Eze 36 | TyvTUV | STEP

‏ Ezekiel 36

Израильдиң катап тургустунары

1 – 2 «Кижи амытан, Израильдиң дагларынга өттүр билип медегле ^a. Олар дыңназын дээш, Дээрги-Бурган-Чаяакчының чугаалаан чүвезин дамчыт: дайзын силерниң дугайыңарда хыы ханып: „Мөңге бедигээштер ^b бистиң хувааглыг черивис апарды“– дээр-дир. 3 Ынчангаш өттүр билип медеглеп, Дээрги-Бурган-Чаяакчының чугаалаан чүвезин дамчыт: дайзыннар силерни хоозурадып, чүк-чүгүнден үптеп туруп бээрге, силер өске чоннарның алыр үлүү апарып, хоп-чипке кирип, бак сөглеттирип тур силер».

4 Ынчангаш, Израильдиң даглары, Дээрги-Бурган-Чаяакчының сөстерин дыңнаңар ^c. Даглар, тейлерге болгаш хемнер, шынааларга база Израильдиң чоок-кавызында турар арткан чоннарның олчалап, кочу-шоот кылып алганы кагдынган бузундулар болгаш ээнзирээн хоорайларга Ол чугаалап тур. 5 Дээрги-Бурган-Чаяакчы мынча дээн: «Мээң хорадаан сагыжым кыптыгып, өске чоннарга, ылаңгыя бүгү Эдомга удур ^d чүве чугаалап турдум, чүге дээрге олар Мээң черимниң одар-белчиирин эжелеп алгаш, чонумну өөрүп-байырлап база бак көрүп үптеп турганнар.

6 Ынчангаш израиль чер дугайында өттүр билип медеглеп, Дээрги-Бурган-Чаяакчының чугаалаан чүвезин даглар, тейлерге болгаш хемнер, шынааларга дамчыт: хорадаан сагыжымга алыскаш, килеңим кыптыгып, мону чугаалап тур мен, чүге дээрге силер чоннарның дорамчылалын шыдажып турар-дыр силер. 7 Ынчангаш Дээрги-Бурган-Чаяакчы: „Силерни хүрээлээн чоннар база дорамчылалга таваржыр“– деп даңгыраглаан. 8 А силер, Израильдиң даглары, ыяжыңар будуктары чечектелип, Мээң израиль чонумга чимизиңер бээр силер, чүге дээрге олар удавас чанып кээр. 9 Көрүңер, Мен силерже сагыш салып, ээ көрнүр мен; силерни аңдарып, үрезин тарып каар. 10 Силерниң чурттакчы чонуңарны, бүгү израиль чонну, көвүдедир мен ^e; хоорайларга улус чурттай бээр, бузундулар катап туттунар. 11 Мен силерде турар улусту база мал-маганны көвүдедир мен, олар өзүүчел апарып, өзүп-көвүдей бээр ^f. Эрткен үеде ышкаш, Мен силерге улустан чурттадып каар мен, силерниң чериңерге биеэги үелерден-даа хөй ачы-буянны хайырлаар мен ^g. Ынчан Мени Дээрги-Чаяакчы деп билип аар силер. 12 Силерже Бодумнуң израиль чонумну эккээр мен. Олар силерни ээлээр, силер оларның өнчү чери апаар силер база моон соңгаар оларның ажы-төлүнүң амы-тынынга четпес силер ^h».

13 Дээрги-Бурган-Чаяакчы мынча дээн: «Израиль чер, сээң дугайыңда: „Бодунуң улузунуң бажын чип турар ⁱ, чонунуң ажы-төлүнүң амы-тынынга чедип турар чер“– дижип турар болганда, 14 сен моон соңгаар улус чивес сен, бодуңнуң чонуңнуң ажы-төлүнүң амы-тынынга четпес сен – деп, Дээрги-Бурган-Чаяакчы медеглээн. – 15 Мен сени моон соңгаар өске чоннарның кочулалын дыңнавас кылып каар мен; моон соңгаар өске аймактар мурнунга бак атка кирбес сен, бодуңнуң чонуңнуң ажы-төлүнүң амы-тынынга четпес сен». Дээрги-Бурган-Чаяакчының медеглээн чүвези ол-дур.

Бурган Израильди Бодунуң ат-алдарын бодааш, чаартыр

16 Дээрги-Чаяакчы меңээ Бодунуң сөзүн ажыдып чугаалаан: 17 «Кижи амытан, израиль чон бодунуң черинге чурттап тургаш, ону бодунуң ажыл-херээ база үүлгедиглери-биле бужартадып алган ^j. Чоннуң оруу Мээң мурнумга ай демдээ көрүп турар херээжен кижиниң арыг эвези дег болган. 18 Улус бо черге кылган өлүрүүшкүнү-биле, боттарының дүрзү-бурганнары-биле ону бужартадыптарга ^k, Мээң килеңим оларже кыптыккан. 19 Мен израильчилерни өске чоннар аразынга тоо быдарадып каан мен; олар аңгы-аңгы чурттарже тарадыр сывыртадыпкан ^l; Мен оларны ажыл-херээн ёзугаар база үүлгедиглерин ёзугаар шиидип турдум. 20 Ындыг-даа болза, олар кайы-даа черге баргаш, Мээң ыдыктыг адымны баксырадып турдулар, чүге дээрге өске чоннар оларның дугайында: „Бо чон Дээрги-Чаяакчының чону-даа болза, Ооң черин каапкаш баар ужурга таварышкан-дыр“– деп турган. 21 Израиль чоннуң чеде бергени чоннар аразынга баксырадып кааны Бодумнуң ыдыктыг адымны бодааш ^m, сагыш човай берген мен.

22 Ынчангаш израиль чонга Дээрги-Бурган-Чаяакчының чугаалаан чүвезин дамчыт: израиль чон, Мен силерни бодааш эвес, а силерниң чеде бергениңер чоннар аразынга баксырадып кааныңар Бодумнуң ыдыктыг адымны бодааш, ынчалдыр хөделир мен. 23 Мен ам чоннар аразынга баксырап калган өндүр улуг адымның, оларга баргаш, баксырадып кааныңар адымның ыдыктыын көргүзер мен. Ынчан ол чоннар Мени Дээрги-Чаяакчы деп билип аар – деп, Дээрги-Бурган-Чаяакчы медеглээн. – Мен оларга Бодумнуң ыдыктыымны силерни дамчыштыр көргүзер мен ⁿ.

24 Мен силерни чоннар аразындан үндүрүп, бүгү чурттардан чыып алгаш, бодуңарның чериңерже эккээр мен ^o. 25 Силерни арыглаашкын суу-биле бызай чажарымга, арыгланы бээр силер ^p; бүгү бужар чорууңардан, бүгү дүрзү-бурганнарыңардан арыглап каар мен ^q. 26 Силерге чаа сеткил-чүректи хайырлап, чаа сүлде-биле бүргээр мен; силерниң дашталган чүрээңерни ап каапкаш, чымчак чүректи хайырлаар мен ^r. 27 Мээң айтыышкыннарым ёзугаар чурттазыннар дээш, Мээң хоойлуларымны сагып, күүсетсиннер дээш, Мен силерни Бодумнуң Сүлдем-биле бүргээр мен ^s. 28 Силерниң ада-өгбеңерге бергеним черге чурттап, Мээң чонум болур силер, а Мен силерниң Бурганыңар болур мен ^t, 29 силерни бүгү чүдек-бужар чүүлдериңерден адырар мен ^u. Дүжүттү силерге берип, көвүдедир өстүрер мен, аш-чутту силерже ытпас мен ^v. 30 Моон соңгаар аш-чут ужун өске чоннарга дорамчылатпас болзун дээш, ыяштарыңар чимизин база шөлдериңер дүжүдүн көвүдедип бээр мен ^w. 31 Ынчан бузуттуг оруктарыңар биле үүлгеткен багай херектериңерни сактып келгеш, кем-бурууңар болгаш чүдек-бужар чорууңар дээш, боттарыңардан ческинер силер ^x. 32 Силерге билдингир болзун: Мээң ынчалдыр хөделип турарым – силерни бодаанымдан эвес – деп, Дээрги-Бурган-Чаяакчы медеглээн. – Израиль чон, эрткен оруктарыңар дээш ыядып, арныңар кыссын».

33 Дээрги-Бурган-Чаяакчы мынча дээн: «Силерни бүгү кем-бурууңардан арыглаар хүнүмде Мен силерниң хоорайларыңарга улус чурттадып каар мен, бузундулар катап туттунар. 34 Хоозураан черни улус болбаазырадып эгелээр, ол ам болап эрткен кижи бүрүзүнге ээн кылдыр көзүлбес. 35 Олар ынчан: „Ээнзиреп турган бо чер Эдем сесерлии дег апарды ^y. Буступ дүшкен, кижи чок калган, хоозураан хоорайлар ам быжыгып, чурттакчыларлыг апарды“– дээр.

36 Ынчан силерни долгандыр чурттап арткан өске чоннар Дээрги-Чаяакчы Мээң үрелип бузулган чүвени катап тутканымны, ээн калган черни тарып каанымны билип аар. Дээрги-Чаяакчы Мээң ону чугаалааш, боттандырганымны билип аар».

37 Дээрги-Бурган-Чаяакчы мынча дээн: «Мен израиль чоннуң мөргүлүнге база катап харыылап, ооң улузун кодан мал дег көвүдедир мен ^z. 38 Улус-чон Иерусалимде байырлалдар үезинде Бурганның өргээзинче эккелген хойлар дег хөй боор ^aa; үрелип бузулган хоорайларны ынча хөй улус дола бээр. Олар ынчан Мени Дээрги-Чаяакчы деп билип аар ^ab».