Eze 24 | TyvTUV | STEP | Туттуруушкунувустуң тоску чылының он айның онда Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 24

Пашта хайынган эът дугайында чугаа

1 Туттуруушкунувустуң тоску чылының он айның онда Дээрги-Чаяакчы меңээ Бодунуң сөзүн ажыдып чугаалаан: 2 «Кижи амытан, шак бо хүннү, бөгүнгү хүннү, демдеглеп бижип ал: чогум-на бо хүн Вавилоннуң хааны Иерусалимни бүзээлепкен-дир ^a. 3 Бо үймээнчи чонга оюскан уткалыг чугаадан чугаалап бер. Дээрги-Бурган-Чаяакчының чугаалаан чүвезин оларга дамчыт:

Отка паштан салгаш, сугдан кудуп каг ^b.
4 Аңаа эъттен, эки дээн борбак эъттер:
дөңмек биле өжүнден дүлүп каг,
эки дээн сөөктерден база паш долдур дүлүп каг.
5 Хойларның шилиндээн шилип ал;
паш адаанга ыяштан салып ^{▼▼ Азы: «Сөөктерден салып».}, хайындырывыт;
дүлген сөөктер ылбырадыр хайынзын».

6 Дээрги-Бурган-Чаяакчы мынча дээн:

«Ханга борашкан хоорай ^d,
сивиртинмес кылдыр каргакталган паш дег хоорай ат болур!
Ону куругладып, борбак эъттерни, шилилге кылбайн,
оон үндүр октаңар-ла!
7 Хоорайның чурттакчыларының төккен ханын
тас хаяже көзүлдүр төпкен;
ханны довурак-биле шыптына бээр черже төкпээн-дир ^e.
8 Өжээн негээр килеңим кыптыксын дээш,
Мен ол ханны чажыртынмас кылдыр тас хаяга арттырып каан мен».

9 Ынчангаш Дээрги-Бурган-Чаяакчы мынча дээн:

«Ханга борашкан хоорай ат болур! ^f
Мен Бодум хөй ыяшты одагга чыый салыр мен ^g.
10 Ыяштан немей салып, отту кывыс,
эътти ылбырадыр хайындыр,
амдан киирер холуксаадан холуй былга ^{▼▼ Азы: «Бүгү чүве митпейтир хайынзын».},
сөөктер төндүр хып калзын.
11 Паш куруглап каарга, ону көсче салып каг –
ол изий берип, ооң чези кыза берзин,
иштинде хири эзилгеш, бүгү каргаа төндүр хып калзын.
12 Чок, бүгү оралдажыышкыннар хей болган-дыр:
кылын каргак читпес-тир,
от дузазы-биле-даа адырылбас-тыр ⁱ.
13 Иерусалим, сээң самыыраашкының сени бужартаткан-дыр.
Мен сени арыглаар дээш чеже-даа оралдажырымга, арыгланмас-тыр сен,
ынчангаш ам Мээң сеңээ хорадаан сагыжым оожургаваан шаанда,
моон-даа соңгаар арыгланып шыдавас сен.

14 Мен, Дээрги-Чаяакчы, мону чугаалап тур мен: сеңээ кеземче онаар үе келген-дир, Мен ону боттандырар мен. Соксавас мен, өршээл, кээргел көргүспес мен ^j. Сен бодуңнуң оруктарың болгаш херектериң ёзугаар шииттирер сен». Дээрги-Бурган-Чаяакчының медеглээн чүвези ол-дур.

Иезекиилдиң кадайының чок апарганы

15 Дээрги-Чаяакчы меңээ Бодунуң сөзүн ажыдып чугаалаан: 16 «Кижи амытан, карааңның огу дег эргим кижиңге хенертен дээпкеш, сенден хунаап аппаар мен; ынчалза-даа кажыыдава, ыглап-сыктава, карааң чажын төкпе ^k. 17 Өлген кижи дээш ыыт чок човууртап, ыглап-сыктава; качыгдалдың демдээ кылдыр бажың дүгүн часпа, кызыл-даван кылаштава, сегелиң дуглава, ажыг-шүжүүң үлежип келген улустуң аъш-чемин чиве ^l».

18 Эртен мен чон-биле чугаалашкан мен, а кежээ кадайым чок апарган. Даартазында эртен Дээрги-Чаяакчының меңээ дужааганын ёзугаар кылган мен. 19 Улус ынчан: «Сээң кажыыдавайн турарың кандыг ужур-уткалыгыл, чугаалап көрем?» – деп айтырган ^m.

20 Мен оларга мынча деп харыылаан мен: «Дээрги-Чаяакчы меңээ Бодунуң сөзүн ажыдып чугаалаан. 21 Дээрги-Бурган-Чаяакчы израиль чонга чугаалаан чүвезин дамчыдарын айыткан: Мен Бодумнуң ыдыктыг черимни – силерниң чоргаарланып турарыңар быжыг өргээни, сеткилиңерниң өөрүшкү-маңнайын, карааңар огунуң таалалын – бужартадыр деп тур мен. А каапкаш барган оглу-кызыңар хылыштан кырлып каар ⁿ. 22 Мээң кылып турганым ышкаш кылдыр силер база кылыр силер: качыгдалдан сегелиңер дуглавас, ажыг-шүжүүңер үлежип келген улустуң аъш-чемин чивес силер; 23 бажыңар дүгүн часпас, кызыл-даван кылаштавас силер; кажыыдап ыглап-сыктавас силер; ынчалза-даа боттарыңарның бачыттарыңар дээш эстип-хайлып ^o, бот-боттарыңар мурнунга улуг тынар силер. 24 Иезекиил силерге сагындырыг демдээ болур: силер база ооң кылып турганы ышкаш кылыр силер. Кажан ол бүгү бүде бээрге, Мени Дээрги-Чаяакчы деп билип аар силер ^p.

25 Кижи амытан, кажан Мен оларның алдарлыг быжыг өргээзин – өөрүшкүзүнүң үнер дөзүн, карааның огунуң таалалын база оларның сеткилин өөртүп турган оглу-кызын хунаап аарым хүнде, 26 оортан сеңээ амы-тынныг үнген улустуң бирээзи медээлер чугаалап чедип кээр ^q. 27 Ол хүн сен катап база үнүң үнүп, шак ол амы-тынныг үнген кижи-биле чугаалажып, ооң соонда ыыт чок болбас сен ^r. Чонга сагындырыг демдээ болур сен, ынчан олар Мени Дээрги-Чаяакчы деп билип аар».