Eze 23 | TyvTUV | STEP | Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 23

Самыыраан угбашкылар

1 Дээрги-Чаяакчы меңээ Бодунуң сөзүн ажыдып чугаалаан: 2 «Кижи амытан, чаңгыс иеден төрүттүнген ийи угбашкы турган-дыр. 3 Олар аныяандан-на Египетке самыын-садып турганнар ^a; аңаа оларның эр кижи дегбээн эмиглерин нугуп, эмииниң допшуларын бырыштыр суйбап каапкан. 4 Угбазын Огола деп, а дуңмазын Оголива деп адаар чүве-дир. Олар Мээң кадайларым апаргаш, ажы-төлдү божуп берип турган. Огола дээрге Самария-дыр, а Оголива – Иерусалим-дир.

5 Огола Мээң кадайым тургаш-ла, катап база самыын-садып эгелээн. Ол бодунуң хандыкшаан эрлеринче, ассирий дайынчыларже, туралап, холбажырын күзей берген ^b – 6 каас-коя хептиг эрлерже, тус чер чагырыкчыларынче, шериг баштыңнарынче туралап, холбажырын күзей берген – олар шупту чараш эрлер, аъттыг шеригжилер турган. 7 Огола Ассирияның шилиттинген улузу-биле самыын-садып, холбажырын күзээн бүгү улузунуң дүрзү-бурганнары-биле бодун бужартадып турган. 8 Ол Египетке-ле эгелеп алган самыыраашкынын черле кагбаан; ынчан ол аныяк турда, хандыкшааннары ооң-биле удуп, эр кижи дегбээн эмииниң допшуларын бырыштыр суйбап, туралаан сагыжы-биле ону бүргеп турган болгай. 9 Ынчангаш Мен Оголаны ооң хандыкшааннарының – туралаары ассирийлерниң – холунга хүлээдип берген мен ^c. 10 Олар ону шалдаңнааш, ооң оглу-кызын тудуп алгаш, бодун хылыш-биле шанчып кааннар. Ону шаажылаан соонда, ооң ады херээженнер аразынга баксырай берген.

11 Ооң дуңмазы, Оголива, ол бүгүнү көрүп турза-даа, туралаар, самыын-садар талазы-биле угбазындан артык апарган ^d. 12 Ол база-ла ассирийлерже – тус чер чагырыкчыларынче, шериг баштыңнарынче, каас-коя кеттинген дайынчыларже, аъттыг шеригжилерже, бүгү чараш эрлерже туралап, холбажырын күзеп турган ^e. 13 Ооң база-ла бодун бужартадып алганын көрген мен; угбашкылар ийилээн чаңгыс орук-биле бар чыткан.

14 Оголива оон-даа артык самыын-садар чорукка алыскан. Ол ханада сиилбирлээн эр улустуң – кызыл будук-биле ^f чураан халдейлерниң дүрзүлерин көрүп каан ^g. 15 Олар белинде курларлыг, бажында каас-коя бөрттерлиг, шупту вавилон шериг баштыңнарынга, халдей черниң чурттакчыларынга дөмей улус болган. 16 Оларны көрүп каан дораан-на, Оголива туралап, күзей бергеш, халдейлерни кыйгыртып, оларның черинче элчиннер ыдыпкан. 17 Вавилончулар ооң эр улус-биле хандыкшыыр орун-дөжээнге кээп, ооң-биле самыырап, ону бужартадып кааннар ^h. Оларны дамчыштыр бужартай бергеш, Оголива чүдексинип, олардан хая көрнү берген. 18 Кажан ол самыыраашкынга ажыы-биле алзып, шалдаңын ажыдып эгелээрге, бир шагда ооң угбазындан чүдексинип, хая көрнү бергеним дег, Мен оон база чүдексинип, хая көрнү берген мен. 19 А ооң самыыраары дам барып, Египетке самыын-садып турган чалыы шаан сактып келген ⁱ. 20 Ол аңаа элчигеннии дег эр сүрүлүг, аскырлар ышкаш төктүүчел үрелиг хандыкшааннарын күзеп турган. 21 Ол аныяк шааның самыыраашкынын, египетчилер ооң эмииниң допшуларын суйбап, аныяк эмиглерин нугуп турган үени сактып келген».

22 Ынчангаш, Оголива, Дээрги-Бурган-Чаяакчы сеңээ чугаалап тур: «Чүдексинип, хая көрнү берген хандыкшааннарыңны сеңээ удурландырар мен, оларны чер болгандан сеңээ удур ыдар мен ^j: 23 вавилончуларны, бүгү халдейлерни, Пекод ^k, Шоа болгаш Коа деп девискээрлерден улусту, бүгү ассирийлерни, бүгү ол чараш эрлерни, тус чер чагырыкчыларын, шериг баштыңнарын, дээди дүжүметтерни, дайынчыларны, бүгү аъттыг шеригжилерни эккеп, ыдар мен. 24 Олар сенче чепсектиг ^{▼▼ Бо сөстүң утказы эки билдинмес. Өске бурунгу сөзүглелде «Соңгу чүктен» деп бижээн.}, аъттарлыг, дайынчы тергелерлиг, дыка хөй чоннуг үнүпкеш, сени бүгү таладан бүзээлеп, чыдаларлыг, дозуг-камгалалдарлыг, куяк бөрттерлиг туруп аар. Мен сени шиидер эргени оларга бээр мен, олар сени боттарының дүрүм-хоойлузун ёзугаар шиидер ^m. 25 Мен Бодумнуң хүннээчел сагыжымны сеңээ удур углаптарымга, олар сеңээ хорадап, бак аажылаар: думчууң, кулактарыңны одура кезип кааптар, сээң дириг арткан улузуң хылыштан кырлып каар. Олар сээң оглу-кызыңны тудуп аппаар, дириг арткан улузуңну от чиптер. 26 Олар сээң хевиңни ушта тыртып, каасталгаларыңны хунаап аар ⁿ. 27 Мен сээң Египеттен өттүнүп эккелген самыыраашкын, будулуушкунуңнуң төнчүзүн салыр мен ^o, сен ам ол улусту дилевес сен, Египетти сагынмас сен».

28 Дээрги-Бурган-Чаяакчы мынча дээн: «Мен сени бодуңнуң көөр хөңнүң чок улузуңнуң, олардан чүдексинип, хая көрнү берген улузуңнуң холунга хүлээдип тур мен. 29 Олар сени ала караа-биле көрбестеп, ажыл-биле чедип алган бүгү чүвеңни хунаап аар. Олар сени шалдаң, чанагаш арттырып каар, сээң бужар чанагажың, самыыраашкын, будулуушкунуң ажыттына бээр. 30 Чоннар-биле самыырап, оларның дүрзү-бурганнары-биле бодуңну бужартатканың дээш ^p, ол бүгү сээң-биле болур. 31 Сен бодуңнуң угбаңның оруун эдерген сен, ол дээш, ооң кеземчезиниң дашказын ^q сээң холуңга тутсур мен».

32 Дээрги-Бурган-Чаяакчы мынча дээн:

«Угбаңның дашказындан ижер сен,
улуг-даа, алгыг-даа дашка-дыр;
кочуладып, бак атка кирер сен,
дашканың ишкири кончуг-дур.
33 Эрттир эзирип, муңгагдалга алзыр сен;
сээң Самария угбаңның дашказы
өлүм биле хоозураашкынның дашказы-дыр.
34 Сен ону пактап, дүвүнге чедир ижер сен ^r,
ооң бузундуларын хемдиир сен,
эмиг-төжүңнү үзерлээр сен.
Мен ону чугааладым».

Дээрги-Бурган-Чаяакчының медеглээн чүвези ол-дур.

35 Ынчангаш Дээрги-Бурган-Чаяакчы: «Сен Мени уттуп, Мени артыңче октапкан болганыңда ^s, бодуңнуң кем-бурууң, самыыраашкыныңны чүктээр апаар сен» – деп чугаалаан.

36 Дээрги-Чаяакчы меңээ мынча дээн: «Кижи амытан, Огола биле Оголиваны шиидеринге белен сен бе? ^t Ындыг болза, оларга чүдек-бужар херектерин айтып бер. 37 Чүге дээрге олар ашак-кадай улустуң шынчы чоруун үреп турган-дыр, оларның холдары ханга борашкан-дыр ^u. Олар боттарының дүрзү-бурганнары-биле самыырап, Меңээ төрүп берген ажы-төлүн безин дүрзү-бурганнарынга чемиш кылдыр от өттүр эрттирип турганнар ^v. 38 Оон ыңай ол-ла үеде олар Меңээ мындыг чүве база кылганнар: Мээң ыдыктыг черимни бужартадып ^w, Меңээ тураскааткан амыр-дыш хүннерин үреп турганнар ^x. 39 Ажы-төлүн дүрзү-бурганнарга эккеп өргүп турган үезинде безин олар Мээң ыдыктыг черимче кирип, ону ооң-биле бужартадып турганнар. Олар Мээң өргээм иштинге ынчанганнар! ^y

40 Угбашкылар, силер оон туржук ырак черлерде турар эр кижилер сүрдүрүп, элчилер ыдарыңарга, ол эрлер чедип кээп турган; силер олар дээш чунуп, карааңар кирбиин будуп, каасталгаларыңар кедип ап турдуңар ^z. 41 Каас-коя орун-дөжекке олуруп ап, ооң мурнунда ширээге аъш-чем салып, ынаар Меңээ хамааржыр чаагай чыттыг чүүлдер биле олива үзүн салып турдуңар.

42 Угбашкыларның турар черинден сиилең мөөң чоннуң алгы-кышкызы үнүп турду. Карачал чон аразынга ээн кургаг ховудан эзирик улус чедип кээр болду. Олар демги ийи угбашкының холунга билектээштер, а бажынга – каас-коя дээрбектелчек каасталгалар кедирип турду. 43 Мен ынчан оларның самыыраашкындан харыксырап калган бирээзиниң дугайында: „Аңаа самыын-садар херээженге дег хамаарылга көргүссүн, чүге дээрге ол ылап-ла ындыг-дыр“– деп чугааладым. 44 Ол улус, яңган кадайлар-биле дег, угбашкылар-биле холбажып кээп-ле турган; олар Огола биле Оголивага самыын-садар кадайларга дег кээп турган.

45 Чөптүг улус ол херээженнерни шиидер; ашаанга өскерилгени дээш база хан төккени дээш оларны шиидер ^aa, чүге дээрге олар ашаанга өскерлип турар-дыр база оларның холдары ханга борашкан-дыр».

46 Дээрги-Бурган-Чаяакчы мынча дээн: «Угбашкыларга удур мөөң чондан чыггаш, оларны коргуушкун биле үптээшкинге хүлээдип берзин. 47 Мөөң чон оларны даштар-биле соп, хылыштар-биле кезе шаап өлүрзүн ^ab; оларның оглу-кызы өлүртүп алзын, а бажыңнары өрттеттирзин ^ac. 48 Бо чуртта самыыраашкынның төнчүзүн ынчаар салыр мен ^ad, бүгү херээженнер кичээнип, демги угбашкылар ышкаш херектер кылбайн баар. 49 Олар самыыраашкынын боттары чүктээр, дүрзү-бурганнарынга мөгейип, бачыттар үүлгеткени дээш кеземче көөр. Ынчан Мени Дээрги-Бурган-Чаяакчы деп билип аар силер ^ae».