Eze 18 | TyvTUV | STEP | Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 18

Бачыт дээш хуу харыысалга

(Иез. 33:10-20)

1 Дээрги-Чаяакчы меңээ Бодунуң сөзүн ажыдып чугаалаан: 2 «Чүге силер израиль черге „Адалары шаңгыр кат чип турган, а ажы-төлүнүң дижи кагжаан ^a“дээн үлегер домакты ажыглап турар силер? ^b 3 Мен дириг Бодумнуң адым-биле даңгыраглап тур мен ^c – деп, Дээрги-Бурган-Чаяакчы медеглээн, – израиль черге улус моон соңгаар ол үлегер домакты чугаалавас апаар. 4 Билип алыңар, бүгү улустуң амы-тыны Меңээ хамааржыр: адазының-даа, оглунуң-даа амы-тыны Мээң эргемде болур. Бачыт үүлгеткен кижи боду өлүп каар ^d.

5 Кандыг-бир кижи актыг-шынныг бооп, шынныг база чөптүг чорук кылып чоруур дижик. 6 Ындыг кижи израиль чоннуң дүрзү-бурганнарынга мөргүвес, дагларга ол бурганнарга өргээн аъш-чемни чивес ^e, өске кижи кадайы-биле самыыравас ^f, бодунуң кадайының ай демдээ көөр үезинде ооң-биле чоокшулашпас ^g; 7 кымны-даа кызып-кыйбас, бодунга өрелиг кижиниң арттырып каан долаазын эгидип бээр ^h, улус үптевес, бодунуң аъш-чемин аштаан кижиге бээр, хевин чанагаш кижиге кедирер; 8 акша-мөңгүннү хөө алыр дээш чегдирбес, хуузун хавырбас ⁱ, бодунуң холун кемниг херек кылырындан тыртып чоруур, чаргылдашкан улусту чөптүү-биле шиидер; 9 Мээң хоойлуларымны сагыыр болгаш айтыышкыннарымны чүткүлдүү-биле күүседир. Ындыг кижи чөптүг-шынныг боор база ыяап-ла амылыг артар ^j – деп, Дээрги-Бурган-Чаяакчы медеглээн. –

10 – 11 А бир эвес ол кижиниң оглу дээрбечи ийикпе, азы өлүрүкчү кижи апарган, азы ачазының шуут кылбайн чорааны өске-даа ындыг янзылыг үүлгедиглер кылыр: дагларга дүрзү-бурганнарга өргээн аъш-чемни чиир, өске кижиниң кадайы-биле самыыраар; 12 ядыы-түреңги улусту кызып-кыяр, улус үптээр, бодунга өрелиг кижиниң арттырып каан долаазын эгитпес, дүрзү-бурганнарга мөгеер, чүдек-бужар чүүлдер үүлгедир; 13 акша-мөңгүннү хөө алыр дээш чегдирер, хуузун хавырар кижи дижик. Ындыг кижи амы-тынныг артар бе? Чок! Үүлгеткен бүгү чүдек-бужар чүүлдери дээш, ол ыяап-ла өлүп каар, бодунуң өлүмү дээш боду буруулуг болур ^k.

14 Ол багай кижи оолдуг болган дижик. Ооң оглу ачазының үүлгеткен бүгү бачыттарын көрүп, билгеш, ачазы дег эвес: 15 израиль чоннуң дүрзү-бурганнарынга мөгейбес, дагларга ол бурганнарга өргээн аъш-чемни чивес, өске кижиниң кадайы-биле самыыравас; 16 кымны-даа кызып-кыйбас, бодунга өрелиг кижиден долаа негевес, улус үптевес, бодунуң аъш-чемин аштаан кижиге бээр, хевин чанагаш кижиге кедирер; 17 ядыы кижиге кызагдал кылырындан бодунуң холун тыртып аар, акша-мөңгүннү хөө алыр дээш чегдирбес, хуузун хавырбас, Мээң айтыышкыннарымны күүседип, хоойлуларымны сагып турар болган дижик. Ол оол адазының бачыдының ужун өлбес; ол ыяап-ла амы-тынныг артар. 18 А ооң адазы бодунуң кем-буруузу дээш өлүп каар, чүге дээрге ол кижи улусту кызып-кыйып, ха-дуңмазын үптеп, бодунуң чонунуң аразынга бузут-бактыг чүве үүлгедип турган-дыр.

19 А силер: „Чүге оглу адазының кем-буруузун чүктевезил?“– деп айтырар-дыр силер ^l. Чүге дээрге оглу чөптүг база шынныг чорук кылып, Мээң бүгү дүрүмнеримни чүткүлдүү-биле сагып чоруур-дур. Ол ыяап-ла амы-тынныг артар. 20 Бачыт үүлгеткен кижи боду өлүп каар; оглу адазының буруузун чүктевес, адазы база оглунуң буруузун чүктевес ^m. Чөптүг кижиниң шынныг чоруу ооң бодунуу бооп артар, бузуттуг-бак кижиниң кем-буруузу база ооң бодунуу бооп артар ⁿ.

21 Кем-буруулуг-даа кижи, бир эвес бодунуң үүлгеткени бүгү бачыттарындан ойталаар болза, Мээң бүгү дүрүмнеримни сагып, чөптүг-шынныг чорук кылыр болза, ыяап-ла амы-тынныг артар, өлүп калбас. 22 Ооң үүлгеткен бүгү кемниг херектериниң чаңгызын-даа аңаа сагындырбас мен; ол кижи ам бодунуң кылып турар чөптүг-шынныг херектериниң ачызында амы-тынныг артар. 23 Таанда-ла кем-буруулуг кижиниң өлүмүн көргеш, Мээң сеткилим ханар деп бе? – деп, Дээрги-Бурган-Чаяакчы медеглээн. – Ооң бодунуң оруктарындан ойталап, амы-тынныг артып каарын күзеп турар эвес мен бе? ^o

24 А бир эвес чөптүг кижи бодунуң шынныг чоруундан ойталап, кемниг херек үүлгедир болза, бузуттуг-бак кижиниң үүлгедип турар бүгү чүдек-бужар чүүлдерин база кылыр болза, ол кижи амы-тынныг артар деп бе? Чок! Ооң кылган буянныг херектериниң чаңгызы-даа Мээң сагыжымга кирбес. Бодунуң кара сагыштыы дээш, үүлгеткен бачыттары дээш, ол кижи өлүп каар ^p.

25 А силер: „Дээргиниң оруу шынныг эвес“– дээр-дир силер. Израиль чон, дыңна! Мээң оруум канчап шынныг эвес болду? Силерниң оруктарыңар харын шынныг эвес болбаан деп бе?

26 Бир эвес чөптүг кижи бодунуң шынныг чоруундан ойталап, кемниг херектер үүлгедир болза, ол дээш өлүп каар; бодунуң үүлгеткен кем-буруузу дээш өлүп каар. 27 А бир эвес бузут-бактыг кижи бодунуң үүлгедип турганы кем-буруузундан ойталап, шынныг база чөптүг чорук кылыр болза, бодунуң амы-тынын камгалап аар. 28 Ол кижи бодунуң үүлгедип турганы бүгү кемниг херектерин көрүп кааш, олардан ойталап, бузут үүлгедирин соксадыр болза, амы-тынныг артар, өлүп калбас.

29 А израиль чон: „Дээрги-Чаяакчының оруу шынныг эвес!“– дээр-дир. Израиль чон, Мээң оруктарым канчап шынныг эвес болду? Силерниң оруктарыңар харын меге эвес деп бе? 30 Ынчангаш, израиль чон, Мен силерниң кайыңарны-даа бодунуң оруктары дээш шиидер мен – деп, Дээрги-Бурган-Чаяакчы медеглээн. – Бачыдыңар минниңер! Бүгү кемниг херектериңерден ойталаңар, бузудуңар силерге моондак апарбас болзун ^q. 31 Үүлгедип турар бүгү бачыттарыңарны артыңарга кааптыңар, сеткил-чүрээңерни, сүлдеңерни чаартып алыңар ^r; израиль чон, чүге өлүр ужурлуг сен? 32 Кымның-даа болза өлүмүн көргеш, Мээң сеткилим ханмас – деп, Дээрги-Бурган-Чаяакчы медеглээн. – Бачыдыңар билингеш, амы-тынныг артып калыңар!»