Eze 4 | TyvTUV | STEP | «Кижи амытан, тууйбудан ап алгаш, мурнуңга салгаш, аңаа Иерусалим хоорайны сиилбирлеп чуруп каг.

‏ Ezekiel 4

Иерусалимниң бүзээлээшкинин баш бурунгаар медеглээни

1 «Кижи амытан, тууйбудан ап алгаш, мурнуңга салгаш, аңаа Иерусалим хоорайны сиилбирлеп чуруп каг. 2 Аңаа удур бүзээлелди өттүнүп кылып көр: бүзээлээшкин тудуглары тургузуп, ону дескиндир бүзээлел чалын оваала, аңаа удур турлаглардан таарыштыр тип, хана буза үстүрер чепсектерден долгандыр тургузуп каг ^a. 3 Оон калбак демир тавактан алгаш, ону бодуң биле хоорайның аразынга демир хана дег тургускаш, хоорайже шиглей көр: хоорай бүзээлеттирген боор, сен ону бүзээлеп аар сен. Ол болза израиль чонга сагындырыг демдээ-дир.

4 Солагай талаңче ийлендир чыдып алгаш, Израильдиң чонунуң кем-буруузун бодуңга хүлээп ал. Солагай быктыңга чеже хүн чыдар-дыр сен, оларның кем-буруузун ынча үеде бодуң чүктээр сен. 5 Мен сеңээ, олар чеже чыл дургузунда кем-буруулуг херектер үүлгеткенил, бир чыл дээш бир хүннү доктаадып каан мен: израиль чоннуң кем-буруузун 390 хүн дургузунда чүктээр сен.

6 Ону күүсеткениң соонда, ам оң талаңче ийлендир чыдып алгаш, Иудеяның чонунуң кем-буруузун дөртен хүн дургузунда чүктээр сен, бир чыл дээш-ле, бир хүн хуусааны сеңээ доктаадып каан мен ^b. 7 Бүзээлеттирген Иерусалимче шиглей көргеш, холуңну олче аннып алгаш, аңаа удур өттүр билип медегле. 8 Көр даан, Мен сени хүлүп-шарып тур мен, ынчангаш бүзээлээшкинниң хүннерин төндүрбээн шааңда ^c, бир таладан өске талаже аңдарлып шыдавас сен ^d.

9 Кызыл-тас, арбай, чочак-тараа, чиңге-тараа болгаш ак-тараадан ап алгаш, чаңгыс саваже ургаш, бодуңга далганнардан быжырып ал. Бир талаңче ийленип алгаш чыдарың 390 хүн дургузунда ол далганнарны чиир сен. 10 Хүннүң-не чиир чемиңни чээрби шекел ^{▼▼ Чээрби шекел – бир килограммның дөрттүң биринден бичии-ле эвээш деңзи.} кылдыр деңзилеп алгаш, доктааткан үе-шакта чиир сен. 11 Сугну база өйлеп, хүннүң-не бир гинниң алдының бири ^{▼▼ Бир гинниң алдының бири – чартык литрден бичии-ле хөй хемчээл.} хирени, доктааткан үе-шакта ижер сен. 12 Арбай далганындан туткан далганнарны улус көрүп турда, кижи мыяан одааш, хаарып аар сен».

13 Дээрги-Чаяакчы оон: «Израиль чон Меңээ үндүр сывыртадып алгаш, өске чоннар аразынга барып, арыг эвес аъш-чемни шак ынчаар чиир ^g» – дээн.

14 Мен ынчан: «О, Дээрги-Бурган-Чаяакчы! Мен кажан-даа арыг эвес аъш-чем чип көрбээн мен ^h. Бодунуң өлүмү-биле өлген азы араатан аң үзерлеп каан дириг амытан эъдин ⁱ аныяамдан бээр, амдыгаа чедир чип көрбээн мен. Бужартаан эът черле мээң аксымче кирбээн» – дээн мен.

15 Дээрги-Чаяакчы меңээ: «Дыңна, Мен сеңээ кижи мыяаның орнунга инек мыяа одааш, далган хаарарын чөпшээреп тур мен» – дээн. 16 Оон Ол: «Кижи амытан, Мен Иерусалимде аъш-чем курлавырын узуткап каар мен ^j. Улус хлебти өйлеп, дүвүрел-биле чиир, сугну база өйлеп, муңгагдал-биле ижер ^k. 17 Чүге дээрге оларга аъш-чем биле суг чедишпестей бээр. Олар бот-боттарынче аңгадап көржүр, боттарының кем-буруузу дээш эстип-хайлыр» – дээн.