Eze 20 | TyvTUV | STEP | Туттуруушкунувустуң чедиги чылының беш айның онда израиль чоннуң баштыңнарының чамдыызы Дээрги-Чаяакчыдан чүве айтырар дээш, мээң мурнумга кээп олуруп алган .

1 Туттуруушкунувустуң чедиги чылының беш айның онда израиль чоннуң баштыңнарының чамдыызы Дээрги-Чаяакчыдан чүве айтырар дээш, мээң мурнумга кээп олуруп алган ^a.

2 Дээрги-Чаяакчы меңээ Бодунуң сөзүн ажыдып чугаалаан: 3 «Кижи амытан, Израильдиң баштыңнары-биле чугаалажып, оларга Дээрги-Бурган-Чаяакчының чугаалаан чүвезин дамчыт: силер Менден чүве айтырып келдиңер бе? ^b Мен дириг Бодумнуң адым-биле даңгыраглап тур мен ^c: силерге харыы бербес мен – деп, Дээрги-Бурган-Чаяакчы медеглээн. – 4 Кижи амытан, оларны шиидеринге белен сен бе? Шиидеринге белен сен бе? ^d Ындыг болза, оларга ада-өгбезиниң чүдек-бужар чүүлдерин айтып ^e, 5 Дээрги-Бурган-Чаяакчының чугаалаан чүвезин оларга дамчыт: Израильди шилип алганым хүнде Мен Иаковтуң салгалы болур чонга даңгырак берип, Египетке оларга Бодумну ажыткан мен. Даңгырак берип, оларга: „Мен – Дээрги-Чаяакчы, Бурганыңар-дыр мен“– деп чугаалаан мен ^f. 6 Ол хүн оларны Египеттен үндүргеш, Мээң оларга көрүп бергеним, сүт биле ары чигири агып чыдар байлак, бүгү черлерниң эң каазы болур черже чедире бээрин аазаан мен ^g. 7 Оларга: „Чарашсынып магадаар чүдек-бужар дүрзүлериңерден шуптуңар ойталаңар, Египеттиң дүрзү-бурганнары-биле бодуңарны бужартатпаңар ^h. Мен – Дээрги-Чаяакчы, Бурганыңар-дыр мен“– деп чугаалаан мен.

8 Ынчалза-даа олар Меңээ удур тура халышкаш, Мени тооп дыңнавайн барганнар; кайызы-даа чарашсынып магадаары чүдек-бужар дүрзүлеринден ойталавайн барган, Египеттиң дүрзү-бурганнарын кагбаан. Мен ынчан килеңимни оларже кыптыктырарымны, хорадаан сагыжымны египет черге оларга удур ыдарымны шиитпирлээн мен. 9 Ындыг-даа болза, Мен Бодумнуң адымны бодааш ⁱ, ол ат оларның аразында израильчилерниң чурттап турары чоннар мурнунга баксыравазын дээш, ынчаар кылбаан мен. Мен ол чоннар көрүп турда, израильчилерге Бодумну ажыдып, оларны египет черден үндүре берген болгай мен.

10 Мен израильчилерни Египеттен үндүре бергеш, ээн кургаг ховуга эккелген мен ^j. 11 Оларга Бодумнуң айтыышкыннарымны берип, хоойлуларымны чарлаан мен, чүге дээрге ол хоойлуларны күүседип турар кижи оларның ачызында амылыг артар ^k. 12 Бистиң аравыста харылзааның демдээ кылдыр, оларны Мен, Дээрги-Чаяакчы, ыдыктап турарымны билип алзын дээш ^l, Меңээ тураскааткан амыр-дыш хүннерин оларга берген мен ^m.

13 Ынчалза-даа израиль чон ээн кургаг ховуга Меңээ удур тура халышкан: Мээң айтыышкыннарымны сагываан, хоойлуларымны хүлээп көрбээн – а ол хоойлуларны күүседип турар кижи оларның ачызында амы-тынныг артар; олар Меңээ тураскааткан амыр-дыш хүннерин дыка-ла бужартаткан ⁿ. Ынчангаш Мен ээн кургаг ховуга килеңимни оларже кыптыктырарымны, оларны узуткап каарымны шиитпирлээн мен ^o. 14 Ындыг-даа болза, Мен Бодумнуң адымны бодааш, израильчилерни Египеттен үндүрүп турумда, көрүп турган чоннар мурнунга адым баксыравазын дээш, ынчанмаан мен. 15 Харын-даа Мен оларга белеткеп кааным сүт болгаш ары чигири агып чыдар байлак черже, бүгү черлерниң эң каазы болур черже оларны киирбезимни ээн кургаг ховуга даңгыраглаан мен ^p. 16 Чүге дээрге олар Мээң хоойлуларымны хүлээп көрбээн, Мээң айтыышкыннарымны сагываан болгаш Меңээ тураскааткан амыр-дыш хүннерин бужартадып турган; оларның сеткил-чүрээ боттарының дүрзү-бурганнарынга бердинген турган ^q. 17 Ынчалза-даа Мен оларже кээргел-биле көрүп, чок кылбайн барган мен, оларны ээн кургаг ховуга узуткап кагбаан мен.

18 Мен ээн кургаг ховуга оларның ажы-төлүнге: „Ада-өгбеңерниң дүрүмнерин эдербеңер, оларның доктаалдарын сагываңар ^r, боттарыңарны оларның дүрзү-бурганнары-биле бужартатпаңар ^s. 19 Мен, Дээрги-Чаяакчы – – силерниң Бурганыңар-дыр мен; Мээң айтыышкыннарымны сагыңар, Мээң дүрүмнеримни чүткүлдүү-биле күүседиңер ^t. 20 Бистиң аравыста харылзааның демдээ кылдыр Меңээ тураскааткан амыр-дыш хүннерин ыдыктыг деп көрүңер ^u. Мени Дээрги-Чаяакчы, Бурганыңар деп билип алыр силер“– дээн мен.

21 Ынчалза-даа оларның ажы-төлү база Меңээ удур үймээн үндүрген ^v: Мээң айтыышкыннарымны сагывастаан, Мээң хоойлуларымны күүседир дээш чүткүвестээн – а ол хоойлуларны күүседип турар кижи оларның ачызында амы-тынныг артар болгай; олар Меңээ тураскааткан амыр-дыш хүннерин бужартадып турганнар. Ынчангаш Мен ээн кургаг ховуга килеңимни оларже кыптыктырарымны, хорадаан сагыжымны оларга удур ыдарымны шиитпирлээн мен. 22 Ынчалза-даа Мен холумну узуткаашкындан тыртып, Бодумнуң адым дээш, израильчилерни Египеттен үндүрүп турумда, көрүп турган чоннар мурнунга адым баксыравазын дээш, ынчанмаан мен. 23 Мен ол ышкаш ээн кургаг ховуга оларны өске чоннар аразынга тоо быдарадып, хары чурттарже тарадып кааптарымны даңгыраглаан мен ^w. 24 Чүге дээрге олар Мээң хоойлуларымны күүсетпейн, айтыышкыннарымны хүлээп көрбейн турган; Меңээ тураскааткан амыр-дыш хүннерин бужартадып, боттарының ада-өгбезиниң дүрзү-бурганнарын чарашсынып магадап турганнар. 25 Ынчангаш Мен оларга багай дүрүмнерни база оларның амы-тынын камгалап шыдавас хоойлуларны эдерерин чөпшээрээн мен ^x. 26 Оларга боттарының өргүл салыышкыннарын дамчыштыр бужартаарын, дун оолдарын өргүүрүн чөпшээрээн мен ^y – оларны хоозурадыр дээш, Мени Дээрги-Чаяакчы деп билип алзыннар дээш ынчалдым ^z.

27 Ынчангаш, кижи амытан, израиль чон-биле чугаалажып, Дээрги-Бурган-Чаяакчының оларга чугаалаан чүвезин дамчыт: ада-өгбеңерниң Меңээ удур кара сагыш сеткип, Мени бак сөглеп турганы мындыг база болган. 28 Мен оларны бээр бооп даңгыраглаан черимче эккелдим. А олар бедик тей азы улуг хөлегелиг ыяш көрүп кааш-ла, аңаа өргүлдер кылып, Мээң килеңим оттурар өргүл белектери салып, чаагай чыттыг чүүлдер кыпсып, арага өргүлдери чажып турду ^aa. 29 Мен олардан: „Бо чүү ындыг бедик черже барып турарыңар ол?“– деп айтырган мен. (Ол бедик черни амдыгаа чедир Бама ^{▼▼ Бама – бедик чер дээн уткалыг сөс. Дүрзү-бурганнарга мөгейиишкин кылыр черни көргүзүп турар.} деп адап турар.)

30 Ынчангаш израиль чонга Дээрги-Бурган-Чаяакчының чугаалаан чүвезин дамчыдар сен: ада-өгбеңерниң үлегер-чижээ-биле боттарыңарны бужартадып, оларның чүдек-бужар дүрзү-бурганнары-биле самыыраар силер бе? 31 Өргүл белектерин эккеп, ажы-төлүңерни өргүп, от өттүр эрттирип турарыңар дээрге-ле боттарыңарны бүгү дүрзү-бурганнарыңар-биле биеэги хевээр бужартадып турарыңар ол-дур ^ac. Израиль чон, Менден чүве айтырып кээп шыдаар бис деп бодап тур силер бе? ^ad Мен дириг Бодумнуң адым-биле даңгыраглап тур мен ^ae: силерге харыы бербес мен! 32 Силер: „Бүгү өске чоннар ышкаш, өске чер чурттуг аймактар ышкаш, ыяш биле дашка бараан болур бис ^af“– дээр-дир силер. Ынчалза-даа силерниң угаан-бодалыңарга кирген ол чүве канчап-даа боттанмас.

33 Мен дириг Бодумнуң адым-биле даңгыраглап тур мен – деп, Дээрги-Бурган-Чаяакчы медеглээн. – Силерни күштүг холум, күчү-күжүм болгаш кыптыккан килеңим-биле чагырар мен ^ag. 34 Силерни күштүг холум, күчү-күжүм болгаш кыптыккан килеңим-биле тарадып чорудупканым өске чоннар аразындан, хары чурттардан үндүре бергеш, чыып эккээр мен ^ah. 35 Мен силерни өске чоннарга хамааржыр ээн кургаг ховуже эккелгеш ^ai, силер-биле удур-дедир көржүп алгаш, чаргылдажыр мен. 36 Силерниң ада-өгбеңер-биле египет черде ээн кургаг ховуга чаргылдажып турганым дег ^aj, силер-биле база чаргылдажыр мен – деп, Дээрги-Бурган-Чаяакчы медеглээн. – 37 Мен силерни Бодумнуң шыкпыыжым-биле хай деп чагырар мен, чагыг-керээмниң кинчизи-биле бектээр мен. 38 Мен силерден үймээнчи, Меңээ удур тура халаан улусту аңгылаар мен. Ам турар черинден Мен оларны үндүре берзимзе-даа, олар израиль черже кирбес ^ak. Ынчан Мени Дээрги-Чаяакчы деп билип аар силер.

39 Израиль чон, силерниң дугайыңарда Дээрги-Бурган-Чаяакчы мынча деп турар-дыр: боттарыңарның дүрзү-бурганнарыңарга бараан болуп барыңар-ла! Ынчалза-даа моон соңгаар Мени тооп дыңнаар силер, Мээң ыдыктыг адымны өргүлдериңер болгаш дүрзү-бурганнарыңар-биле бужартадып шыдавас силер ^al. 40 Чүге дээрге Мээң ыдыктыг даамга, Израильдиң бедик даанга ^am бүгү израиль чон, чер кырында чеже санныг болдур, Меңээ бараан болур – деп, Дээрги-Бурган-Чаяакчы медеглээн. – Чонумну Мен аңаа хүлээп аар мен; силерниң өргүлдериңерни, баштайгы дүжүдүңерни бүгү ыдыктыг өргүлдериңер-биле кады аңаа негеп аар мен. 41 Силерни өске чоннар аразындан үндүре бергеш, силерни тарадып каапканым чурттардан чыып эккелгеш ^an, ол чоннар көрүп турда, силерниң араңарга Бодумнуң ыдыктыымны көргүскеш ^ao, силерни чаагай чыттыг өргүл дег кылдыр хүлээп аар мен. 42 Силерни израиль черже – силерниң ада-өгбеңерге бээр бооп даңгыраглаан черимче ^ap – киире бээримге, Мени Дээрги-Чаяакчы деп билип аар силер. 43 Аңаа боттарыңарны бужартадып турган бүгү оруктарыңар болгаш херектериңерни сактып кээр силер, үүлгедип турган бузут-багыңар ужун боттарыңардан ческинер силер ^aq. 44 Израиль чон, кажан Мен, бузут-бактыг оруктарыңар болгаш самыыргай херектериңер бар-даа болза ^ar, Бодумнуң адым дээш, силерге эки чүүл кылырымга, Мени Дээрги-Чаяакчы деп билип аар силер». Дээрги-Бурган-Чаяакчының медеглээн чүвези ол-дур.

Мурнуу чүкке отту кыпсыры

45 Дээрги-Чаяакчы меңээ Бодунуң сөзүн ажыдып чугаалаан: 46 «Кижи амытан, мурнуу чүкче шиглей көрүнгеш, мурнуу чүкте черлерге удур медегле, Негевтиң арга-эзиминге удур өттүр билип медегле. 47 Негевтиң арга-эзиминге Дээрги-Бурган-Чаяакчының чугаалаан сөзүн дамчыт: көр даан, Мен сээң иштиңге от кыпсыр деп тур мен ^as, ол от сээң ногаан-даа, кургаг-даа бүгү ыяштарыңны чиптер ^at, чалынналган чалбыыш өшпес, мурнуу чүктен эгелээш, соңгу чүкке чедир бүгү улустуң арыннары аңаа чиртип аар ^au. 48 Кижи бүрүзү Мээң, Дээрги-Чаяакчының, ону өрттеткенимни көрүп каар, ол чалбыыш черле өшпес ^av».

49 Мен ынчан: «О, Дээрги-Бурган-Чаяакчы! Улус меңээ: „Ол медээчи чүгле тывызык чугаалар-биле чугаалап туруп берди“– деп тур» – дээн мен ^aw.