Eze 22 | TyvTUV | STEP | Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 22

Иерусалимниң хөй бачыттары

1 Дээрги-Чаяакчы меңээ Бодунуң сөзүн ажыдып чугаалаан: 2 «Кижи амытан, сен ханга борашкан хоорайны шиидеринге белен сен бе? Сен ону шиидеринге белен сен бе? ^a Ындыг болза, ооң үүлгеткен бүгү чүдек-бужар чүүлдерин айтыр сен ^b. 3 Дээрги-Бурган-Чаяакчының чугаалаан чүвезин аңаа дамчыт: о, бодунуң иштинге хан төгүүшкүнү кылып, кеземчени бодунче халдадып турар, кылып алган дүрзү-бурганнары-биле бодун бужартадып турар хоорай! 4 Сен төккен ханың дээш кем-буруулуг апарган сен, кылып алган дүрзү-бурганнарың-биле бодуңну бужартаткан сен; кеземче алыр үеңни чоокшуладып алган сен, назының төнчүзү келген-дир. Ол бүгү дээш, Мен сени өске чоннарга бак сөглеттирип, бүгү чурттарга кочу-шоот кылып каар мен ^c. 5 О, адын баксырадып алган, дүржок чоруу-биле сурагжаан хоорай, сенден ырак улус чоокта улус-биле кады сени дорамчылаар.

6 Иерусалим, Израильдиң чагырыкчылары сеңээ тургаш, кайызы-даа бодунуң шыдаар шаа-биле улустуң ханын төп турар. 7 Сээң иштиңде кижилер ада-иезин куду көрүп ^d, даштыкы улусту бастып, өскүстерни база дулгуяк херээженнерни кызагдап турар ^e. 8 Сен Мээң ыдыктыг чүүлдеримни херекке албайн, Меңээ тураскааткан амыр-дыш хүннерин бужартадып тур сен ^f. 9 Нүгүлчүлер сеңээ тургаш, өске улустуң ханын төп турар ^g; сээң чурттакчыларың дагларга дүрзү-бурганнарга өргээн аъш-чем чип ^h, сээң иштиңге бужар-бак чүүлдер кылып турар. 10 Сенде турар чамдык улус ачазының орун-дөжээн бужартадыр-дыр ⁱ, өскелери – ай демдээ көрүп, арыг эвес турган кадайы-биле албадал кылып холбажыр-дыр. 11 Чамдык улус өске кижи кадайы-биле бужар харылзаа тудар-дыр ^j, база чамдыктары боттарының кеннин ыят чогу-биле бужартадыр-дыр, өске-бир кижи бодунуң-на ачазының уруу болур угбазы азы дуңмазы-биле албадал кылып холбажыр-дыр ^k. 12 Чурттакчыларың хээли алгаш, өске кижи ханы төгер-дир ^l; сен болза хөөзүн алыр дээш, хуу хавырып аар дээш акша-мөңгүн чегдирип, өске кижиден ажык-кончаа түрүдүп алыр-дыр сен ^m. А Мени уттупкан-дыр сен». Дээрги-Бурган-Чаяакчының медеглээн чүвези ол-дур.

13 «Көр даан, Мен сээң былаап тургаш чедип алганың олча-ажыың дээш база бодуңнуң чонуң аразынга төккениң хан дээш хорадап, сенче чудуруум аннып тур мен. 14 Мээң сеңээ удур хөделип үнер үемде, эрес-дидим бооп артар сен бе, сээң холдарың ынчан салдына бербес бе? Мен, Дээрги-Чаяакчы, ону чугаалаан мен, кылыр-даа мен. 15 Мен сени өске чоннар аразынга тоо быдарадып, хары чурттарга тарадып кааптар мен ⁿ; сенде турар чүдек-бужар чүүлдерниң төнчүзүн салыр мен. 16 Сен бодуңну өске чоннар мурнунга бак атка киирер сен. Ынчан Мени Дээрги-Чаяакчы деп билип аар сен» ^{▼▼ Өске бурунгу сөзүглелде «Мен сен дээш өске чоннар мурнунга бак атка кирер мен, ынчалза-даа Мени Дээрги-Чаяакчы деп билип аар сен» деп бижээн.}.

17 Дээрги-Чаяакчы меңээ Бодунуң сөзүн ажыдып чугаалаан: 18 «Кижи амытан, израильчилер Меңээ багай холуксаа дег апарган; олар шупту эзилдирер суугуга артып каар чес, коргулчун, демир болгаш ак-коргулчун дег – мөңгүннүң багай холуксаазы дег ^p». 19 Ынчангаш Дээрги-Бурган-Чаяакчы мынча дээн: «Силер шупту багай холуксаа дег апарган болганыңарда, Мен силерни Иерусалимге чыыптар мен. 20 Эзилдирер суугуже мөңгүн, чес, демир, коргулчун болгаш ак-коргулчунну кады суккаш, от кыпсып, чалбыышты үргеш, оларны эргизери дег, Мен база килеңим кыптыккаш, силерни чыып, хоорайга арттыргаш, эзилдирер мен. 21 Силерни чыггаш, хорадаан сагыжымның одун силерже үреримге, аңаа эстип каар силер. 22 Эзилдирер суугуга мөңгүннүң эстири дег, силер база аңаа эстип каар силер. Ынчан Мээң, Дээрги-Чаяакчының, килеңимниң силерже кыптыкканын билип аар силер».

23 Дээрги-Чаяакчы меңээ Бодунуң сөзүн ажыдып чугаалаан: 24 «Кижи амытан, бо черге: „Хирлиг-дир сен, килең хүнүнде чаъс-биле суггартпаан-дыр сен ^q“– деп чугаала. 25 Ында турар Бурганның медээчилери ^{▼▼ Өске бурунгу сөзүглелде «Ооң чагырыкчылары» деп бижээн.} сүлчээлиг-дир ^s, олар олчазын үзе-чаза тыртып, ырланган арзылаң ышкаш-тыр ^t; олар улусту узуткап, эт-хөреңги болгаш эртине-байлакты хунаап ап, бо черде дулгуяк херээженнерни көвүдедип турар-дыр. 26 Ында Бурганның бараалгакчылары Мээң хоойлумну үреп, ыдыктыг чүүлдеримни бужартадып турар-дыр ^u; олар ыдыктыг чүүлдү ыдыктыг эвес чүүлден аңгылавайн, арыг база арыг эвес чүүлдүң аразында ылгал барын айытпайн турар-дыр ^v; олар Меңээ тураскааткан амыр-дыш хүннерин канчаар сагып турарынче сагыш салбас-тыр ^w. Ынчангаш Мен оларның аразында бужартаашкынга таваржып турар-дыр мен. 27 Ол черниң нояннары олчазын туткулаан бөрүлер дег-дир; олар хан төп, ажык-кончаа алыр дээш кижи өлүрүп турар-дыр ^x. 28 А ында турар Бурганның медээчилери нояннарның бүгү ындыг херектерин хоозун көстүүшкүннер болгаш меге өттүр билген медеглелдери-биле, чугайлаан дег, агартыр чаап, шынны чажырып турар. Олар Дээрги-Чаяакчы ынча дивээн-даа болза, „Дээрги-Бурган-Чаяакчы ынча дээн“деп медеглээр-дир ^y. 29 Черниң чурттакчылары бот-боттарын дарлап, үптеп, ядыы-түреңги улусту кызагдап, даштыкы улусту бастып, оларга чөптүг шииткел көргүспейн турар.

30 Мен, чуртту чок кылып каарын күзевейн, чоннуң аразындан хананы дуй туруптар, Мээң мурнумга чуртка болчуп, ойбак черлерге барып туруп аар кижи дилеп турдум ^z, ынчалза-даа тыппадым ^{▼▼ Иезекиилдиң бо шүлүкте ажыглап турар овур-хевири дайын үезинде хоорайның камгалакчыларын көргүзүп турар. Кажан дайзын хананы оя шааптарга, камгалакчы шериглер ойбак черже барып, дайзынны дозуп, хоорайже киирбес турган.}. 31 Ам Мен оларже килеңим кыптыгып, хорадаан сагыжымның оду-биле оларны узуткап каар мен, чедип алган чүвезин боттарының баштарынче халдадыр мен ^ab». Дээрги-Бурган-Чаяакчының медеглээн чүвези ол-дур.