Eze 21 | TyvTUV | STEP | Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 21

Бурганның хынындан ужулган хылыжы

1 Дээрги-Чаяакчы меңээ Бодунуң сөзүн ажыдып чугаалаан: 2 «Кижи амытан, Иерусалимче шиглей көрүнгеш, ыдыктыг черлерге удур медегле, израиль черге удур өттүр билип медегле ^a. 3 Дээрги-Чаяакчының чугаалаан чүвезин аңаа дамчыт: Мен сеңээ удур апардым. Хылыжымны хынындан ужулгаш ^b, сээң чөптүг-даа, бузуттуг-даа улузуңну узуткап каар мен ^c. 4 Чөптүг-шынныг-даа, бузуттуг-даа улусту узуткап каар болганымда, Мээң хылыжым мурнуу чүктен эгелээш, соңгу чүкке чедир бүгү улуска удур көдүрлүр ^d. 5 Кижи бүрүзү Дээрги-Чаяакчы Мээң хылыжымны хынындан ужулганымны, ол ам хынче дедир кирбезин билип аар.

6 А сен, кижи амытан, човуурта! Улус мурнунга сеткил-чүрээң кедергей кударап, сарынналып човуурта! 7 Кажан олар: „Чүге човууртап тур сен?“– деп айтырарга ^e, „Дыңналып келген медээден“– деп харыылаар сен. Чүрек бүрүзү кортканындан шапкыланыр, холдар салдына бээр, сагыш-сеткил бүрүзү харыксырап каар, дискек бүрүзү, бырлаңнаан суг дег, сирилээр ^f. Медээлээн халап албан боттаныр». Дээрги-Бурган-Чаяакчының медеглээн чүвези ол-дур.

8 Дээрги-Чаяакчы меңээ Бодунуң сөзүн ажыдып чугаалаан: 9 «Кижи амытан, өттүр билип медеглеп, Дээргиниң чугаалаан чүвезин дамчыт:

Хылыш – чидидип, кылайтыр чүлгүп каан хылыш бар; ^g
10 кыргып-хыдызын дээш чидидип,
чаңнык ышкаш кызаңназын дээш, кылайтыр чүлгүп каан хылыш бар.
Канчап өөрүүр бис? Мээң ажы-төлүм кандыг-даа кеземчени тоовас-тыр! ^{▼▼ Бо шүлүктүң утказы эки билдинмес. Еврей дылдан дорт очулдурарга: «Мээң оглумнуң даянгыыжының кандыг-даа ыяшты херекке албайн турары дээш өөрүүр бис бе?» – дээн.}
11 Ол хылышты дайзын тудуп аар кылдыр кылайтыр чүлгүп каан,
ону узуткакчыга тутсур дээш чидидип, кылайтыр чүлгүп каан.
12 Кижи амытан, човууртап, ишкирнип ыгла,
чүге дээрге ол хылыш Мээң чонумга, Израильдиң бүгү нояннарынга удур көдүрлүр;
оларны Мээң чонум-биле кады кыргыдып-хыдытсын дээш хылышка каап бээр;
ынчангаш качыгдалдан бажың шаштын.
13 Шылгалда ыяап-ла кээр:
а бир эвес улус кеземчени тоовас болза, канчаарыл?
Ындыг чүве турбас ужурлуг!»
Дээрги-Бурган-Чаяакчының медеглээн чүвези ол-дур.

14 «Кижи амытан, өттүр билип медегле,
хорадааның илередип, адыштарың часкан.
Хылыш хөй катап соксун – ол дээрге улусту узуткаар,
өндүр улуг кыргып-хыдыышкын кылыр хылыш-тыр,
оларны бүгү чүктен өттүр шанчар хылыш-тыр.
15 Оларның чүректери кортканындан шапкыланыр, кырдырган улус хөй болур.
Хылыштың бизин Мен бүгү хаалгаларга үстүртүп каар мен.
Ол боор! Чаңнык ышкаш кызаңнаан,
кыргып-хыдызын дээш чидидип каан хылыш ол-дур!
16 Хылыш, оң талаңче шаш-ла! Солагай талаңче сок-ла!
Бизиң углаан черже шаш-ла!
17 Мен база адыш часкап, килеңим хандырар мен.
Мен, Дээрги-Чаяакчы, ону чугааладым».

18 Дээрги-Чаяакчы меңээ Бодунуң сөзүн ажыдып чугаалаан: 19 «Кижи амытан, Вавилоннуң хаанының хылыжы чоруп болгу дег ийи оруктан даап бодап, чуруп ал; олар ийилээн чаңгыс черден үнүпсүн. Оруктарның эгезинге аңгы хоорайларже айыткан орук демдээн тургузуп каг. 20 Хылыштың чоруп болгу дег оруктарын даап бодап, чуруп ал: бир орук аммон чоннуң найысылал хоорайы Равваже ⁱ, өске орук – Иудеяже, быжыглалдыг Иерусалимче барзын. 21 Чүге дээрге Вавилоннуң хааны ийи оруктуң белдиринге, адырланып чарлыр черинге доктаагаш, төлге кылыр-дыр. Хаан согуннарын силгип-чайып, ап чорааны дүрзү-бурганнардан айтырып, өргээн малының баарын шинчип көөр-дүр. 22 Ооң холунче „Иерусалимче“деп айыткан төлге кирер-дир – ол аңаа дайынчы алгы үндүрүп, кыргып-хыдыышкынче кыйгырар, хана буза үстүрер чепсектер тургузар, хоорайны дескиндир чалдар кылыр, бүзээлел суургалары тудар ^j. 23 Берген даңгырактар ужун иудейлерге ол төлге мегелеп турар ышкаш боор, ынчалза-даа хаан оларның кем-буруузун сагындыргаш, оларны тудуп алгаш баарын шиитпирлээр».

24 Ынчангаш Дээрги-Бурган-Чаяакчы: «Бир-тээ, силер ажык үймээн үндүрүп, ооң-биле кем-буруулууңарны сагындырып, кылып турар бүгү херектериңер-биле бачыттарыңарны ажыдып турар болганыңарда, ол бүгүнү боттарыңар сагындырганыңар дээш, дайзын силерни тудуп алгаш баар» – деп чугаалаан.

25 – 26 «А сен, Израильдиң бужар-бак чагырыкчызы ^k, шииттирер хүнүң келген-дир, бүрүн кеземче көөр шагың четкен-дир ^l – деп, Дээрги-Бурган-Чаяакчы чугаалаан. – Бажыңда оваадайың – дүжүлге демдеглээн бөргүң уштуп салып каг. Моон соңгаар ооң мурнунда турганы дег болбас: базындырганнар көдүрлүр, бедээннер базындырар ^m. 27 Узуткаашкын, узуткаашкын, узуткаашкын! Ынчалза-даа узуткаар эргелиг кижи келбээн шаанда, ындыг чүве болбас ^{▼▼ Азы: «Бо чурт ам, бүрүн эргелиг кижи келбээн шаанда, катап тургустунмас; Мен ол кижиге ону бээр мен».}».

Аммон чонга удур өттүр билген медеглел

28 «Кижи амытан, өттүр билип медеглеп, Дээрги-Бурган-Чаяакчының аммон чонга ^o болгаш ооң бак сөглээшкиннеринге хамаарыштыр чугаалаан чүвезин дамчыт:

Хылыш, кыргып-хыдызын дээш хынындан ужулган,
узутказын дээш, чаңнык ышкаш кызаңназын дээш,
кылайтыр чүлгүп каан хылыш бо-дур!
29 Аммон чон, сеңээ хоозун көстүүшкүннер, меге төлгелер дуза катпас ^p;
шииттирер хүнү үнген, бүрүн кеземче көөр шагы келген
бужар-бак улустуң боскун хылыш-биле одура кезер.
30 Хылышты хынынче дедир сугайн бе?! ^{▼▼ Азы: «Хылыжыңны хынынче дедир суп ал».}
Сени төрүттүнген чериңге, чаяаттынган чериңге ^r
шиидер мен, аммон чон!
31 Мээң хорадаан сагыжым сенче кыптыгар,
килеңимниң чалбыыжын сенче хадыдар мен,
араатанзыг, өлүрүүшкүн кылып мергежээн улустуң холунга
сени хүлээдип бээр мен.
32 Отка чемиш боор сен, сээң ханың черни шыва аптар,
сээң дугайыңда сактыышкын артпас ^s.
Мен, Дээрги-Чаяакчы, ону чугааладым».