Eze 29 | TyvTUV | STEP | Туттуруушкунувустуң онгу чылының он айның он ийиде Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 29

Египет дугайында

1 Туттуруушкунувустуң онгу чылының он айның он ийиде Дээрги-Чаяакчы меңээ Бодунуң сөзүн ажыдып чугаалаан: 2 «Кижи амытан, Египеттиң хааны фараонче шиглей көрүнгеш, аңаа база бүгү Египетке удур өттүр билип медегле ^a. 3 Аңаа Дээрги-Бурган-Чаяакчының чугаалаан чүвезин дамчыт:

Египеттиң хааны фараон – бодунуң хемнеринде шөлээн чыдар улуг амырга-моос ^b,
Мен сеңээ удур апардым.
„Нил хем мээңии, ону бодумнуу кылдыр чаяап алган мен“– деп турар-дыр сен.
4 Мен сээң чаактарың өттүр тыртпа сугар мен ^c,
хемнериңде балык-байлаңны казырыыңга чыпшырып каар мен.
Сени бодуңнуң хемнериңден казырыыңда чыпшынган балык-биле кады ушта тыртар мен ^d.
5 Мен сени база сээң хемнериңден туткан бүгү балыкты
ээн кургаг ховуже октаптар мен.
Сен ажык шөлге кээп дүжер сен –
кым-даа сени ап келбес, ажаап кагбас.
Мен сени черниң аң-араатанынга,
дээрниң куштарынга чемиш кылдыр бериптер мен ^e.
6 Ынчан Египеттиң бүгү чурттакчылары
Мени Дээрги-Чаяакчы деп билип аар ^f.
Египет, сен израиль чонга кулузун дег чиңге даянгыыш бооп турдуң ^g.
7 Кажан олар сенден туттунарга, чартыландыр чарлып,
оларның экти-холун балыглап турдуң;
сеңээ чөленирге, сыйлып,
оларның буттарын туруштуг эвес кылып турдуң».

8 Ынчангаш Дээрги-Бурган-Чаяакчы мынча дээн: «Мен сенче хылыш ыдып, чурттакчыларыңны-даа, мал-маганыңны-даа кыргып-хыдыыр деп тур мен ^h. 9 Египет чер ээнзиреп, хоозурап каар. Ынчан улузуң Мени Дээрги-Чаяакчы деп билип аар. Чүге дээрге сен: „Нил хем мээңии-дир, ону мен чаяап кагдым“– дээн-дир сен. 10 Ынчангаш Мен сеңээ, сээң хемнериңге удур апардым. Египет черни соңгу чүкте Мигдол хоорайдан эгелээш, мурнуу чүкте Сиена хоорайга ⁱ, мырыңай Эфиопияның кызыгаарынга чедир хоозураан ээн кургаг хову кылып каар мен. 11 Кижи-даа, мал-маган-даа буду ону базып эртпес, дөртен чыл дургузунда аңаа кым-даа чурттавас. 12 Мен египет черни хоозураан черлер аразынга ээн хову кылып каар мен, ооң хоорайлары ээнзирээн хоорайлар аразынга дөртен чыл дургузунда чурттакчы чок бооп артар ^j. Мен египетчилерни өске чоннар аразынга тоо быдарадып, хары чурттарже тарадып кааптар мен ^k».

13 Дээрги-Бурган-Чаяакчы мынча дээн: «Дөртен чыл эрте бээрге, Мен египетчилерни тарадып каапканым чоннар аразындан катап база чыып аар мен ^l. 14 Оларга эки чолду эгиткеш ^m, Патрос деп черже ^{▼▼ Патрос чер – мурнуу Египет.}, оларның ада-өгбезиниң черинче дедир чандырар мен. Олар аңаа кошкак күрүнелиг болур. 15 Күрүнелерниң эң кошкаа бооп, бодун өске чоннардан кажан-даа өрү көдүрүп шыдавас. Мен оларны моон соңгаар өске чоннарны чагырып шыдавас кылдыр кошкадып каар мен. 16 Египет израиль чонга база катап чөленгииш болбас. Израильчилер оон дуза дилээни-биле бачыт үүлгеткенин сагындырып артар. Олар ынчан Мени Дээрги-Бурган-Чаяакчы деп билип аар ^o».

Египетти Вавилоннуң эжелеп аары

17 Туттуруушкунувустуң чээрби чедиги чылында, бир айның бирээде Дээрги-Чаяакчы меңээ Бодунуң сөзүн ажыдып чугаалаан: 18 «Кижи амытан, Вавилоннуң хааны Навуходоносор бодунуң аг-шериин Тир хоорай-биле демисештирип, шыладыр ажылдадып каапкан: оларның шуптузунуң бажы тазарып, эгиннери өйдүрткен, ынчанмыже ол хаан-даа, ооң шериглери-даа кылган ажылдары дээш Тирден олча-тывыш албаан». 19 Ынчангаш Дээрги-Бурган-Чаяакчы мынча дээн: «Мен Вавилоннуң хааны Навуходоносорга египет черни бээр деп тур мен ^p, ол ооң эртине-байлаан чаалап аар. Ол ону бодунуң аг-шериинге төлевир кылдыр үптеп-тонаар. 20 Мен аңаа египет черни кылган ажыл-херээ дээш бээр мен, чүге дээрге ол аг-шерии-биле Меңээ ажылдап берип турган-дыр – деп, Дээрги-Бурган-Чаяакчы медеглээн. – 21 Мен ол хүн израиль чоннуң күжүн немеп, сеңээ ооң аразынга өттүр билип медеглээрин хайырлаар мен. Олар ынчан Мени Дээрги-Чаяакчы деп билип аар».