар бе?

16 Мен дириг Бодумнуң адым-биле даңгыраглап тур мен ⁱ – деп, Дээрги-Бурган-Чаяакчы медеглээн, – ол хаан Вавилонга, ону дүжүлгеге олурткан хаанның черинге өлүп каар; ол хаан Вавилоннуң хаанынга берген даңгыраан үреп, ооң-биле чарган керээзин күш чок болдурган болгай. 17 Кажан Вавилоннуң хаанының аг-шерии бүзээлел чалдары кылып, бүзээлел суургалары тудуп ^j, хөй улусту кыргып-хыдыыры-биле белеткени бээрге, күштүг аг-шериглиг, хөй чоннуг фараон ол дайынга Иудеяның хаанынга дуза катпас ^k. 18 Бодунуң даңгыраан үрээни дээш, керээни күш чок болдурганы дээш, аазаашкын кылып, хол тудушкаш, дөмей-ле бо бүгүнү үүлгеткени дээш, ол хаан дириг артпас».

19 Ынчангаш Дээрги-Бурган-Чаяакчы мынча дээн: «Мен дириг Бодумнуң адым-биле даңгыраглап тур мен: ол хаан Мээң мурнумга берген даңгыраан, Мээң мурнумга чарган керээзин үрээн болгай; Мен ооң үүлгедиин бодунуң-на бажынче халдадыр мен. 20 Мен олче Бодумнуң четкимни чада салыр мен ^l, ол Мээң дузаамга туттуруп аар. Ооң Меңээ удур кылган өскерликчи чоруу дээш, ону Вавилонга эккеп шиидер мен. 21 Ооң дескен дайынчылары хылышка шаштырып аар, а дириг арткан улузун бүгү хаттар-биле тарадып кааптар мен ^m. Ынчан Дээрги-Чаяакчы Мээң мону чугаалаанымны билип аар силер».

22 Дээрги-Бурган-Чаяакчы мынча дээн:

«Мен Бодум ол пөштүң шыпшык бажындан чиирбей ап алгаш,
олуртуп каар мен;
пөштүң үстүкү будуктарындан чымчак чиирбей сып алгаш,
өндүр бедик дагга олуртуп каар мен.
23 Мен ону Израильдиң бедик даанга олуртуп каарымга ⁿ,
ол улгадып өскеш, тооруун бээр, улуг-чаагай пөш апаар,
янзы-бүрү чалгынныг куштар аңаа уя тудуп ап,
ооң будуктарының чаглаанга чурттай бээр ^o.
24 Мен, Дээрги-Чаяакчы, бедик ыяшты чавыс, а чавыс ыяшты бедик кылдыр
кылып турарымны арыгда бүгү ыяштар билип алзын.
Мен ногаан ыяшты кургадып,
а кургаг ыяшты чечектелдирип каар мен ^p.
Мен, Дээрги-Чаяакчы, чугаалаан сөзүмнү күүседир мен».