Eze 27 | TyvTUV | STEP | Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 27

Тир дээш ыы-сыы

1 Дээрги-Чаяакчы меңээ Бодунуң сөзүн ажыдып чугаалаан: 2 «Кижи амытан, Тир хоорай дээш кажыыдал ырын ырла ^a. 3 Далайның хаалгазында туруп алган, хөй ортулуктарда, хөй чоннар-биле садыглажылга кылган Тирге Дээрги-Бурган-Чаяакчының чугаалаан чүвезин дамчыт:

Тир! „Мен кайгамчык чараш-каас мен!“– деп тур сен.
4 Ажык далайда чурттап турар корабль дег-дир сен;
тудугжуларың сээң чараш-каазыңны тергиин деңнелге чедирип каан.
5 Олар сээң бүгү манзаларыңны Сенир сынның шивизинден чазап кылган ^b;
мачталарың кылыр дээш Ливан сынның пөжүн кескен.
6 Эшкииштериңни Васан черниң дуб ыяжындан чазаан ^c;
корабльды китт чоннуң ^{▼▼ Китт чон – израильчилер ол үеде Чер ортузу далайның ортулуктары биле чартык ортулуктарының чурттакчыларын ынчаар адап турган (Э. д. 10:4; Сан. 24:24 көр).} ортулуктарындан эккелген
быжыг самшит ыяш-биле кылгаш, чаан сөөгү-биле шап каан.
7 Парустарыңны Египетке угулзалап аргаан лёндан даараан,
ол парустар сээң тугуң турган.
Сээң чаглак-шывыгларыңны элиса чоннуң ортулуктарындан эккелген
көк болгаш кызыл-хүрең өңнүг пөстерден даараан.
8 Сидон болгаш Арвад ^e хоорайларның чурттакчылары – сээң эжикчилериң.
Тир, сээң мерген угаанныгларың кораблыңны башкарар улус турган.
9 Сеңээ Гевал хоорайның билдилиг баштыңнары эжиндирип,
септелге ажылдары кылып турган ^f.
Далайның бүгү корабльдары, оларның далайжылары сеңээ бараан солчуп кээп турду.
10 Персия, Лидия болгаш Ливиядан ^g келген улус
сээң шерииңде хөлезилеттинген дайынчылар бооп,
дозуг-камгалалдар биле куяк бөрттерни сээң ханаларыңга азып турду;
олар сени өндүр улуг кылдыр кылып кагды.
11 Арвадтың чурттакчылары сээң бодуңнуң шерииң-биле кады
ханаларыңга сени долгандыр турду,
Гамадтың улузу сээң суургаларыңга турду.
Олар сээң ханаларыңда дозуг-камгалалдарын ^{▼▼ Азы: «Саадактарын».} долгандыр аскылап алган.
Сээң чараш-каазыңны олар тергиин деңнелге чедирди.

12 Янзы-бүрү байлакшылың эгээртинмес боорга, Фарсис хоорай сээң-биле садыглажып ⁱ, барааннарың орнунга мөңгүн, демир, коргулчун болгаш ак-коргулчун берип турган. 13 Иаван, Тувал болгаш Мешех ^j сээң-биле садыглажып, барааннарың орнунга кулдар болгаш хүлер эт-сеп берип турган. 14 Тогарма аймак ^k сээң барааннарың орнунга аъттар, дайынчы аъттар база элчигеннер берип турган. 15 Деданның улузу ^l база сээң-биле садыглажылга кылып турган; далай эрииниң хөй чурттары сээң-биле бараан солчуп, төлевир кылдыр сеңээ чаан сөөгү болгаш кара ыяш чедирип берип турган. 16 Садыглажыр чүвең эңдерик боорга, арамей чон сээң-биле садыглажып, барааннарың орнунга эртине даштар, каас-коя пөстер, угулзалап даараан кылыглар, чуга лён, кораллдар болгаш рубиннер берип турган. 17 Иудея биле Израиль сээң-биле садыглажып, барааның орнунга Миннит деп черден ^m кызыл-тас, чигирзиг аъш-чем, ары чигири, олива үзү болгаш чаагай чыттыг чукту берип турган.

18 Садыглажыр чүвең эңдерик, янзы-бүрү байлакшылың эгээртинмес боорга, Дамаск хоорай ⁿ сээң-биле хелбон черниң арагазы болгаш ак дүгү-биле садыглажып турган. 19 Узал чурттуг гректер болгаш даннар сээң барааның садып ап, оларның орнунга соп кылган демир, кассия ыяштың чугу ^o болгаш чаагай амданныг кулузун берип турган. 20 Дедан аймак сеңээ аът мунарда ажыглаар чавынчактар садып турган. 21 Аравия болгаш кедар аймактың ^p бүгү нояннары сээң садып алыкчыларың бооп, сеңээ хураганнар, кошкарлар болгаш хуналар садып турган. 22 Шева ^q биле Раама чурттуг садыгжылар сээң-биле садыглажып, барааның орнунга янзы-бүрү эң эки-чаагай чыттыг чүүлдер, эртине даштар болгаш алдын берип турган. 23 Харран, Хане болгаш Эден ^r хоорайлардан садыгжылар, Шева, Ассур болгаш Хилмад чурттуг садыгжылар база сээң-биле садыглажып турган. 24 Олар сээң-биле улуг үнелиг хептер, көк өңнүг болгаш угулзалап даараан пөстер, өң-баазын хевистер база дыңзыг хендир аргамчылар-биле садыглажып турган. 25 Фарсистиң улуг корабльдары ^s сээң садыглап турар барааныңны дажыглап турган.

Сен, корабль дег, дүп чок далай кырынга аар чүък-биле чүдүрнүп аарыңга,
26 эжикчилериң сени ажык далайже үндүре бээр.
А чөөн чүктүң хады сени далай ортузунга буза шааптар ^t.
27 Сээң байлакшылың, эт-хөреңгиң, барааның,
сээң далайжыларың, башкарыкчыларың, ойбактар дуглап турган улузуң,
садыгжыларың, бүгү дайынчыларың, корабльга турган мөөң улус –
дөгере сээң буступ дүшкен хүнүңде далайның дүп чок суунче дүже бээр.
28 Сээң башкарыкчыларыңның алгы-кышкызындан
чоок-кавы черлер сырбаш кынныр.
29 Корабльдан бүгү эжикчилер, далайжылар, башкарыкчылар
дүже шуражы бергеш, эрикке туруп алыр ^u.
30 Олар сен дээш ишкирнип ыглап, ажыың ажып хараадаар
база качыгдалдан бажын доозун-довурак-биле бызап, хүлге боражып аар ^v.
31 Олар сен дээш качыгдап, бажын чүлүдүп, самдар хеп кедип аар;
сеткил-чүрээ кажыыдап, сээң ажыың ажып ыглажыр.
32 Олар качыгдал ыры ырлажыр:
„Далай ортузунга узуткаттырып алган Тир ышкаш кым барыл? ^w
33 Далайлап сээң барааның кээп турган үеде
хөй санныг чоннарны тоттуруп турдуң;
эгээртинмес байлакшылың-биле, садыың-биле
чер-делегейниң хааннарын байыдып турдуң ^x.
34 А ам сени ханы сугларда далай буза шаап каан-дыр;
сээң барааның болгаш мөөң улузуң сугга дүшкен-дир“.
35 Далай эрииниң бүгү чурттакчыларын сээң салым-хууң коргудар,
оларның хааннары сириңейнип, арыннары хуула бээр ^y.
36 Өске чоннарның садыгжылары кочулап сыгырар ^z;
сен коргунчуг төнчүге таваржыр сен,
моон соңгаар кажан-даа турбас сен ^aa».