Eze 31 | TyvTUV | STEP | Туттуруушкунувустуң он бирги чылында, үш айның бирээде Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 31

Кезип каапкан пөш

1 Туттуруушкунувустуң он бирги чылында, үш айның бирээде Дээрги-Чаяакчы меңээ Бодунуң сөзүн ажыдып чугаалаан: 2 «Кижи амытан, Египеттиң хааны фараонга, ооң мөөң чонунга мону дамчыт ^a:

Өндүр бедик сени кым-биле дөмейлээйн?
3 Ассирияже көр даан, ол чурт Ливан сында чараш будуктарлыг,
чокпак будук-бүрүлүг пөш дег турган ^b.
Ооң бажы шыргай будук-бүрү аразынга бедидир көдүрүлген.
4 Суг ону суггарып, чер адааның хемнери бедидир өстүрүп турган.
Хем-суглар ооң өзүп турган черин долгандыр агып,
арга-эзимде бүгү өске ыяштарже дамырак сугларын аксып берип турган.
5 Ынчангаш ол пөш арга-эзимде бүгү ыяштардан бедик апарган,
ооң будуктары сырыйландыр өскен;
ол өзүп турда, суг элбек турган болгаш, будуктары узай берген.
6 Дээрниң бүгү куштары ооң будуктарынга уя тудуп алган,
бүгү черлик аңнар ооң будуктарының адаанга өзүп-төрүп турган,
янзы-бүрү улуг чоннар аңаа чаглактанып чурттап турган ^c.
7 Ол пөш өндүр бедии-биле, будуктарының узуну-биле тулган чараш болган,
чүге дээрге ооң дазылдары терең сугларже бада берген.
8 Бурганның сесерлиинде ^d пөштер безин ооң-биле адааннажып шыдаваан.
Чойганнар – будуктары-биле, шивилер бүрүлери-биле
аңаа деңнежир харык чок болган:
Бурганның сесерлиинде чаңгыс-даа ыяш
бодунуң чаражы-биле аңаа деңнежип шыдаваан.
9 Мен ону сырый будуктар-биле каастап,
кайгамчык чараш кылып каан мен,
Эдемде Бурганның сесерлиинде бүгү ыяштар аңаа адааргап турган».

10 Ынчангаш Дээрги-Бурган-Чаяакчы мынча дээн: «Ол пөш бедик апарып, бажын шыргай будук-бүрү аразындан көдүрүп, өндүр бедиинге идээргей бээрге ^e, 11 Мен ону чоннар чагырыкчызының холунга хүлээдип бердим: „Чагырыкчы ону кем-буруузун ёзугаар аажылап турзун“. Мен оон ойталаан мен. 12 Хары улус, чоннар аразында эң түрлүг чон ону ужургаш ^f, каапкаш барган-дыр. Ооң будуктары даглар болгаш шынааларже кээп дүшкен; ооң сыйылган будуктары черниң кашпалдарынче кире берген; чер-делегейниң бүгү чоннары ооң чаглаандан үне бергеш, ону каапкаш барган. 13 Дээрниң бүгү куштары ооң кээп дүшкен унунга уяланып алган; бүгү черлик аңнар ооң будуктарынга таарыштыр турумчуп алган ^g. 14 Моон соңгаар суг чанында үнген өске бүгү ыяштар ынчаар бедидир өзүп, бажын шыргай будук-бүрү аразындан көдүрбезин, суг ижип турар бүгү ыяштар ындыг бедик кылдыр өспезин. Чүге дээрге оларның шуптузун өлүмге хүлээдип бээр, оларны чевег-хөөрже кирген кижи амытаннар-биле кады алдыы оранче бадырыптар ^h».

15 Оон Дээрги-Бурган-Чаяакчы мынча дээн: «Кажан демги пөш өлүглер оранынче бада бергенде, ол дээш качыгдаашкын чарлап, чер адааның хемнериниң оруун боогдап кагдым; ону суггарган хемнерни доктаадып, шапкын сугларны оожумнаттым. Мен ол дээш Ливан сынны дүмбей-биле шып кагдым, арга-эзимде бүгү ыяштар ол дээш ундаралга алзыпкан. 16 Мен ону чевег-хөөрже кирген улусче, өлүглер оранынче бадырып тура, ооң буураашкынының шимээни-биле чоннарны сириледипкен мен. Ону дыңнааш, алдыы оранда турган Эдемниң ыяштары, Ливанның эң тергиин, эң эки, элбек суггаттыг ыяштары сеткил ханган ⁱ. 17 Ол ыяштар база, демги пөш ышкаш, өлүглер оранынче бада берген, хылыш-биле өлүрткеннерге каттыжа берген. (Ынчалза-даа ооң үре-салгалы өске чоннар аразынга аңаа чаглактанып чурттаар.) ^{▼▼ Бо шүлүктүң утказы эки билдинмес. «Ооң үре-салгалы» деп сөстерниң болгу дег өске утказы: «Ооң эвилелчилери».}

18 Эдемниң ыяштарының кайызының алдар-адын, өндүр бедиин сээңии-биле дөмейлээйн? Ынчалза-даа сени база Эдемниң ыяштарынга деңней көрүп, өлүглер оранынче киириптер; кыртыжап демдектетпээн хейлер аразынга ^k, хылыш-биле өлүрткен улус чанынга чыдар сен. Ындыг чүве фараон-биле база ооң мөөң чону-биле болур». Дээрги-Бурган-Чаяакчының медеглээн чүвези ол-дур.