Eze 37 | TyvTUV | STEP | Дээрги-Чаяакчының холу мени катап база башкарып эгелээн . Ол мени Бодунуң Сүлдезин дамчыштыр хоорайдан үндүргеш, оргулааш ортузунга тургузуп каан

‏ Ezekiel 37

Дирлип келген сөөктер

1 Дээрги-Чаяакчының холу мени катап база башкарып эгелээн ^a. Ол мени Бодунуң Сүлдезин дамчыштыр хоорайдан үндүргеш, оргулааш ортузунга тургузуп каан ^b – ол оргулаашты сөөктер долган болду. 2 Дээрги-Чаяакчы мени оларны долгандыр эдерти бээрге, оргулаашта чыдар дыка хөй сөөктү көрүп кагдым. Олар аажок кургап калган болду. 3 Ол менден: «Кижи амытан, бо сөөктер дирлип кээп шыдаар бе?» – деп айтырды ^c.

Мен: «Дээрги-Бурган-Чаяакчы, ону чүгле Сен билир сен» – деп харыыладым.

4 Ол ынчан меңээ мынча дээн: «Бо сөөктерге өттүр билип медегле. Оларга: „Кургаг сөөктер, Дээрги-Чаяакчының сөзүн дыңнаңар!“– деп чугаала. 5 Дээрги-Бурган-Чаяакчының чугаалаан чүвезин оларга дамчыт: Мен силерже амы-тынны чорудуп бээримге ^d, дирлип кээр силер. 6 Силерни сиирлер-биле бүргей ап, эът-бодуңарны өстүрүп, кеш-биле шып каар мен. Силерже амы-тынны киир үрүптеримге, дирлип кээр силер. Ынчан Мени Дээрги-Чаяакчы деп билип аар силер».

7 Меңээ дужааганын ёзугаар өттүр билип медеглеп эгеледим. Медеглеп турумда, күштүг шимээн дыңналган соонда, сөөктер каттыжып, бирээзи чанындаазынга тутчуп эгелээн. 8 Көөрүмге, сөөктерде сиирлер болгаш эът тыптып кээп, оларны кеш шыва апты, а амы-тын оларда чок болду.

9 Ынчан Дээрги-Чаяакчы меңээ: «Амы-тынга өттүр билип медегле, кижи амытан. Өттүр билип медеглеп, Дээрги-Бурган-Чаяакчының чугаалаан чүвезин аңаа дамчыт: о, амы-тын, чер болгандан чедип кел, бо өлүрткен улусче тындынывыт, олар дирлип келзин!» – дээн.

10 Мен Ооң дужааганын ёзугаар өттүр билип медеглээримге, өлүг улусче амы-тын кире берген. Олар дирилгеш, бут кырынга туруп кээрге ^e, эмге-тикчок аг-шериг турар болду.

11 Ынчан Дээрги-Чаяакчы меңээ мынча дээн: «Кижи амытан, бо сөөктер – бүгү израиль чонну көргүзүп турар. Дыңна даан, бо чон: „Сөөктеривис кургап калган, идегеливис читкен; бис шуут чок апарган-дыр бис“– деп тур. 12 Ынчангаш өттүр билип медеглеп, оларга Дээрги-Бурган-Чаяакчының чугаалаан чүвезин дамчыт: Мээң чонум, силерниң чевээңерни ажыдып, силерни үндүрүп аар мен ^f, оон израиль черже эккээр мен. 13 Чевээңерни ажыткаш, силерни үндүрүп аарымга, Мени Дээрги-Чаяакчы деп билип аар силер, Мээң чонум. 14 Мен Бодумнуң Сүлдем-биле силерни бүргээр мен ^g, ынчан дирлип кээр силер; Мен силерни боттарыңарның чериңерге чурттадып каар мен. Силер ынчан Дээрги-Чаяакчы Мээң чугаалаан чүвемни боттандырганымны билип аар силер». Дээрги-Чаяакчының медеглээн чүвези ол-дур.

Иудея биле Израильдиң катап каттыжары

15 Дээрги-Чаяакчы меңээ Бодунуң сөзүн ажыдып чугаалаан: 16 «Кижи амытан, мергеден ап алгаш, аңаа: „Иудеяга болгаш ооң-биле эвилелдиг израильчилерге хамааржыр“деп бижип каг. Оон өске мергеден ап алгаш, аңаа: „Эфремниң мергези – Иосифтиң салгалынга болгаш ооң-биле эвилелдиг бүгү израиль чонга хамааржыр“деп бижип каг. 17 Сээң холуңга олар бүдүн кезек апарзын дээш, оларны бот-бодунга чыпшыр тудувут. 18 Кажан сээң чонуңнуң улузу сенден: „Бо чүү деп чүве боор, тайылбырлап көрем?“– деп айтырарга ^h, 19 Дээрги-Бурган-Чаяакчының чугаалаан чүвезин оларга дамчыт: Мен Иосифтиң база ооң-биле эвилелдиг израиль аймактарга хамааржыр, Эфремниң тудуп турары мергени ап алгаш, Иудеяның мергезинге чыпшыр туткаш, олардан чаңгыс мерге кылыр деп тур мен; олар Мээң холумга бүдүн кезек апаар ⁱ.

20 Бижик бижип каан мергелериңни чоннуң мурнунга тудуп алгаш, 21 Дээрги-Бурган-Чаяакчының чугаалаан чүвезин оларга дамчыт: Мен израильчилерни аразында турары чоннардан үндүре бергеш, чер болгандан чыггаш, боттарының черинче чедире бээр деп тур мен ^j. 22 Бо черге, даглыг Израильге, Мен оларны чаңгыс чон кылып каар мен. Олар шупту чаңгыс хаанныг боор, ам ийи аңгы чон болбас, моон соңгаар ийи аңгы күрүне кылдыр чарылбас. 23 Олар моон соңгаар дүрзү-бурганнар, чүдек-бужар чүүлдер болгаш өске-даа кемниг херектери-биле боттарын бужартатпас. Мен оларны үүлгедип турганы бүгү өскерликчи чоруундан ^{▼▼ Өске бурунгу сөзүглелде «Бүгү чурттап турар черлеринден» деп бижээн.} адырып, арыглаар мен ^l. Олар Мээң чонум болур, а Мен оларның Бурганы болур мен ^m.

24 Мээң чалчам Давидтиң салгакчызы оларның хааны апаар ⁿ, олар шупту чаңгыс кадарчылыг болур ^o. Олар Мээң айтыышкыннарым ёзугаар чурттап, Мээң хоойлуларымны сагып, күүседир. 25 Олар Мээң чалчам Иаковка бергеним, боттарының ада-өгбезиниң чурттап турганы черге чурттаар. Боттары, ажы-төлү болгаш ажы-төлүнүң ажы-төлү аңаа кезээ мөңгеде чурттаар ^p. Мээң чалчам Давидтиң салгакчызы мөңге шагда оларның чагырыкчызы болур. 26 Мен олар-биле эп-найырал керээзи чарып аар мен ^q, ол болза мөңге чагыг-керээ болур. Оларны боттарының черинге турумчудуп, өстүрүп-көвүдедир мен. Бодумнуң ыдыктыг оран-савамны оларның аразынга кезээ мөңгеде тургузар мен, 27 Мээң чурттаар өргээм оларның аразынга турар ^r. Мен оларның Бурганы болур мен, а олар Мээң чонум болур ^s. 28 Мээң ыдыктыг өргээмни израильчилерниң аразынга кезээ мөңгеде тургузуп аарымга, бүгү чоннар Мени Израильди ыдыктап турар Дээрги-Чаяакчы деп билип аар ^t».