‏ Ezekiel 32

Фараон дээш ыы-сыы

1Туттуруушкунувустуң он ийиги чылының он ийи айның бирээде Дээрги-Чаяакчы меңээ Бодунуң сөзүн ажыдып чугаалаан: 2«Кижи амытан, Египеттиң хааны фараон дээш кажыыдал ырын ырлап ^a, аңаа:

„Сен бодуңну чоннар аразында арзылаң деп санап турдуң,
а херек кырында далай моозу-дур сен ^b.
Хемнерде былгыртынып, даваннарың-биле суг довурадып,
хем-сугларны доюлдуруп тур сен“– деп чугаала».

3Дээрги-Бурган-Чаяакчы мынча дээн:

«Хөй чоннар чыглып кээрге,
Мен сенче четкимни хөме салыптарымга ^c,
олар сени үндүр тыртып эккээр.
4Мен сени черге арттырып каар мен,
ажык шөлче октаптар мен.
Дээрниң бүгү куштары сеңээ хонуп,
соктаар кылып каар мен,
бүгү чер-делегейниң аң-араатанынга сени тоттур чиртир мен ^d.
5Сээң сегиңни дагларга тарадыр октаптар мен,
шынааларны мөчү-сөөгүң-биле долдурар мен.
6Чер кырын Мен, мырыңай дагларга чедир,
сээң аккан ханың-биле суггарар мен;
кашпалдарны мөчү-сөөгүң-биле долдурар мен.
7Сени өжүрүп каапкаш, дээрни дуглап,
ооң сылдыстарын имистелдирип кааптар мен;
хүннү булут-биле дуглап каар мен,
ай база чырытпастай бээр ^e.
8Дээрде чырып турар бүгү чырымалды
сээң кырыңга имистелдирип каар мен,
сээң чериңни дүмбей-биле дуглаар мен ^f – деп,
Дээрги-Бурган-Чаяакчы медеглээн. –

9Мен сээң буураашкының дугайында медээни сээң билбес турганың чурттарда чоннарга дыңнадып, хөй чоннарның чүректерин дүвүредир мен. 10Мен сээң хуу-салымың-биле хөй чоннарны коргуушкунга алыстырар мен, оларның хааннары, кажан Мен оларның мурнунга хылыжым чаярымга, сени бодааш, кортканындан сириңейни бээр ^g. Сээң буураан хүнүңде оларның кайызы-даа бодунуң амы-тыны дээш соксаал чок сүрээдээр».

11Дээрги-Бурган-Чаяакчы мынча дээн: «Вавилоннуң хаанының хылыжы сеңээ удур үнүптер ^h. 12Мен сээң мөөң чонуңну эң түрлүг чоннардан үнген күштүг дайынчыларның хылыжы-биле чок кылып каар мен ⁱ. Олар Египеттиң чоргааралын таптап, ооң мөөң чонун узуткап каар. 13Мен ооң улуг суг чанында оъттап турар мал-маганын узуткап каар мен. Моон соңгаар кижи буду-даа, мал даваны-даа сугну доюлдуруп, довуратпас. 14Мен Египеттиң сугларын турумналдырып, ооң хемнери үс ышкаш арай боорда агар кылдыр кылып каар мен – деп, Дээрги-Бурган-Чаяакчы медеглээн. – 15Кажан Мен египет черни хоозурадып каарымга, ол чер ону долуп турган бүгү чүвезин ышкынарга база Мен ооң бүгү чурттакчыларын чылча шаап каарымга, олар Мени Дээрги-Чаяакчы деп билип аар ^j.

16Улустуң ырлажыры кажыыдал ыры бо-дур. Ону өске чоннарның кыстары Египет дугайында база ооң мөөң чонунуң дугайында ырлаар». Дээрги-Бурган-Чаяакчының медеглээн чүвези ол-дур.

Египеттиң өлүглер оранынче кирери

17Туттуруушкунувустуң он ийиги чылының ол-ла айының он беште Дээрги-Чаяакчы меңээ Бодунуң сөзүн ажыдып чугаалаан: 18«Кижи амытан, Египеттиң мөөң чонунуң ажыын ажып ыгла; өске күштүг чоннар-биле деңге өлген улустуң турары алдыы оранче чоруптарын аңаа медегле ^k.

19Чараш-каазыңар-биле кымдан арта берген силер? Кыртыжадып демдектетпээн хейлер-биле ^l кады сөөгүңер салыр дээш, өлүглер оранынче бада бериңер! 20Египет чон хылышка шаштырып өлүрткен улус аразынга кырлып каар. Хылыш белен-дир. Египетти база ооң мөөң чонун алгаш барыңар. 21Күштүг маадырлар алдыы оранның иштинге Египет биле ооң эвилелчилериниң дугайында: „Олар хылышка шаштырып өлүрткен кыртыжадып демдектетпээн улус-биле ^m кады бээр кээп дүшкен-дир“– деп чугаалажыр ⁿ.

22Ында Ассирия бодунуң аг-шерии-биле кады турар ^o; ооң хылышка шаштырып өлүрткен бүгү дайынчыларының чевеглери ону хүрээлээн. 23Ассирийлерниң чевеглери алдыы оранның эң ханызында; Ассирияның аг-шерииниң чевеглери кайда-даа чыдар ^p. Дириглер оранынга ^q коргуушкун тарадып турган улус ам дөгере хылышка шаштырып өлүрткен-дир.

24Ында Элам күрүне ^r ооң чевээн хүрээлээн мөөң чону-биле кады турар. Олар шупту хылыштан кырлып, өлүртүп каан. Дириглер оранынга коргуушкун тарадып турганнар ам алдыы оранче кыртыжадып демдектетпээн хейлер бооп дүже берген. Олар тамыже бада бергеннер-биле кады боттарының бак адын чүктеп турар. 25Эламның чыдар черин өлүрткеннер аразында белеткеп каан, ооң мөөң чону ооң чевээн хүрээлеп чыдар. Олар дөгере кыртыжадып демдектетпээн, хылышка шаштырып өлүрткен хейлер-дир. Дириглер оранынга коргуушкун тарадып турганнар ам тамыже бада бергеннер-биле кады боттарының бак адын чүктеп чоруур; оларны өлүрткеннер аразында чыттырып каан.

26Ында Мешех-Тувал күрүне ^s ооң чевээн хүрээлээн мөөң чону-биле кады турар. Дириглер оранынга коргуушкун тарадып турган кыртыжадып демдектетпээн хейлер ам дөгере хылышка шаштырып өлүрткен. 27Кыртыжадып демдектетпейн өлген, алдыы оранче дайынчы чепсээ-биле кады дүже берген, хылыштарын бажының адаанда салып каан, кем-буруузу мөчү-сөөгүнде артып калган дайынчылар-биле кады Мешех-Тувалдың улузу база чытпайн турар эвес чүве бе? А бир шагда ол дайынчылар дириглер оранынга коргуушкунну тарадып турганнар.

28Сен база, Египет, узуткаттырып, кыртыжадып демдектетпээн хейлер аразынга ^t, хылышка шаштырып өлүрткен улус-биле кады чыдар сен.

29Ында Эдомнуң ^u хааннары болгаш нояннарын, олар чеже-даа эрес-дидим болза, хылышка шаштырып өлүрткен улус аразында чыттырып каан. Олар кыртыжадып демдектетпээн хейлер-биле кады чыдар.

30Ында – соңгу чүкте чурттарның бүгү чагырыкчылары болгаш Сидоннуң бүгү чурттакчылары ^v. Оларның күжү улусту коргудуп-даа турган болза, олар ынаар өлүрткен улус-биле кады бак атка кирип, дүже бергеннер. Олар кыртыжадып демдектетпээн, хылышка шаштырып өлүрткен хейлер-биле кады чыдар база тамыже бада бергеннер-биле кады боттарының бак адын чүктеп чоруур.

31Фараон болгаш ооң бүгү аг-шерии ол чоннарны көрүп кааш, хылышка шаштырып өлүрткен бүгү мөөң чону дээш качыгдавайн барып, оожургаар – деп, Дээрги-Бурган-Чаяакчы медеглээн. – 32Дириглер оранынга Менден коргар чорукту тарадып каар мен. А фараонну база ооң мөөң чонун кыртыжадып демдектетпээн хейлер аразынга, хылышка шаштырып өлүрткеннер-биле кады салып каар». Дээрги-Бурган-Чаяакчының медеглээн чүвези ол-дур.