‏ Ezekiel 3

1Дээрги-Чаяакчы меңээ: «Кижи амытан, мурнуңда чүвени чивит, бо дүрүг-номну чивит, а ооң соонда израиль чонга барып медегле» – диди ^a.

2Мен аксым ажыдыптарымга, Ол меңээ демги дүрүгнү чиртипти.

3Ол меңээ: «Кижи амытан, Мээң берип турарым дүрүгнү чивит, ооң-биле бодуңну долдуруп ал» – диди. Мен ону чиптим, аксымга ол ары чигири дег амданныг болду. 4Ол меңээ оон мынча диди: «Кижи амытан, ам дораан израиль чонга баргаш, Мээң сөстеримни дамчыт. 5Сени билдинмес чугаа-дылдыг өске-бир чонче эвес, а израиль чонче айбылап чорудуп тур мен. 6Билдинмес чугаа-дылдыг, сөстерин сээң билип шыдавазың хөй санныг чоннарже сени айбылап чорутпайн тур мен. Бир эвес сени оларже чорудупкан болзумза, олар сени тооп дыңнаар-ла болгай. 7А израиль чон сени тооп дыңнаар хөңнү чок-тур, чүге дээрге олар хай-чагырга чок, чөрүү улус болгаш, Мени тооп дыңнаар хөңнү чок-тур. 8А Мен сени олардан дудак чок хедер, чөрүү, кадыг-быжыг кижи кылып каар мен ^b. 9Мен сени алмаз ышкаш кылдыр ^c, оттук-даштан кадыг-быжыг кылдыр кылып каар мен ^d. Олардан кортпа, үймээнчи чон мурнунга сүрээдеве».

10Оон Ол меңээ: «Кижи амытан, кичээнгейлиг дыңна, Мээң чугаалап турар бүгү сөстеримни ыяк сактып ал. 11Ам дораан сээң чонуңнуң чуртундан өскээр көжүрткен улузунга барып медегле. Олар дыңнаар-дыңнавас-даа болза ^e: „Дээрги-Чаяакчы ынча деп тур!“– деп оларга чугаала» – диди.

12Ооң соонда Бурганның Сүлдези мени көдүрүптү ^f. Артымда: «Дээрги-Чаяакчының өндүр чырыы Ооң чурттаар черинге алгадып-йөрээтсин!» – деп турар, диңмирээшкин ышкаш аажок дыңзыг үн дыңнап кагдым. 13Ол ышкаш дириг амытаннарның бот-боттарынга дегжип турар чалгыннарының шимээни, оларның чанында дугуйларның токкуладыр дагжааны ^g база чыжыраан диңмирээшкин дыңналды. 14Сүлде мени көдүргеш, өскээр аппарды. Мен муңгарап, сеткилим аажок хөлзеп чордум, Дээрги-Чаяакчының холу мени чайгылыш чок башкарып турду ^h. 15Кевар хемниң чанында ⁱ Тел-Авив деп черже көжүрткен израильчилерже чедип келгеш, албааралга алзып, оларның аразынга чеди хонук турган мен ^j.

Бурганның чонну сагындырганы

(Иез. 33:1-9)

16Чеди хонук эрте бээрге, Дээрги-Чаяакчы меңээ Бодунуң сөзүн ажыдып чугаалады: 17«Кижи амытан, Мен сени израиль чоннуң доскуулчузу кылып кагдым ^k. Сен Мээң аксымдан үнген сөстерни дыңнап, оларны Мээң өмүнээмден баш бурунгаар сагындырар сен ^l. 18Мен кем-буруулуг кижиге: „Сен өлүп каар сен!“– дээримге, ол кижи өлбезин дээш, бузуттуг оруундан чайлаарын айтып, сагындырбас болзуңза, кем-буруулуг кижи бодунуң бачыды дээш өлүп каар. А Мен сенден ооң өлүмү дээш харыы негээр мен. 19Ынчалза-даа сен кем-буруулуг кижини бодунуң бузуттуг оруундан чайлаар кылдыр сагындырарыңга-даа, тоовайн барган болза, бодунуң бачыды дээш өлүп каар, а сен амы-тыныңны камгалап аар сен ^m.

20А бир эвес чөптүг кижи бодунуң шынныг чоруундан ойталап, кем-буруулуг херек үүлгедир болза, Мен ооң мурнунга тептигер моондак салып каарымга, ол өлүп каар ⁿ. Сен ону баш бурунгаар сагындырбайн турган болганыңда, ол бодунуң бачыды дээш өлүп каар. Ооң кылып турган ачылыг херектеринче кичээнгей салбас мен, а сенден ооң өлүмү дээш харыы негээр мен. 21Ынчалза-даа сен чөптүг кижини, бачыт үүлгетпезин дээш, баш бурунгаар сагындырарыңга, ол кижи бачыт үүлгетпейн барган болза, амы-тынныг артар, чүге дээрге сагындырыгны тооп дыңнаан-дыр, а сен бодуңнуң амы-тыныңны камгалап аар сен».

Иезекиилдиң ыыттавас апарганы

22Дээрги-Чаяакчының холу мени аңаа башкарып эгеледи ^o. Ол меңээ: «Тургаш, оргулаашче чорувут ^p, Мен аңаа сээң-биле чугаалажыр мен» – диди.

23Мен туруп келгеш, оргулаашче чоруптум. Көөрүмге, ында Дээрги-Чаяакчының өндүр чырыы, Кевар хемниң чанынга көргеним ышкаш, көстүп турду; мен хаваам-биле черге дээп, доңгая кээп дүштүм ^q. 24Бурганның Сүлдези мени бүргей апкаш, бут кырынга тургузуп кагды. Бурган мээң-биле чугаалажып, мынча диди: «Бажыңыңга барып хагдынып ал. 25Кижи амытан, сээң-биле болур чүве бо-дур: сени хүлүп-шарып каарга, улусче үнүп шыдавас апаар сен ^r. 26Мен сээң дылыңны өгүңге чыпшындырып каарымга ^s, үн чок апаар сен, бо чон үймээнчи-даа болза, оларны сойгалап шыдавайн баар сен. 27А сээң-биле чугаалашканымда, аксыңны ажыдып турар мен ^t, сен чүгле ынчан оларга: „Дээрги-Бурган-Чаяакчы ынча деп тур!“– дээр сен. Дыңнаксаан кижи дыңнап алзын, дыңнаар хөңнү чок кижи дыңнавазын, бо дээрге үймээнчи чон болбазыкпе».